ବରଗଡ଼,୯।୨(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ବିଦ୍ୟୁତ୍ ବିଭ୍ରାଟ ବଢ଼ିଚାଲିଛି। ଜିଲାର ବିଭିନ୍ନ ସ୍ଥାନରେ ବିଦ୍ୟୁତ କାଟ୍ ନିତିଦିନିଆ ଘଟଣାରେ ପରିଣତ ହୋଇଛି। ରକ୍ଷଣାବେକ୍ଷଣ ଦର୍ଶାଇ ନିୟମିତ ବ୍ୟବଧାନରେ ଦୀର୍ଘ ସମୟ ଧରି ବିଦ୍ୟୁତ୍ ସରବରାହକୁ ବନ୍ଦ କରି ଦିଆଯାଉଛି। ଏହାକୁ ନେଇ ଜିଲାରେ ଅସନ୍ତୋଷ ବଢ଼ିବାରେ ଲାଗିଛି। ଏହି କ୍ରମରେ ବରଗଡ଼ ବିଦ୍ୟୁତ୍ ଉପଭୋକ୍ତା ସଂଘ ଶୁକ୍ରବ୍ରାର ୱେସ୍କୋ ନିର୍ବାହୀ ଯନ୍ତ୍ରୀ ବିଭୂତି ଭୂଷଣ ଶତପଥୀଙ୍କୁ ଭେଟି ବିଦ୍ୟୁତ୍ ସମସ୍ୟାର ସମାଧାନ ଦିଗରେ ବିହିତ ପଦକ୍ଷେପ ନେବାକୁ ଦାବି କରିବା ସହିତ ଏକ ସ୍ମାରକପତ୍ର ପ୍ରଦାନ କରିଛନ୍ତି।
ବରଗଡ଼ ସହରର ବିଭିନ୍ନ ୱାର୍ଡରେ ପୁରୁଣା ମିଟର ହଟାଇ ନୂତନ ସ୍ମାର୍ଟ ମିଟର ସ୍ଥାପନ କରାଯାଉଛି। ତେବେ ବିଭାଗୀୟ କର୍ମଚାରୀମାନେ ବିନା ପରିଚୟପତ୍ରରେ ଘରକୁ ପ୍ରବେଶ କରୁଥିବାବେଳେ ସ୍ମାର୍ଟ ମିଟର ସ୍ଥାପନର ଉପାଦେୟତା ନେଇ ଲୋକଙ୍କୁ ଠିକ୍ଭାବେ ବୁଝାଇ ପାରୁନାହାନ୍ତି। ସେହିପରି ବିଦ୍ୟୁତ୍ ଦେୟ ଅସୁଲି ପାଇଁ ଉପଭୋକ୍ତାଙ୍କ ଘରକୁ ଯାଉଥିବା କର୍ମଚାରୀମାନେ ବିଦ୍ୟୁତ୍ ବିଲ୍ ପୁରୁଣା କି ନୂଆ, ତାହା ମଧ୍ୟ ଠିକ୍ଭାବେ ଜଣାଉ ନ ଥିବା ଅଭିଯୋଗ ହୋଇଛି। ବିଦ୍ୟୁତ କାଟ୍ ଅନବରତ ଚାଲୁଥିବାରୁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଥିବା ନେଇ ମଧ୍ୟ ସଂଘ ନିର୍ବାହୀ ଯନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲା। ତେବେ ପୁରୁଣା କେବୁଲ ହଟାଇ ନୂଆ କେବୁଲ ଲଗାଯାଉଛି ଏବଂ ଆସନ୍ତା ମାର୍ଚ୍ଚ ୧୫ତାରିଖ ସୁଦ୍ଧା ବିଦ୍ୟୁତ୍ ଯୋଗାଣ ନେଇ ସଶକ୍ତ ଭିତ୍ତିଭୂମି ପ୍ରସ୍ତୁତ ହେବ। ଗ୍ରୀଷ୍ମଦିନରେ ଆଉ ପୂର୍ବଭଳି ବିଦ୍ୟୁତ୍ ସମସ୍ୟା ରହିବ ନାହିଁ ବୋଲି ନିର୍ବାହୀ ଯନ୍ତ୍ରୀ ଶତପଥୀ କହିଥିଲେ।
ସେହିପରି ସହରର ବିଭିନ୍ନ ସ୍ଥାନରେ ମୁକୁଳା ଟ୍ରାନ୍ସଫର୍ମର ରହିଥିବା ଯୋଗୁ ବିଭିନ୍ନ ସମୟରେ ବିପଦ ଆଶଙ୍କା ରହିଛି। ଫଳରେ ସେଭଳି ସ୍ଥାନରେ ପାଚେରି ଦେବାକୁ ସଂଘ ଦାବି କରିଛି। ସେ ଦିଗରେ ମଧ୍ୟ ବିହିତ ପଦକ୍ଷେପ ନିଆଯିବ ଏବଂ ରୁହୁନିଆଁରେ ନିର୍ମାଣାଧୀନ ଗ୍ରୀଡ୍ ଖୁବଶୀଘ୍ର କାର୍ଯ୍ୟକ୍ଷମ ହେବ ବୋଲି ନିର୍ବାହୀ ଯନ୍ତ୍ରୀ ଶତପଥୀ କହିଥିଲେ। ଆଲୋଚନାବେଳେ ୱେସ୍କୋ ଏସ୍ଡ଼ିଓ ନଳିନୀକାନ୍ତ ପଟେଲ ଉପସ୍ଥିତ ଥିଲେ। ବିଦ୍ୟୁତ୍ ଉପଭୋକ୍ତା ସଂଘର ଉପସଭାପତି ବିଷ୍ଣୁଚରଣ ଦାଶ, ସମ୍ପାଦକ ସର୍ଦ୍ଦାର ପ୍ରୀତମ ସିଂହ, କୋଷାଧ୍ୟକ୍ଷ କମଳ ଯୋଶୀ, କୃଷ୍ଣଚନ୍ଦ୍ର ପଣ୍ଡା, ଗୋବିନ୍ଦ ଚନ୍ଦ୍ର ଦାଶ, ପ୍ରତୁଲ ଚନ୍ଦ୍ର ତ୍ରିପାଠୀ, ରାଧାରାଣୀ ମିଶ୍ର, ପ୍ରୀତି ଗୁରୁ, ମନ୍ଦାକିନୀ ପତି, ଇନ୍ଦ୍ରାଣୀ ଶତପଥି, ଅଞ୍ଜନା ଦାଶ, ଜୟନ୍ତୀ ପ୍ରଧାନ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ।
