କଳିଙ୍ଗନଗର,୨୬ା୬(ଶୁଭାଶିଷ ରାଉତ): ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଦାନଗଦି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏକ ବୋର୍ଡ ଲଗାଯାଇଛି। ଏଥିରେ ଲେଖା ଅଛି ଔଷଧ ଖର୍ଚ୍ଚର ନାହିଁ ଭୟ, ଆମେ ସାଥେ ଅଛି ନିରାମୟ। ଏଭଳି ଏକ ବୋର୍ଡମାରି ବିଭାଗ ଲୋକଙ୍କୁ ଭୂଆଁ ବୁଲାଇ ଚାଲିଥିବା ଅଭିଯୋଗ ହୋଇଛି। କାରଣ ନିରାମୟରେ ମାଗଣାରେ ୨୪/୭ ଘଣ୍ଟିଆ ଔଷଧ ଯୋଗାଇ ଦେବାକୁ ବ୍ୟବସ୍ଥା ଥିଲେ ମଧ୍ୟ ଏଠାରେ ରୋଗୀ ପାଉନାହାନ୍ତି ମାଗଣା ଔଷଧ। ଏଠାରେ ୨୪ ଘଣ୍ଟା ନିରାମୟ ଔଷଧ କେନ୍ଦ୍ର ଖୋଲା ରହିବା ପରିବର୍ତ୍ତେ ମାତ୍ର ୬ ଘଣ୍ଟା ଖୋଲାଯାଉଛି, ଯାହାକି ସକାଳ ୮ରୁ ୧୨ ଓ ଅପରାହ୍ନରେ ୪ରୁ ୬ ଘଟିକା। ଏହି ସମୟରେ ଆଉଟଡୋରରେ ବସୁଥିବା ଡାକ୍ତରମାନେ ଯାହା ଔଷଧ ଲେଖୁଛନ୍ତି ତାହା ମଧ୍ୟ ଉପଲବ୍ଧ ଠିକ ଭାବେ ହେଉନାହିଁ। ଚିଠା ଦେଖି ରୋଗୀଙ୍କୁ ଔଷଧ ବିତରଣ କରିବା ପାଇଁ ଦାୟିତ୍ୱରେ ଥିବା ଜଣେ ମାତ୍ର ଫାର୍ମାସିଷ୍ଟ ଭିଡ ଯୋଗୁ ରୋଗୀଙ୍କୁ ଠିକ ଭାବେ ଔଷଧ ଯୋଗାଇ ଦେଉନାହାନ୍ତି। ଫଳରେ ରୋଗୀ ବାହାରୁ ଔଷଧ କିଣିବାକୁ ବାଧ୍ୟ ହେଉଛନ୍ତି। ଏହି ଡାକ୍ତରଖାନାଟି ଶିଳ୍ପାଞ୍ଚଳର ମୁଖ୍ୟ ଡାକ୍ତରଖାନା ହୋଇଥିବାରୁ ଏଠାକୁ ଦୈନିକ ବହୁ ଦୁର୍ଘଟଣା ଜନିତ ଅପରିଚିତ ରୋଗୀ ଆସିଥାନ୍ତି। ହେଲେ ସେମାନଙ୍କ ଚିକିତ୍ସା ପାଇଁ ଆବଶ୍ୟକ ଔଷଧ ଡାକ୍ତରଖାନାରୁ ନ ମିଳିବା ଫଳରେ ବହୁ ଅସୁବିଧା ହେଉଛି। ଏ ସମ୍ପର୍କରେ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡା. ଜ୍ୟୋତିରଞ୍ଜନ ମହାପାତ୍ରଙ୍କୁ ପଚାରିବାରୁ ସେ କହିଛନ୍ତି, ନିରାମୟ ଔଷଧ ୨୪ ଘଣ୍ଟିଆ ଯୋଗାଇବାକୁ ହେଲେ ଆଉ ୩ ଫାର୍ମାସିଷ୍ଟଙ୍କ ଆବଶ୍ୟକ ହେଉଛି। ଏବେ ମାତ୍ର ୨ ଫାର୍ମାସିଷ୍ଟ ଅଛନ୍ତି। ଜଣେ ନିରାମୟ କାଉଣ୍ଟରରେ ବସୁଛନ୍ତି, ଆଉ ଜଣେ ଷ୍ଟୋରରେ। ମୁଁ ଚିଠି ଲେଖି ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଜଣାଇଛି। ଖୁବ୍ଶୀଘ୍ର ଏହାର ସମାଧାନ କରାଯିବ।
