ନୂଆଦିଲ୍ଲୀ,୨୫।୫: ଦେଶର ନୂଆ ସଂସଦ ଭବନ ଭାବେ ଲୋକତନ୍ତ୍ରକୁ ନୂଆ ମନ୍ଦିର ମିଳିବାକୁ ଯାଉଛି। ମେ ୨୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାକୁ ଉଦଘାଟନ କରିବେ। ଏବେ ପ୍ରାୟ ସମସ୍ତ ବିରୋଧୀ ଦଳ ଏହାର ଉଦଘାଟନ ରାଷ୍ଟ୍ରପତିଙ୍କ ଦ୍ୱାରା କରାଯାଉ ବୋଲି ଅଡି ବସିଛନ୍ତି। ଏହି କ୍ରମରେ ୧୯ଟି ବିରୋଧୀ ଦଳ ମଧ୍ୟ ଉଦଘାଟନୀ ସମାରୋହକୁ ବଇକଟ କରିବାକୁ ଘୋଷଣା କରିଛନ୍ତି। ଯେଉଁଥିରେ କଂଗ୍ରେସ ମଧ୍ୟ ଅନ୍ତର୍ଭୁକ୍ତ ହୋଇଛି, ହେଲେ ଏବେ କଂଗ୍ରେସର ଜଣେ ନେତା ଏହି ବିରୋଧକୁ ନେଇ ପ୍ରଶ୍ନ ଉଠାଇଛନ୍ତି। ଆଚାର୍ଯ୍ୟ ପ୍ରମୋଦ କୃଷ୍ଣ କହିଛନ୍ତି ଯେ ଯଦି ଭାରତର ପ୍ରଧାନମନ୍ତ୍ରୀ ସଂସଦ ଗୃହର ଉଦଘାଟନ ନକରନ୍ତି, ତେବେ କ’ଣ ପାକିସ୍ତାନର ପ୍ରଧାନମନ୍ତ୍ରୀ ଏହାକୁ ଉଦଘାଟନ କରିବେ।
କଂଗ୍ରେସ ନେତା ଆଚାର୍ଯ୍ୟ ପ୍ରମୋଦ କୃଷ୍ଣ ବିରୋଧୀ ଦଳର ଆଭିମୁଖ୍ୟକୁ ବିରୋଧ କରି କହିଛନ୍ତି ଯେ ଭାରତର ସଂସଦ ହେଉଛି ଭାରତରଐତିହ୍ୟ, ଭାରତୀୟ ଜନତା ପାର୍ଟି(ଭାଜପା)ର ନୁହେଁ … ଯଦି ଭାରତର ପ୍ରଧାନମନ୍ତ୍ରୀ ଦେଶର ସଂସଦର ଉଦଘାଟନ ନ କରନ୍ତି, ତେବେ କ’ଣ ପାକିସ୍ତାନର ପ୍ରଧାନମନ୍ତ୍ରୀ ଏହାକୁ ଉଦଘାଟନ କରିବେ। ସଂସଦ ଭବନ, ରାଷ୍ଟ୍ରପତି ଭବନ ଏଭଳି ଅଟ୍ଟାଳିକା ଯାହା କୌଣସି ଦଳର ନୁହେଁ। ଏସବୁ ଦେଶର ସମ୍ପତ୍ତି। ପ୍ରଧାନମନ୍ତ୍ରୀଙ୍କ ନୀତିକୁ ବିରୋଧ କରିବା ଉଚିତ, ଆମେ କରିବା ଉଚିତ, ଆମେ ଏହା ସବୁଠାରେ କରିବୁ। କିନ୍ତୁ ଦେଶର ଲୋକଙ୍କ ଭାବନାକୁ ସମ୍ମାନ ଦେଇ, ଆମ ପାଖରେ ମୋଦିଙ୍କୁ ବିରୋଧ କରିବାର ଅଧିକାର ଅଛି, କିନ୍ତୁ ଦେଶକୁ ବିରୋଧ କରିବା ଠିକ ନୁହେଁ।
ବିରୋଧୀମାନେ ଓୱାଇସିଙ୍କ ପଥ ଅନୁସରଣ କରିବା ଉଚିତ ନୁହେଁ । ଆଚାର୍ଯ୍ୟ ପ୍ରମୋଦ କୃଷ୍ଣ ବିରୋଧୀ ଦଳମାନଙ୍କୁ କହିଛନ୍ତି, ମୁଁ ସେମାନଙ୍କର ନିଷ୍ପତ୍ତି ଉପରେ ପୁନର୍ବିଚାର କରିବାକୁ ସମସ୍ତ ପକ୍ଷଙ୍କୁ ନିବେଦନ କରୁଛି। ମୋଦିଙ୍କୁ ବିରୋଧ କରନ୍ତୁ, ଦେଶକୁ ବିରୋଧ କରିବା ଠିକ ନୁହେଁ। ଦେଶର ସଂସଦ ସମଗ୍ର ଦେଶର ଏବଂ କୌ ଣସି ଦଳର ନୁହେଁ। ଦେଶର ସଂସଦକୁ ଭାଜପାର ବୋଲି ଭାବିବା ଭୁଲ। ସେଥିପାଇଁ ମୁଁ ଅନୁରୋଧ କରୁଛି ଯେ ସମସ୍ତ ବିରୋଧୀ ଓୱାଇସିଙ୍କ ପଥ ଅନୁସରଣ କରନ୍ତୁ ନାହିଁ।
