କର୍ଲାମୁଣ୍ଡା:୪।୭(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲମୁଣ୍ଡା ବ୍ଲକ ସ. ମାଲପଡ଼ା ପଞ୍ଚାୟତ ବାଗବୁରାଇ ତାରିଣୀ ଛକଠାରୁ ଭଟାପଲା କେନାଲ ଛକ ପର୍ଯ୍ୟନ୍ତ ପ୍ରଧାନମନ୍ତ୍ରୀ ସଡ଼କ ଯୋଜନାରେ ରାସ୍ତା ନିର୍ମାଣ କାର୍ଯ୍ୟରେ ଅନିୟମିତତା ତଥା ନିମ୍ନମାନର କାମ ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ବର୍ତ୍ତମାନ ସୁଦ୍ଧା ଦେଓଗାଁ ଛକଠାରୁ ରିଂଜା ଧରଣୀପଦା ପର୍ଯ୍ୟନ୍ତ ରାସ୍ତା ନିର୍ମାଣ କାର୍ଯ୍ୟ ଶେଷ ହେବାର ସପ୍ତାହ ନ ପୁରୁଣୁ ରାସ୍ତାରୁ ପିଚୁ ଉଠିଯାଉଥିବା ଦେଖିବାକୁ ମିଳିଛି। ରାସ୍ତାରୁ ପିଚୁ ଉଠୁଥିବା ଘଟଣାକୁ ନେଇ କିଛିଦିନ ତଳେ ସାମାଜିକ ଗଣମାଧ୍ୟମରେ ଭିଡିଓ ଭାଇରାଲ ହେବା ପରେ ବିଭାଗୀୟ ଅଧିକାରୀ କିମ୍ବା ଦାୟିତ୍ୱରେ ଥିବା ଠିକାଦାର କୌଣସି ଗୁରୁତ୍ୱ ଦେଉ ନ ଥିବା ଦୁର୍ଭାଗ୍ୟର ବିଷୟ ବୋଲି ରିଂଜା ଗ୍ରାମର ବେଦବ୍ୟାସ ଚୌଧୁରୀ ଅଭିଯୋଗ କରିଛନ୍ତି। ଏନେଇ କନିଷ୍ଠ ଯନ୍ତ୍ରୀ ସୋମନ କୁଣ୍ଡଲାନାଙ୍କୁ ପଚାରିବାରୁ ପିଚୁ ପଡିବା ପରେ ଟ୍ରାକ୍ଟରଗୁଡ଼ିକ ଯିବା ଆସିବା କରୁଥିବାରୁ ପିଚୁ ଉଠି ଥାଇପାରେ ବୋଲି କହିଛନ୍ତି। ଅନ୍ୟପକ୍ଷେ ଏହି ଦିଗରେ ଜିଲା ପ୍ରଶାସନ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି। ସୂଚନାଯୋଗ୍ୟ, ଏମ୍ଡିଆର ୧୧୫ଠାରୁ ଭଟାପଲା ଭାୟା ବାଗବୁରେଇ ଧରଣୀପଡ଼ା ରିଂଜା ପର୍ଯ୍ୟନ୍ତ ମୋଟ ୯.୭୦ କିମି ରାସ୍ତା ନିର୍ମାଣ ପାଇଁ ୭ କୋଟି ୫୭ ଲକ୍ଷ ୮୫ ହଜାର ଟଙ୍କା ଅଟକଳ ରହିଛି।
