ପଟ୍ଟାମୁଣ୍ଡାଇ,୨୨।୨(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ ନିମପୁର ଗାଁର ଏକ ବରଯାତ୍ରୀ ଦଳ ଶନିବାର ରାତିରେ ରାଜନଗର କେରାଡାଗଡ ଗାଁକୁ ଯାଇଥିଲେ। ସେଠାରେ ଭୋଜିଖାଇ ରାତିରେ ଘରକୁ ଫେରିଥିଲେ। ହେଲେ ରବିବାର ସକାଳୁ ଖାଦ୍ୟ ବିଷକ୍ରିୟା ଯୋଗୁ ଅଧିକାଂଶ ବରଯାତ୍ରୀ ଝାଡାବାନ୍ତିରେ ଆକ୍ରାନ୍ତ ହୋଇଥିଲେ। ତୁରନ୍ତ ଗାଁର କେତେଜଣ ଯୁବକଙ୍କୁ ପଟ୍ଟାମୁଣ୍ଡାଇ ଉପଖଣ୍ଡସ୍ତରୀୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଡାକ୍ତର ସେମାନଙ୍କ ଚିକିତ୍ସା କରିବା ସହ ସାଲାଇନ୍ ଓ ଔଷଧ ପ୍ରଦାନ କରିଥିଲେ। ଡାକ୍ତରଖାନା ସୂତ୍ରରୁ ଜଣାପଡିଛି ଗାଁର ୫୭ ଜଣ ଅସୁସ୍ଥ ହୋଇ ଚିକିତ୍ସା ଲାଗି ଆସିଥିଲେ। ସେମାନଙ୍କ ମଧ୍ୟରୁ ୩ ଜଣ ରକ୍ତବାନ୍ତି କରି ଗୁରୁତର ହୋଇପଡିଥିଲେ। ସେମାନେ ହେଲେ ଶଙ୍ଖଦତ୍ତ ମଳିକ(୨୫), ପ୍ରତୀକ ମଳିକ (୩୦) ଓ ବାୟା ମଳିକ (୨୫)। ଡାକ୍ତର ସେମାନଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ଅଧିକ ଚିକିତ୍ସା ପାଇଁ ପଠାଇ ଦେଇଥିଲେ। ଅନ୍ୟ ଆକ୍ରାନ୍ତଙ୍କ ମଧ୍ୟରେ ପ୍ରମୋଦିନୀ ମଳିକ (୧୮), ରିଙ୍କି ମଳିକ (୧୪), ମଣ୍ଟୁ ମଳିକ (୨୩), ଚିଣ୍ଟୁ ମଳିକ(୧୮), ରମାକାନ୍ତ ମଳିକ (୬୦), ଆନନ୍ଦ ମଳିକ (୧୮), ଜୟଶ୍ରୀ ମଳିକ (୨୩), ଗଣେଶ ମଳିକ (୫୦), ଅନିଲ ମଳିକ (୧୫), ପ୍ରଦୀପ ମଳିକ (୨୩), ବଳରାମ ମଳିକ(୨୧), ପ୍ରକାଶ ମଳିକ(୨୧), ଦିଲ୍ଲୀପ ମଳିକ ପ୍ରମୁଖ ସୁସ୍ଥ ହେଲା ପରେ ଘରକୁ ଛାଡି ଦିଆଯାଇଛି। ବିବାହ ଭୋଜିଖାଇ ଖାଦ୍ୟ ବିଷକ୍ରିୟା ଯୋଗୁ ଝାଡାବାନ୍ତି ହୋଇଛି ବୋଲି ଡାକ୍ତର ଚନ୍ଦ୍ରଶେଖର ଦାସ କହିଛନ୍ତି।
