ଭଞ୍ଜନଗର,୩୧।୩(ଡି.ଏନ.ଏ): ଗଞ୍ଜାମ ଜିଲା ଗାଙ୍ଗପୁର ଥାନା ଅଧିକାରୀ ଦେବ କୁମାର ଗମାଙ୍ଗଙ୍କ ମୃତ୍ୟୁକୁ ନେଇ ଦିନକୁ ଦିନ ନୂଆ ନୂଆ ତଥ୍ୟ ଲୋକଲୋଚନକୁ ଆସୁଛି। ବୁଧବାର ୩ଟି ଅଡିଓ ଭିଡିଓ ସୋସିଆଲ ମିଡ଼ିଆରେ ଭାଇରାଲ ହେଉଛି। ସେଥିରୁ ଯାହା ଜଣାପଡ଼ୁଛି ମୃତ୍ୟୁର କିଛିଦିନ ପୂର୍ବରୁ ଆଇଆଇସି ଦେବ ମାନସିକ ଅସ୍ଥିରତା ଭିତରେ ରହୁଥିଲେ । ସେ କାର୍ଯ୍ୟ ଚାପ କି ଅନ୍ୟ କୌଣସି କାରଣରୁ ମାନସିକ ଅସ୍ଥିରତା ଭିତରେ ରହୁଥିଲେ ତାହା ଠିକ୍ ଭାବେ ଜଣାପଡ଼ୁନାହିଁ । କିନ୍ତୁ କିଛି ଘଟିବା ସମ୍ଭାବନା ଥିବା କିଛି ପୋଲିସ ଅଧିକାରୀମାନେ ପୁର୍ବରୁ ଅନୁମାନ କରିଥିଲେ। ତଥାପି ପୋଲିସ ଦେବଙ୍କ ଜୀବନ ବଞ୍ଚାଇ ପାରି ନ ଥିଲୋ। ଦେବ ଆତ୍ମହତ୍ୟା କରିଥିବା କଥା ଜଣେ ଅଧିକାରୀ କାହାକୁ କହୁଥିବାର ଏକ ଭିଡ଼ିଓ ଏବଂ ଅଡ଼ିଓରୁ ଜଣାପଡ଼ୁଛି। କିନ୍ତୁ ଉକ୍ତ କଥା ସତ୍ୟ କି ନୁହେଁ ତାହା ତଦନ୍ତ ପରେ ଜଣାପଡ଼ିବ । ଉକ୍ତ ଅଡ଼ିଓ ଭିଡ଼ିଓ କିଏ ଭାଇରଲ କରୁଛି ତାହା ମଧ୍ୟ ଜଣାପଡ଼ୁନାହିଁ । ପୋଲିସ ପକ୍ଷରୁ ଏନେଇ କିଛି କୁହାଯାଉନାହିଁ। ମୃତ୍ୟୁ ପୂର୍ବରୁ ଦେବଙ୍କ ୫ଦିନ ଛୁଟି ମଞ୍ଜୁର ହୋଇଥିଲା । ପୋଲିସ ପକ୍ଷରୁ ଦେବଙ୍କ ମାନସିକ ଅସ୍ଥିରତା ନେଇ ତାଙ୍କ ସ୍ତ୍ରୀ, ମା ’ଏବଂ ଭଉଣୀକୁ ସୂଚନା ଦିଆଯାଇଥିଲା । ଏଥିସହ ତାଙ୍କୁ ଏକ ସ୍ବତନ୍ତ୍ର ଗାଡ଼ିରେ ଗାଙ୍ଗପୁର କର୍ମଚାରୀଙ୍କ ସହଯୋଗରେ ଗ୍ରାମକୁ ନେଇ ଛାଡ଼ିବା ପାଇଁ ବ୍ୟବସ୍ଥା ମଧ୍ୟ ହୋଇଥିଲା । ଏହାପୁର୍ବରୁ ସବୁକିଛି ଓଲଟା ପାଲଟ ହୋଇଗଲା । ପୋଲିସ ନା ଦେବଙ୍କୁ ଗ୍ରାମକୁ ନେଇ ପାରିଲା ନା ତାଙ୍କ ମୃତ୍ୟୁକୁ ରୋକିପାରିଲା । ପୋଲିସ ଦେବଙ୍କ ପାଖରୁ ସର୍ଭିସ୍ ପିସ୍ତଲଟି ଆଣିବାରେ ସକ୍ଷମ ହୋଇଥିଲେ ଏତେବଡ଼ ଘଟଣା ଘଟିନ ଥାନ୍ତା ବୋଲି ଆଲୋଚନା ହେଉଛି । ଅଡ଼ିଓ ଭିଡ଼ିଓ ଭାଇରାଲକୁ ନେଇ ବର୍ତ୍ତମାନ ନାନା ପ୍ରଶ୍ନବାଚୀ
ସୃଷ୍ଟି ହୋଇଛି ।
