ଜୟପୁର,୯।୪ : ରାଜସ୍ଥାନ କଂଗ୍ରେସରେ ପୁଣି ଏକ ନୂଆ ଝଡ଼ ସୃଷ୍ଟି ହେବାକୁ ଯାଉଛି। କଂଗ୍ରେସ ନେତା ତଥା ରାଜ୍ୟର ପୂର୍ବତନ ଉପପମୁଖ୍ୟମନ୍ତ୍ରୀ ସଚିନ ପାଇଲଟ ଏପ୍ରିଲ ୧୧ ରେ ମୁଖ୍ୟମନ୍ତ୍ରୀ ଅଶୋକ ଗେହଲୋଟ ନେତୃତ୍ୱାଧୀନ ସରକାରଙ୍କ ବିରୋଧରେ ହଙ୍ଗର ଷ୍ଟ୍ରାଇକରେ ବସିବାକୁ ନିଷ୍ପତ୍ତି ନେଇଛନ୍ତି। ରବିବାର ଏକ ଖବରଦାତା ସମ୍ମିଳନୀରେ ପାଇଲଟ କହିଛନ୍ତି, ପୂର୍ବ ବସୁନ୍ଧରା ରାଜେ ସରକାରଙ୍କ ବିରୋଧରେ ଆସିଥିବା ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଅଶୋକ ଗେହଲୋଟଙ୍କୁ ନିବେଦନ କରିଛନ୍ତି। କିନ୍ତୁ ଏପର୍ଯ୍ୟନ୍ତ ତାଙ୍କ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନାହିଁ।
ବସୁନ୍ଧରାଙ୍କ ବିରୋଧରେ ସେ ଏବଂ ଗେହଲୋଟ ଏକାଠି ଏହି ଅଭିଯୋଗ ଆଣିଥିଲେ। କଂଗ୍ରେସ ଦଳର ତତ୍କାଳୀନ ରାଜ୍ୟ ଅଧ୍ୟକ୍ଷ ଭାବରେ ମୁଁ କିଛି ଅଭିଯୋଗ କରିଥିଲି। ମୁଁ ପ୍ରତିଶୋଧ ରାଜନୀତିରେ ବିଶ୍ୱାସ କରେ ନାହିଁ। କିନ୍ତୁ ବିରୋଧୀ ଦଳ ଭାବେ ଆମର କିଛି ବିଶ୍ୱସନୀୟତା ଥିଲା ଏବଂ ସେଥିପାଇଁ ଆମେ କ୍ଷମତାକୁ ଆସିଥିଲୁ। ରାଜ୍ୟରେ ଦୁର୍ନୀତି ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମୁଁ ପ୍ରତିଶ୍ରୁତିବଦ୍ଧ। ସେଥିପାଇଁ ମୁଁ ହଙ୍ଗର ଷ୍ଟ୍ରାଇକ କରିବି। ଜନସାଧାରଣ ଅନୁଭବ କରୁଛନ୍ତି ଆମେ କୌଣସି କାର୍ଯ୍ୟ କରୁ ନାହୁଁ । ଆମେ ଆମର ପ୍ରତିଶ୍ରୁତି ପୂରଣ କରୁନାହୁଁ। ତେଣୁ ମୁଁ ଏଭଳି କରିବାକୁ ନିଷ୍ପତ୍ତି ନେଇଛି।
