ମୋରଡା,୧।୬(ଡି.ଏନ୍.ଏ.): ଅସହ୍ୟ ତାତିରେ ସାରା ରାଜ୍ୟ ସିଝୁଥିବା ବେଳେ ମୟୁରଭଞ୍ଜ ଜିଲା ମୋରଡା ବ୍ଲକ ଅଞ୍ଚଳରେ ଅଘୋଷିତ ବିଦ୍ୟୁତ୍ କାଟ ଯୋଗୁ ଅଞ୍ଚଳବାସୀ ନାହିଁ ନ ଥିବାର ଅସୁବିଧାରେ ସମ୍ମୁଖୀନ ହେଉଛନ୍ତି l ଘଣ୍ଟା ଘଣ୍ଟା ଧରି ବିଦ୍ୟୁତ୍ କାଟ୍ ହେଉଥିବାରୁ ପାନୀୟ ଜଳ ଯୋଗାଣ, ଚିକିତ୍ସା ସେବା ଆଦି ଅଞ୍ଚଳରେ ବାଧାପ୍ରାପ୍ତ ହେଉଛି। ତେବେ ଟାଟା ପାୱାର ବିଦ୍ୟୁତ୍ ବଣ୍ଟନ ଦାୟିତ୍ୱ ନେବା ପରଠୁ ଲୋକଙ୍କୁ ଉପଯୁକ୍ତ ବିଦ୍ୟୁତ୍ ସେବା ଯୋଗାଇବା ପରିବର୍ତ୍ତେ ଟଙ୍କା ଆଦାୟ କରିବାରେ ବ୍ୟସ୍ତ ରହୁଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ତେବେ ବିଗତ କିଛି ମାସ ହେବ ଦୈନିକ ୮ରୁ ୧୦ଘଣ୍ଟା ବିଦ୍ୟୁତ୍ କାଟ ହେଉଥିବା ବେଳେ ବୁଧବାର ୧୪ ଘଣ୍ଟା ବିଦ୍ୟୁତ୍ କାଟ ହୋଇଥିବାରୁ ଲୋକେ ଅସ୍ତବ୍ୟସ୍ତ ହୋଇପଡ଼ିଥିଲେ।
ଏନେଇ ଗୁରୁବାର ଚିତ୍ରଡା, ମୋରଡ଼ା, ହଳଦୀପାଳ, ବରକନ୍ଦ ଅଞ୍ଚଳରୁ ଲୋକେ ଆସି ବରକନ୍ଦ ସ୍ଥିତ ବିଦ୍ୟୁତ୍ ଅଫିସ ଘେରାଉ କରିଥିଲେ। ଏପରିକି କନିଷ୍ଠ ଯନ୍ତ୍ରୀ ମୃତ୍ୟଞ୍ଜୟ ମିଶ୍ର,ଏସ୍ଡ଼ିଓ ବୀର କିଶୋର ଦାସଙ୍କୁ ଅଟକ ରଖିଥିଲେ। ଏନେଇ ଘଟଣାସ୍ଥଳରେ ଉତ୍ତେଜନା ଭଳି ପରିସ୍ଥିତି ଦେଖାଦେଇଥିଲା।
ଅନ୍ୟପକ୍ଷେ ଅଞ୍ଚଳରେ ଦୈନିକ ୨୨ଘଣ୍ଟା ବିଦ୍ୟୁତ୍ ସେବା ଯୋଗାଇବା, କନିଷ୍ଠ ଯନ୍ତ୍ରୀଙ୍କ ବରକନ୍ଦ ଷ୍ଟ୍ରକଚର ଏବଂ ଏସ୍ଡିଓଙ୍କ ମୋରଡ଼ା ସ୍ଥିତ ଅଫିସରେ ରହଣି, ଜଙ୍ଗଲ ମଧ୍ୟରେ ୧୭ କି.ମି. ଥିବା ୩୩ କେଭି ବିଦ୍ୟୁତ୍ ତାରକୁ କେବୁଲିଂ କରିବା, ଆଣୁଆସ୍ଥିତ ବରକନ୍ଦ ଷ୍ଟ୍ରକଚରକୁ ଯଥାଶୀଘ୍ର କାର୍ଯ୍ୟକ୍ଷମ କରାଇବା ଏବଂ ଚିତ୍ରଡା ଗ୍ରୀଡ଼ ଅଲଗା କାର୍ଯ୍ୟକ୍ଷମ କରାଇବା ନେଇ ଅଞ୍ଚଳବାସୀ ଦାବି ରଖିଥିଲେ। ବିଦ୍ୟୁତ୍ ବିଭାଗୀୟ ସୁପେରିଟେଣ୍ଡେଟ ଇଞ୍ଜିନିୟରଙ୍କ ସହିତ ସମସ୍ୟା ଉପରେ ଆଲୋଚନା କରି ତୁରନ୍ତ ଦାବି ପୂରଣ କରାଯିବା ନେଇ ଏସ୍ଡିଓ ପ୍ରତିଶ୍ରୁତି ଦେଇଥିଲେ। ଖବର ପାଇ ମୋରଡା ଥାନା ଅଧିକାରୀ ପଦ୍ମଲୋଚନ ପାଣିଗ୍ରାହୀ ପୋଲିସ କର୍ମଚାରୀଙ୍କ ସହ ପହଞ୍ଚି ଲୋକଙ୍କ ସହିତ ଆଲୋଚନା କରି ଘଟଣାକୁ ଶାନ୍ତ କରାଇଥିଲେ।
