ଶାରଜା,୩।୧୦: ଶାରଜାର ପିଚ୍ରେ ୧୬୫ ରନ୍ର ବିଜୟ ଲକ୍ଷ୍ୟର ପିଛା କରୁଥିବା ପଞ୍ଜାବ କିଙ୍ଗ୍ସ ବିନା କ୍ଷତିରେ ୧୧ ଓଭରରେ ୯୧ ରନ୍ କରିଥିଲା। ଲଗୁଥିଲା ଦଳ ଅତି ସହଜରେ ଜିତିଯିବ। କିନ୍ତୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଅଧିନାୟକ ବିରାଟ କୋହଲି ସଠିକ୍ ବୋଲିଂ ପରିବର୍ତ୍ତନ କରି ପଞ୍ଜାବକୁ ରୋକି ଦେଇଥିଲେ ୧୫୮ ରନ୍ରେ। ୬ ରନ୍ରେ ମ୍ୟାଚ୍ ଜିତିଥିବା ଆର୍ସିବି ପ୍ଲେ-ଅପ୍ରେ ସ୍ଥାନ ପକ୍କା କରିଛି। ଅନ୍ୟପକ୍ଷରେ ପଞ୍ଜାବର ଆଶା ଶେଷ ହୋଇଛି।
ଟସ୍ ଜିତି ବ୍ୟାଟିଂ କରିଥିବା ଆରସିବିକୁ ୬୮ ରନ୍ର ଆରମ୍ଭ ଦେଇଥିଲେ ଅଧିନାୟକ ବିରାଟ କୋହଲି (୨୫) ଓ ଦେବଦତ୍ତ ପାଡିକଲ (୪୦)। ତା’ ପରେ ଗ୍ଲେନ ମ୍ୟାକ୍ସଓ୍ବେଲ ଖେଳିଥିଲେ ୫୭ ରନ୍ (୩ ଚୌକା ଓ ୪ ଛକା)ର ବିସ୍ଫୋରକ ପାଳି। ଏବି ଡି’ଭିଲୟର୍ସ (୨୩)ଙ୍କ ଯୋଗଦାନ ଯୋଗୁ ଆରସିବି ଧାର୍ଯ୍ୟ ୨୦ ଓଭରରେ ୭ ଉଇକେଟ ହରାଇ ୧୬୪ ରନ୍ କରିଥିଲା। ଜବାବରେ ପଞ୍ଜାବ ପାଇଁ ଅଧିନାୟକ ଲୋକେଶ ରାହୁଲ (୩୯) ଓ ମୟଙ୍କ ଅଗ୍ରଓ୍ବାଲ (୫୭)ଙ୍କ ଓପନିଂ ଯୋଡ଼ି ୯୧ ରନ୍ କରିଥିଲା। ଏତେ ଭଲ ଆରମ୍ଭ ସତ୍ତ୍ୱେ ବିଜୟ ଲକ୍ଷ୍ୟ ଠାରୁ ୭ ରନ୍ ଦୂରରେ ରହିଯାଇଥିଲା ପଞ୍ଜାବ। ବିଜୟୀ ଦଳ ପାଇଁ ୟୁଜବେନ୍ଦ୍ର ଚହଲ ୩ ଉଇକେଟ ନେଇଥିଲେ।
