ନୂଆପଡ଼ା,୨୯ା୪ (ମକାରୁ ବେମାଲ):ନୂଆପଡ଼ା ଅପର ଜୋଙ୍କ ଜଳସେଚନ ପ୍ରକଳ୍ପ ପାଣି ଶୁଖିଲା ପରେ ଧାନଫସଲ ବଞ୍ଚାଇବା ଚିନ୍ତାରେ ଚାଷୀ ମୁଣ୍ଡରେ ହାତଦେଇ ବସିଛି ା ପୋଖରୀ, ମୁଡା, ନଈ ଥିବା ସ୍ଥାନରେ ଧାନ ବର୍ତ୍ତିଯାଇଥିବା ବେଳେ ପାଣି ମଡାଇବା ସୁବିଧା ନ ଥିବା ସ୍ଥାନରେ ସମ୍ପୂର୍ଣ୍ଣ ମରିଗଲାଣି। ଭେରା ପଞ୍ଚାୟତର ପଞ୍ଚମପୁର, କୁସୁମପଡା, ବରପଡା, ଲାଞ୍ଜିମାର ଇତ୍ୟାଦି ଗାଁରେ ଧାନ ସମ୍ପୂର୍ଣ୍ଣ ମରିଗଲାଣି। ସୂଚନା ଅନୁସାରେ କୁସୁମପଡ଼ାର ଚାଷୀ ନେତରାମ ହରିଜନଙ୍କ ୨ ଏକର, ମହେଶ ରାମ ହରିଜନ ଦେଢ ଏକର, ତୁଳସି ରାମ ହରିଜନ ୨ ଏକର, ଭାସୁରାମ ହରିଜନ ୨ଏକର, ବିଶୁ ହରିଜନ ଅଢେଇ ଏକର, ରାମଧର କେଉଟ ୧ ଏକର, ମେଘରାଜ କେଉଟ ସାଢେ ୯ଏକର, ଖପେରାମ ସାହୁ ଦେଢ ଏକର, ବସ୍ତିନ ସାହୁ ୧ ଏକର, ହିରାଲାଲ ସାହୁ ୧ଏକର, ପବନ ସାହୁ ୧ଏକର ଜମିରେ ଧାନ ଚାଷ କରିଥିଲେ। ପତୋରା ଜଳସେଚନ ପ୍ରକଳ୍ପ ଶୁଖିଲା ପଡିଥିବାରୁ ପାଣି ଅଭାବରୁ ଧାନ ମରିଗଲାଣି। ଧାର କରଜ କରି ଧାନ ଚାଷ କରିଥିବା ଚାଷୀ ଋଣ ପରିଶୋଧ କରିବା ଚିନ୍ତାରେ ପଡି ଯାଇଛନ୍ତି। ଜିଲାସ୍ତରୀୟ ଜଳ ପରିଚାଳନା ବୈଠକରେ ଚଳିତ ରବି ଋତୁରେ ପତୋରା ଅପରଜୋଙ୍କ ଜଳସେଚନ ପ୍ରକଳ୍ପରୁ ମୋଟ ୧୯୫୧.୭ ହେକ୍ଟର ଜମିକୁ ଜଳ ଯୋଗାଇ ଦେବା ପାଇଁ ନିଷ୍ପତ୍ତି ହୋଇଥିଲା ା ସେଥିରୁ ୫୦ ପ୍ରତିଶତ ଧାନ ଓ ୫୦ ପ୍ରତିଶତ ଅଣଧାନ କରିବା ପାଇଁ ଆଲୋଚନା ହୋଇଥିଲା ା ହେଲେ ପ୍ରକୃତ ପକ୍ଷରେ ଧାର୍ଯ୍ୟଠାରୁ ଅଧିକ ୪ ହଜାର ହେକ୍ଟରରେ ଧାନ ଚାଷ ହେଉଛି ା ବୈଠକର ନିଷ୍ପତ୍ତି ଅନୁଯାୟୀ ଚାଷ ନ ହୋଇ ଧାର୍ଯ୍ୟଠାରୁ ଅଧିକ ଚାଷ କରିବା ପାଇଁ କିଏ ନିର୍ଦ୍ଦେଶ ଦେଲା ଏବଂ କାହା ସ୍ବାର୍ଥରେ ଜଳସେଚନ ବିଭାଗ ଅଧିକାରୀ ପାଣି ଯୋଗାଇଦେଲେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏଥିପାଇଁ ସମ୍ପୂର୍ଣ୍ଣ ଭାବରେ ବିଭାଗୀୟ ଯନ୍ତ୍ରୀ ହିଁ ଦାୟୀ ବୋଲି ଚାଷୀନେତା ଭକ୍ତବନ୍ଧୁ ଧରୁଆ ଅଭିଯୋଗ କରିଛନ୍ତି। ଏହାସହ ଜଳ ଆବଣ୍ଟନରେ ପାତରଅନ୍ତର କରିଥିବା ଅଧିକାରୀ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି ମରିଯାଇଥିବା ଧାନର କ୍ଷୟକ୍ଷତି ଆକଳନ କରି ସରକାରୀ ସହାୟତା ଯୋଗାଇ ଦେବା ପାଇଁ ଦାବି କରିଛନ୍ତି। ଏ ସମ୍ପର୍କରେ ଜିଲାପାଳ ମଧୁସୂଦନ ଦାଶଙ୍କୁ ପଚାରିବାରୁ ସେ ଧାର୍ଯ୍ୟଠାରୁ ଅଧିକ ଜମିରେ ଚାଷ ହୋଇଥିବା କାରଣରୁ ଡ୍ୟାମ୍ ପାଣି ଶୁଖିଯାଇଥିବା କଥାକୁ ସ୍ବୀକାର କରିବା ସହ ଯେଉଁ ଅଧିକାରୀ ଏଥିପାଇଁ ଦାୟୀ ତାଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ।
Dharitri – Odisha’s No.1 Odia Daily
