ନୂଆଦିଲ୍ଲୀ,୨।୪ : ପର୍ସନାଲ, ଜନ ଅଭିଯୋଗ, ଆଇନ ଏବଂ ନ୍ୟାୟ ଉପରେ ସଂସଦୀୟ ଷ୍ଟାଣ୍ଡିଂ କମିଟି କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲ (କ୍ୟାଟ)ଙ୍କୁ ୧୦ ବର୍ଷରୁ ଅଧିକ ସମୟ ବିଚାରାଧୀନ ଥିବା ମାମଲାର ବିଚାରକୁ ପ୍ରାଥମିକତା ଦେବାକୁ କହିଛନ୍ତି। ସଂସଦୀୟ କମିଟି ୧,୩୫୦ ଏଭଳି ମାମଲାକୁ ଚିହ୍ନଟ କରିଛନ୍ତି। କେନ୍ଦ୍ର ସରକାରୀ କର୍ମଚାରୀଙ୍କ ସେବା ସହ ଜଡିତ ବିଷୟ ଉପରେ କ୍ୟାଟ ନିଷ୍ପତ୍ତି ନେଇଥାନ୍ତି। ୩୧ ଡିସେମ୍ବର ୨୦୨୨ ସୁଦ୍ଧା ଟ୍ରିବ୍ୟୁନାଲର ବିଭିନ୍ନ ବେଞ୍ଚ ସମ୍ମୁଖରେ ୮୦,୫୪୫ ମାମଲା ବିଚାରାଧୀନ ଅଛି।
।ସଂସଦୀୟ ଷ୍ଟାଣ୍ଡିଂ କମିଟି ଏହାର ରିପୋର୍ଟରେ ଦର୍ଶାଇଛି ଯେ ଗୋଟିଏ ବର୍ଷ କିମ୍ବା ତା’ଠାରୁ କମ ସମୟ ଧରି ୧୬,୬୬୧ ମାମଲା ବିଚାରାଧୀନ ମାମଲା ରହିଥିବାବେଳେ ଗୋଟିଏ ରୁ ପାଞ୍ଚ ବର୍ଷ ଧରି ଚାଲିଥିବା ବିଚାର ମାମଲା ସଂଖ୍ୟା ୪୬,୫୩୪ ରହିଛି। ପାଞ୍ଚରୁ ୧୦ ବର୍ଷ ଧରି ବିଚାର ହେଉଥିବା ମାମଲା ସଂଖ୍ୟା ୧୬ ହଜାର ରହିଛି। ୧୦ ବର୍ଷରୁ ଅଧିକ ସମୟ ଧରି ୧,୩୫୦ ମାମଲା ବିଚାରାଧୀନ ଅଛି। କମିଟି ସୂଚାଇ ଦେଇଛି ଯେ କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲ ନିୟମ ୧୯୮୭ ଅନୁଯାୟୀ ଯଥାସମ୍ଭବ ପ୍ରତ୍ୟେକ ଆବେଦନ ଶୁଣାଣି ହେବା ଉଚିତ ଏବଂ ଦାଖଲ ତାରିଖଠାରୁ ଛଅ ମାସ ମଧ୍ୟରେ ନିଷ୍ପତ୍ତି ନିଆଯିବା ଜରୁରୀ। ରିପୋର୍ଟରେ କୁହାଯାଇଛି, କମିଟି ଜାଣିବାକୁ ପାଇଛି ଯେ ପ୍ରାୟ ୧,୩୫୦ ମାମଲା ୧୦ବର୍ଷରୁ ଅଧିକ ସମୟ ବିଚାରାଧୀନ ଅଛି। କମିଟି ଏହା ମଧ୍ୟ ଜାଣିବାକୁ ପାଇଛି ଯେ ପେନ୍ସନ ସହ ଜଡିତ ପ୍ରାୟ ୩,୭୧୬ ମାମଲା ଟ୍ରିବ୍ୟୁନାଲରେ ବିଚାରାଧୀନ ଅଛି।
ରିପୋର୍ଟରେ କୁହାଯାଇଛି ଯେ ପେନ୍ସନ, ବରିଷ୍ଠ ନାଗରିକଙ୍କ ସହ ଜଡିତ ମାମଲା ଏବଂ ପ୍ରାଥମିକତା ଭିତ୍ତିରେ ୧୦ ବର୍ଷରୁ ଅଧିକ ସମୟ ବିଚାରାଧୀନ ମାମଲା ଏବଂ ଆବଶ୍ୟକ ସ୍ଥଳେ ଏକ ସ୍ବତନ୍ତ୍ର ଡ୍ରାଇଭ ଆରମ୍ଭ କରିବାକୁ କମିଟି ସୁପାରିଶ କରିଛି।
