ଭୁବନେଶ୍ୱର,୧୬।୩(ବ୍ୟୁରୋ): ଭଦ୍ରକ ଜିଲା ଚାନ୍ଦବାଲି ଅଞ୍ଚଳରୁ ନୟାଗଡ଼ ଜିଲା ରଣପୁର ଥାନା ଅଧୀନ ମଝିଆଖଣ୍ଡ ଗୋଡ଼ିପୋଖରୀ ଗଁାର କ୍ୟାମେରାମ୍ୟାନ ମାନସ ସ୍ବାଇଁଙ୍କୁ ଅପହରଣ ପରେ ହତ୍ୟା କରି ପୋତାଯିବା ଘଟଣାରେ ନୂଆ ତଥ୍ୟ ସାମ୍ନାକୁ ଆସିଛି। ଏହି ଘଟଣାରେ ଏକ ୱେବ୍ ପୋର୍ଟାଲର ପରିଚାଳିକାଙ୍କ ହାତ ଥିବା ଜଣାପଡ଼ିଛି। ସେ ହେଲେ ସମ୍ପୂର୍ଣ୍ଣା ୱେବ୍ ପୋର୍ଟାଲର ପରିଚାଳିକା ଶର୍ମିଷ୍ଠା ରାଉତ। ଶର୍ମିଷ୍ଠା ଫେରାର ଥିବାରୁ ପୋଲିସ ତାଙ୍କୁ ଧରିବାକୁ ଅନୁସନ୍ଧାନ ଜାରି ରଖିଛି।
ମାନସଙ୍କୁ ଚାନ୍ଦବାଲିରୁ ଅପହରଣ କରାଯିବା ପରେ ଭୁବନେଶ୍ୱରର ଏୟାରଫିଲ୍ଡ ଥାନା ଅଞ୍ଚଳରେ ଥିବା ଦୟାଲ ବୃଦ୍ଧାଶ୍ରମରେ ରଖାଯାଇ ନିର୍ଯାତନା ଦିଆଯାଇଥିଲା। ସେଠାରେ ତାଙ୍କୁ ହତ୍ୟା କରାଯିବା ପରେ ନୟାଗଡ଼ ଜିଲା ରଣପୁର ନରେନ୍ଦ୍ରପୁର ବଧିପାଟଣା ଜଙ୍ଗଲରେ ମାଟି ଖୋଳି ପୋତି ଦିଆଯାଇଥିଲା। ପୋଲିସ ୨ଦିନ ତଳେ ଉକ୍ତ ବୃଦ୍ଧାଶ୍ରମରେ ଯାଞ୍ଚ କରିବା ସହ କେୟାରଟେକରଙ୍କୁ ପଚରାଉଚରା କରିଛି। ସେଠାରୁ କିଛି ପ୍ରମାଣ ମଧ୍ୟ ପୋଲିସକୁ ମିଳିଛି। ହତ୍ୟା ମାମଲାରେ ସମ୍ପୃକ୍ତ ୩ ଅଭିଯୁକ୍ତ ଭାଗ୍ୟଧର ନାୟକ, ବିବେକ ନାୟକ ଓ କୃଷ୍ଣଚନ୍ଦ୍ର ନାୟକଙ୍କୁ ଚାନ୍ଦବାଲି ଥାନା ପୋଲିସ ସୋମବାର ଗିରଫ କରି କୋର୍ଟ ଚାଲାଣ କରିଛି। ଏହି ମାମଲାରେ ସମ୍ପୃକ୍ତ ଥିବା ଅନ୍ୟ ଅଭିଯୁକ୍ତଙ୍କୁ ଖୁବଶ୍ରୀଘ୍ର ଗିରଫ କରାଯିବ ବୋଲି ଚାନ୍ଦବାଲି ଏସ୍ଡିପିଓ ଦେବୀଶଙ୍କର ପ୍ରତାପ ଗଣମାଧ୍ୟମକୁ କହିଛନ୍ତି। ମାନସ କିଛି ଦିନ ହେଲା ଉକ୍ତ ୱେବ୍ ପୋର୍ଟାଲରୁ କାମ ଛାଡ଼ି ଦେଇଥିଲେ। ହେଲେ ତାଙ୍କ ପାଖରେ ଏକ ମେମୋରି ଚିପ୍ ଥିଲା। ଉକ୍ତ ମେମୋରି ଚିପ୍ ପାଇଁ ମାନସଙ୍କୁ ଶର୍ମିଷ୍ଠା ଲୋକ ଲଗାଇ ହତ୍ୟା କରିଥାଇପାରନ୍ତି ବୋଲି ସନ୍ଦେହ କରାଯାଉଛି। ଅପରପକ୍ଷରେ ରାଜଧାନୀରେ ଥିବା ଦୟାଲ ବୃଦ୍ଧାଶ୍ରମକୁ ନେଇ ସନ୍ଦେହ ଘନୀଭୂତ ହୋଇଛି। ଶର୍ମିଷ୍ଠା ଏହି ବୃଦ୍ଧାଶ୍ରମର ପରିଚାଳିକା ବୋଲି କୁହାଯାଉଛି। ଉକ୍ତ କୋଠାର ତଳ ମହଲା ବୃଦ୍ଧାଶ୍ରମ ହୋଇଥିବାବେଳେ ଉପର ମହଲାରେ କିଛି ଆପତ୍ତିଜନକ କାର୍ଯ୍ୟ ଚାଲୁଥିବା ପୋଲିସ ସନ୍ଦେହ କରୁଛି। ତେଣୁ ଶର୍ମିଷ୍ଠା ଧରାପଡ଼ିଲେ ହତ୍ୟା ପଛର ପ୍ରକୃତ କାରଣ ପଦାକୁ ଆସିବ ବୋଲି ପୋଲିସ କହିଛି।
ସୂଚନାଯୋଗ୍ୟ, ଗତ ଫେବୃୟାରୀ ୭ରେ ମାନସ ଚାନ୍ଦବାଲି ନାଲଗୁଣ୍ଡା ପଳାସପୁର ଗଁାକୁ ଏକ ବାହାଘରରେ ଫଟୋ ଉଠାଇବା ପାଇଁ ଆସିଥିଲେ। ଭୁବନେଶ୍ୱରରୁ କେତେଜଣ ବ୍ୟକ୍ତି ଆସି ତାଙ୍କୁ ନାଲଗୁଣ୍ଡା ପଞ୍ଚାୟତର ପଳାସପୁର ଛକ ନିକଟରୁ ଅପହରଣ କରି ନେଇ ହତ୍ୟା ପରେ ମାଟି ଖୋଳି ପୋତି ଦେଇଥିଲେ। ଏହାପରେ ମାନସଙ୍କ ନିଖୋଜ ଏବଂ ଅପହରଣ ନେଇ ତାଙ୍କ ପରିବାର ପକ୍ଷରୁ ୧୪ ତାରିଖରେ ଚାନ୍ଦବାଲି ଥାନାରେ ଅଭିଯୋଗ କରାଯାଇଥିଲା। ଏନେଇ ପୋଲିସ ଏକ ମାମଲା (ନଂ. ୬୩/୨୨) ରୁଜୁ କରି ତଦନ୍ତ ଆରମ୍ଭ କରିଥିଲା।
