ବରଗଡ଼ ଅଫିସ,୮ା୧୨: ପଦ୍ମପୁର ଉପନିର୍ବାଚନରେ ବାଜି ମାରିଛନ୍ତି ବିଜେଡି ପ୍ରାର୍ଥିନୀ ବର୍ଷା ସିଂ ବରିହା। ଅନ୍ତିମ ୨୩ ରାଉଣ୍ଡ ସୁଦ୍ଧା ବର୍ଷାଙ୍କୁ ୧,୧୯,୫୧୨ ଖଣ୍ଡ ଭୋଟ୍ ମିଳିଥିବା ବେଳେ ଭାଜପା ପ୍ରାର୍ଥୀ ପ୍ରଦୀପ ପୁରୋହିତ ୭୭,୪୪୭ ଖଣ୍ଡ ଭୋଟ୍ ପାଇଛନ୍ତି। ଏଥିସହିତ ବର୍ଷାଙ୍କୁ ୧୩୫ ଖଣ୍ଡ ପୋଷ୍ଟାଲ ବାଲଟ ଭୋଟ୍, ପ୍ରଦୀପଙ୍କୁ ୯୪ ଖଣ୍ଡ ଏବଂ କଂଗ୍ରେସକୁ ୧୩ ଖଣ୍ଡ ପୋଷ୍ଟାଲ ବାଲଟ ଭୋଟ୍ ମିଳିଛି। ସେହିପରି ଏକ୍ସଟ୍ରା ୨ଟି ମେଶିନ୍ ଭୋଟ୍ ମିଶି ବର୍ଷାଙ୍କୁ ମୋଟ୍ ୧,୨୦,୮୧୬ ଖଣ୍ଡ ଭୋଟ୍ ମିଳିଥିବା ବେଳେ ପ୍ରଦୀପଙ୍କୁ ୭୮,୧୩୭ ଖଣ୍ଡ ମିଳିଛି। ତେବେ ୪୨,୬୭୯ ଖଣ୍ଡ ଭୋଟ୍ରେ ପ୍ରଦୀପ ପରାସ୍ତ ହୋଇଛନ୍ତି। ଗଣତି ଆରମ୍ଭରୁ ହିଁ ବର୍ଷା ବହୁ ଭୋଟ୍ରେ ଆଗରେ ଥିଲେ। କୌଣସି ରାଉଣ୍ଡରେ ଭାଜପା ବିଜେଡିକୁ ଟପି ଆଗକୁ ଯାଇ ପାରି ନ ଥିଲା। ସେହିପରି କଂଗ୍ରେସର ସ୍ଥିତି ଅତ୍ୟନ୍ତ ଖରାପ ଥିଲା। କଂଗ୍ରେସକୁ ମାତ୍ର ୩,୫୯୪ ଖଣ୍ଡ ଭୋଟ୍ ମିଳିଛି।
