ଅହମ୍ମଦାବାଦ, ୨୨ା୨(ପି.ଟି.)-ମୋଟେରାରେ ଇଂଲଣ୍ଡ ବିପକ୍ଷରେ ପିଙ୍କ୍ ବଲ୍ ଟେଷ୍ଟ ଖେଳାଯିବା ସମୟରେ ବିଶେଷ କରି ସୂର୍ଯ୍ୟାସ୍ତ ସମୟରେ ବ୍ୟାଟିଂ ବେଳେ ତାଙ୍କୁ ଅଧିକ ସତର୍କତା ଅବଲମ୍ବନ କରିବାକୁ ପଡ଼ିବ ବୋଲି ଭାରତୀୟ ଓପନର ରୋହିତ ଶର୍ମା କହିଛନ୍ତି। ଚେନ୍ନାଇରେ ଅନୁଷ୍ଠିତ ଦ୍ୱିତୀୟ ଟେଷ୍ଟରେ ରୋହିତ ଆକର୍ଷଣୀୟ ୧୬୧ ରନ ସଂଗ୍ରହ କରିଥିଲେ। ୨୦୧୯ ନଭେମ୍ବରରେ ବାଂଲାଦେଶ ବିପକ୍ଷରେ ପ୍ରଥମ ଦିବାରାତ୍ର ଟେଷ୍ଟ ବେଳେ ସେ ଭାରତୀୟ ଦଳ ତରଫରୁ ଖେଳୁଥିଲେ। କିନ୍ତୁ ସୂର୍ଯ୍ୟାସ୍ତ ସମୟରେ ତାଙ୍କୁ ବ୍ୟାଟିଂ କରିବାକୁ ପଡ଼ି ନ ଥିଲା। ଏହି ସମୟରେ ଜଣେ ବ୍ୟାଟ୍ସମ୍ୟାନଙ୍କୁ କେଉଁ ପରିସ୍ଥିତିର ସାମ୍ନା କରିବାକୁ ପଡ଼ିଥାଏ ସେ ଅନୁଭବ କରିପାରି ନାହାନ୍ତି। ବୁଧବାର ଇଂଲଣ୍ଡ ବିପକ୍ଷରେ ଆରମ୍ଭ ହେବାକୁ ଥିବା ତୃତୀୟ ଟେଷ୍ଟ ମ୍ୟାଚ ପୂର୍ବରୁ ଏକ ଭର୍ଚୁଆଲ ଖବରଦାତା ସମ୍ମିଳନୀରେ ଭାରତୀୟ ଓପନର ଏକଥା କହିଛନ୍ତି। ସନ୍ଧ୍ୟା ସମୟରେ ଆକସ୍ମିକ ଆଲୋକ ଓ ପାଗର ପରିବର୍ତ୍ତନ ଘଟିବ। ସେହି ସମୟରେ ଖେଳିବା ନିଶ୍ଚୟ ଏକ ଚ୍ୟାଲେଞ୍ଜ ହେବ। ଏ ବିଷୟ ଅବଶ୍ୟ ସମସ୍ତ ବ୍ୟାଟ୍ସମ୍ୟାନ ଜାଣନ୍ତି। ତେବେ ଏହି ପରିସ୍ଥିତିରେ ନିଜକୁ ଖାପଖୁଆଇ କିପରି ଖେଳିବାକୁ ହେବ ତାହା ନିଜେ ନିର୍ଦ୍ଧାରଣ କରିବାକୁ ହେବ। ପୁନଶ୍ଚ ମ୍ୟାଚ୍ଟି ମୋଟେରାସ୍ଥିତ ନବନିର୍ମିତ ସର୍ଦ୍ଦାର ପଟେଲ ଗୁଜରାଟ ଷ୍ଟାଡିୟମରେ ଖେଳାଯିବ। ନୂଆ ଷ୍ଟାଡିୟମରେ ଖେଳିବା ସବୁବେଳେ ଚ୍ୟାଲେଞ୍ଜପୂର୍ଣ୍ଣ ହୋଇଥାଏ। ଷ୍ଟାଡିୟମରେ ବ୍ୟବହାର ହେବାକୁ ଥିବା ଲାଇଟ୍ ଓ ସିଟ୍ଗୁଡ଼ିକ ସମ୍ପୂର୍ଣ୍ଣ ନୂଆ। ତେଣୁ ଏହା ଅଧିକ ଝଲିସିବ। ଫିଲ୍ଡିଂ ବେଳେ ଏହା ସମସ୍ୟାରେ ପକାଇପାରେ। ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ସ୍ଥାନ ପକ୍କା କରିବା ଲାଗି ଉଭୟ ଇଂଲଣ୍ଡ ଓ ଭାରତ ପାଇଁ ଏହି ସିରିଜ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
