ଜଗତ୍ସିଂହପୁର,୨୬ା୪(ପ୍ରମୋଦ କୁମାର ନାୟକ): ଚିରଞ୍ଜୀବ ବିଶ୍ୱାଳ କଂଗ୍ରେସ ଛାଡି ବିଜେଡିରେ ମିଶିଲା ପରେ ଜଗତ୍ସିଂହପୁର ବିଧାନସଭା ନିର୍ବାଚନମଣ୍ଡଳୀରେ ରାଜନୈତିକ ପରିବେଶ ବଦଳିବାରେ ଲାଗିଛି। ଦଳ ପ୍ରଶାନ୍ତ ମୁଦୁଲିଙ୍କୁ ପୁଣିଥରେ ବିଧାୟକ ପ୍ରାର୍ଥୀ କରିଥିବା ବେଳେ ଚିରଞ୍ଜୀବ ନିରାଶ ହୋଇଛନ୍ତି। ତଥାପି କ୍ଷମତା ଆଶା ଛାଡ଼ିନାହାନ୍ତି। କାରଣ ତାଙ୍କୁ ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ କିମ୍ବା ରାଜ୍ୟ ସଭା ସଦସ୍ୟ ପଦବୀ ମିଳିବାର ସମ୍ଭାବନା ଅଛି। ଯେଉଁ କାରଣରୁ ସେ ଦଳ ପାଇଁ ଅଣ୍ଟା ଭିଡ଼ିଥିବା କୁହାଯାଉଛି। ଏନେଇ ଗତ ୧୯ ତାରିଖରେ ନିର୍ବାଚନମଣ୍ଡଳୀ ଅନ୍ତର୍ଗତ ଜଗତ୍ସିଂହପୁର ଓ ନାଉଗାଁ ବ୍ଲକ ଅଞ୍ଚଳର କଂଗ୍ରେସ ନେତା ଓ କର୍ମୀଙ୍କୁ ନଖରା ନିକଟ ତାଙ୍କ ଫାର୍ମ ହାଉସକୁ ପୃଥକ୍ ଭାବେ ଡାକି ସେଠାରେ ବୈଠକ କରିଥିଲେ। ସେଠାରେ ତାଙ୍କୁ କ୍ଷମା କରିଦେବାକୁ ଅନୁରୋଧ କରିବା ସହ ବିଜେଡି ସହ ରହି ନବୀନ ପଟ୍ଟନାୟକଙ୍କୁ ପୁଣିଥରେ ମୁଖ୍ୟମନ୍ତ୍ରୀ କରିବାକୁ ଜୋର ଦେଇଥିଲେ। ଗତ ୨୪ ତାରିଖରେ ଜଗତ୍ସିଂହପୁର ପୌରାଞ୍ଚଳର କଂଗ୍ରେସ ନେତା ଓ କର୍ମୀଙ୍କୁ ଏହି ଫାର୍ମ ହାଉସକୁ ଡାକି ସେମାନଙ୍କ ମାନ ଭଞ୍ଜନ ପାଇଁ ଉଦ୍ୟମ କରିଥିଲେ। କିନ୍ତୁ ଏହି ୨ ପୃଥକ୍ କାର୍ଯ୍ୟକ୍ରମରେ ଆଶାଜନକ କଂଗ୍ରେସ ନେତା ଓ କର୍ମୀ ଯୋଗଦେଇ ନ ଥିଲେ। ଯେଉଁମାନେ ଯୋଗ ଦେଇଥିଲେ, ସେମାନେ ଚିରଞ୍ଜୀବଙ୍କ ନିଷ୍ପତ୍ତି ସହ ଏକମତ ହୋଇ ନ ଥିଲେ। ଏହାର ପ୍ରମୁଖ କାରଣ ହେଲା, ୨୦୧୯ ନିର୍ବାଚନ ପରଠାରୁ ଚିରଞ୍ଜୀବ ନିର୍ବାଚନମଣ୍ଡଳୀଠାରୁ ଦୂରତ୍ୱ ଅବଲମ୍ବନ କରୁଥିଲେ। ଅର୍ଥାତ୍ କଂଗ୍ରେସ ଲୋକଙ୍କ ସହ ସମ୍ପର୍କ ରଖୁ ନ ଥିଲେ। କଂଗ୍ରେସ ଲୋକଙ୍କ ଏଭଳି ପ୍ରତିକ୍ରିୟା ଚିରଞ୍ଜୀବ ଧୈର୍ଯ୍ୟର ସହ ଶୁଣି ଆଗାମୀ ଦିନରେ ସେଭଳି ତ୍ରୁଟି ହେବନାହିଁ ବୋଲି ପ୍ରତିଶ୍ରୁତି ଦେଇଥିବା କେତେଜଣ କଂଗ୍ରେସ ନେତା ଓ କର୍ମୀ କହିଛନ୍ତି। ଏଭଳି ଧୀରେ ଧୀରେ କଂଗ୍ରେସର ଆଗଧାଡିର ଲୋକଙ୍କୁ ଡାକି ବୁଝାଶୁଝା କରି ସେମାନଙ୍କୁ ବିଜେଡିରେ ସାମିଲ କରିବାକୁ ଚିରଞ୍ଜୀବ ଉଦ୍ୟମ ଜାରି ରଖିଛନ୍ତି। ଏହାପରେ ନିର୍ବାଚନମଣ୍ଡଳୀରେ ସର୍ବସାଧାରଣଙ୍କ ଆଗକୁ ଆସିବାକୁ ଚେଷ୍ଟା କରିଛନ୍ତି। ଶୁକ୍ରବାର ନିର୍ବାଚନମଣ୍ଡଳୀରେ ବିଜେଡି ପକ୍ଷରୁ ୨୦୨୪ ନିର୍ବାଚନ ପରିପ୍ରେକ୍ଷୀରେ ପ୍ରଥମ କରି ଶୋଭାଯାତ୍ରା ଓ ସାଧାରଣସଭା ଆୟୋଜନ ହେବାକୁ ଯାଉଛି। ଶୋଭାଯାତ୍ରାରେ ବିଜେଡି ପ୍ରାର୍ଥୀ ପ୍ରଶାନ୍ତଙ୍କ ସହ ଚିରଞ୍ଜୀବ ଏକାଠି ରହିବେ। ଅନ୍ୟମାନଙ୍କ ମଧ୍ୟରେ ଦଳର ଏମ୍ପି ପ୍ରାର୍ଥିନୀ ରାଜଶ୍ରୀ ମଲ୍ଲିକ, ଦଳ ଜିଲା ସଭାପତି ଓ ଅନ୍ୟ କର୍ମକର୍ତ୍ତାମାନେ ଯୋଗଦେବାର କାର୍ଯ୍ୟକ୍ରମ ରହିଛି। ଏହାପରେ ସ୍ଥାନୀୟ ଚର୍ଚ୍ଚିକା ବଜାରସ୍ଥିତ ଏକ ବେସରକାରୀ ପଡ଼ିଆରେ ହେବାକୁ ଥିବା ସଭାରେ ସେମାନେ ଯୋଗ ଦେବାର କାର୍ଯ୍ୟକ୍ରମ ରହିଛି। ଅପରାହ୍ନ ପ୍ରାୟ ୪ଟାରୁ ଶୋଭାଯାତ୍ରା ନୂଆପୋଲ ନିକଟରୁ ବାହାରିବ। ଏଥିରେ ନିର୍ବାଚନମଣ୍ଡଳୀର ସହସ୍ରାଧିକ ଲୋକ ଯେପରି ଯୋଗଦେବେ ସେ ନେଇ ବିଜେଡି ପକ୍ଷରୁ ଉଦ୍ୟମ ହେଉଥିବା କୁହାଯାଇଛି। ପ୍ରତି ପଞ୍ଚାୟତରୁ ଯେପରି ଅଧିକ ସଂଖ୍ୟକ ବିଜେଡି ନେତା ଓ କର୍ମୀ ଆସିବେ ସେନେଇ ଖସଡା ପ୍ରସ୍ତୁତ କରାଯାଇଛି। ସମାବେଶରେ ପ୍ରଶାନ୍ତ ଓ ଚିରଞ୍ଜୀବ କ’ଣ କହିବେ ସେନେଇ ସମସ୍ତଙ୍କ ମଧ୍ୟରେ ଉତ୍କଣ୍ଠା ବଢ଼ିବାରେ ଲାଗିଛି।
