ଗୁଡ଼ାରି, ୨୩।୯(ପ୍ରମୋଦ କୁମାର ପତି): ରାୟଗଡ଼ା ଜିଲା ଗୁଡ଼ାରି ନିକଟସ୍ଥ ବିର୍ସା ନାଳ ବ୍ରିଜ୍ରୁ ସହରକୁ ସଂଯୋଗ କରୁଥିବା ପ୍ରାୟ ୨ କିଲୋମିଟର ଦୀର୍ଘ ପ୍ରମୁଖ ରାସ୍ତାର ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡ଼ିଛି। ରାସ୍ତାର ବିଭିନ୍ନ ସ୍ଥାନରେ ସୃଷ୍ଟି ହୋଇଥିବା ବଡ଼ ବଡ଼ ଗାତ ଯୋଗୁ ଏବେ “ଗାତରେ ରାସ୍ତା ନା ରାସ୍ତାରେ ଗାତ” ତାହା ବାରିବା କଷ୍ଟକର ହୋଇପଡ଼ିଛି। ଲଗାଣ ବର୍ଷା ଯୋଗୁ ଏହି ଗାତଗୁଡ଼ିକରେ ବର୍ଷାଜଳ ଭର୍ତ୍ତି ହୋଇ ରହୁଥିବାରୁ ଯାତାୟାତ ସମ୍ପୂର୍ଣ୍ଣ ବିପଜ୍ଜନକ ହୋଇପଡ଼ିଛି। ଦୀର୍ଘ ଦିନ ହେବ ରାସ୍ତାଟି ମରାମତି ଅଭାବରୁ ଖାଲଖମାରେ ପରିଣତ ହୋଇଥିଲେ ସୁଦ୍ଧା ସମ୍ପୃକ୍ତ ବିଭାଗ ଏଥିପ୍ରତି ଆଖିବୁଜି ଦେଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ଏହି ରାସ୍ତାଟି ଗୁଡ଼ାରି ସହର ପାଇଁ ଏକ ଅତ୍ୟାବଶ୍ୟକୀୟ ଲାଇଫଲାଇନ୍। ପ୍ରତିଦିନ ଏହି ବାଟ ଦେଇ ଶହ ଶହ ଗାଡ଼ିମୋଟର ଚଳାଚଳ କରିଥାଏ। ଏହାସହ ଗୁଡ଼ାରି ବ୍ଲକ୍ର ୩ଟି ଗ୍ରାମପଞ୍ଚାୟତ ସମେତ ପଡ଼ୋଶୀ ପଦ୍ମପୁର ଓ ଚନ୍ଦ୍ରପୁର ବ୍ଲକ୍କୁ ଯାଆସ କରିବା ପାଇଁ ଏହାହିଁ ପ୍ରମୁଖ ମାଧ୍ୟମ। ସ୍କୁଲ୍, କଲେଜ ପଢ଼ୁଥିବା ହଜାର ହଜାର ଛାତ୍ରଛାତ୍ରୀ ଏବଂ ବିଭିନ୍ନ ପଞ୍ଚାୟତର ବିଦ୍ୟାଳୟଗୁଡ଼ିକୁ ଯାଉଥିବା ଶିକ୍ଷକ-ଶିକ୍ଷୟିତ୍ରୀମାନେ ପ୍ରତିଦିନ ଏହି ବିପଜ୍ଜନକ ରାସ୍ତାରେ ଯାତ୍ରା କରିବାକୁ ବାଧ୍ୟ ହେଉଛନ୍ତି।
ବର୍ଷା ଦିନେ ଖାଲଗୁଡ଼ିକରେ ପାଣି ଜମି ରହୁଥିବାରୁ ଛୋଟବଡ଼ ଦୁର୍ଘଟଣା ନିୟମିତ ଘଟୁଛି। ଏହି ସମସ୍ୟାର ସ୍ଥାୟୀ ସମାଧାନ ଏବଂ ରାସ୍ତାର ତୁରନ୍ତ ମରାମତି ନିମନ୍ତେ ସ୍ଥାନୀୟ ଯୁବ ସଂଗଠନ “ୟୁଥ୍ ଫର୍ ଚେଞ୍ଜ୍” ପକ୍ଷରୁ ଗ୍ରାମ୍ୟ ଉନ୍ନୟନ (R&D) ବିଭାଗକୁ ଲିଖିତ ଭାବେ ଅବଗତ କରାଯାଇଥିଲା। ବର୍ଷା ସମୟରେ ଏହି ରାସ୍ତାରେ ଯାତାୟାତ କରିବା ଯନ୍ତ୍ରଣା ସଦୃଶ ହେଉଥିବା ବେଳେ ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ନଦେଲେ ଆଗାମୀ ଦିନରେ କୌଣସି ବଡ଼ ଦୁର୍ଘଟଣା ଘଟିବାର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ ବୋଲି ସାଧାରଣରେ ମତ ପ୍ରକାଶ ପାଇଛି।
