ଆନନ୍ଦପୁର,୧୪ା୩(ସ୍ବ.ପ୍ର.): ମାଟ୍ରିକ୍ ପରୀକ୍ଷାର୍ଥୀଙ୍କୁ ସମ୍ଭାବ୍ୟ ପ୍ରଶ୍ନର ଉତ୍ତର କପି ମାଇକ୍ରୋ ଜେରକ୍ସ ମାଧ୍ୟରେ ଦିଆଯାଉଥିବା ଅଭିଯୋଗକୁ ଆଧାର କରି ସୋମବାର ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଆନନ୍ଦପୁର ଉପଜିଲାପାଳ ଅନୀଲ କୁମାର ସେଠୀ, ଏସ୍ଡିପିଓ ପ୍ରଶାନ୍ତ କୁମାର ବେହେରା ବିଭିନ୍ନ ପରୀକ୍ଷା କେନ୍ଦ୍ର ପରିଦର୍ଶନ ପୂର୍ବକ ନିକଟରେ ଥିବା ଜେରକ୍ସ ଦୋକାନ ୧୦ଟା ପରେ ଖୋଲିବାକୁ ନିର୍ଦ୍ଦେଶ ଦେଇଥିଲେ। ଏ ନେଇ ସ୍ବତନ୍ତ୍ର ନୋଟିସ୍ ଜାରି ହୋଇଛି।
ଉପଜିଲାପାଳ ଓ ଏସ୍ଡିପିଓ ଆନନ୍ଦପୁର ସରକାରୀ ବାଳିକା ଉଚ୍ଚ ବିଦ୍ୟାଳୟ ଓ ଆନନ୍ଦପୁର ବିଏନ ହାଇସ୍କୁଲ କେନ୍ଦ୍ର ପରିଦର୍ଶନ କରିବା ସମୟରେ ନିକଟରେ ଥିବା ଏକ ଜେରକ୍ସ ଦୋକାନ ଉପରେ ଚଢ଼ାଉ କରିଥିଲେ। ପରୀକ୍ଷା ସମ୍ପର୍କିତ ଆପତିଜନକ ସାମଗ୍ରୀ ଦେଖିବା ପରେ ଦୋକାନୀକୁ କିଛି ଘଣ୍ଟା ଥାନାରେ ଅଟକ ରଖାଯାଇଥିଲା। ମାଟ୍ରିକ ପରୀକ୍ଷାର ସ୍ବଚ୍ଛତାକୁ ଦୃଷ୍ଟିରେ ରଖି ପରୀକ୍ଷା ଚାଲିଥିବା ପର୍ଯ୍ୟନ୍ତ ଅର୍ଥାତ୍ ୨୦ମାର୍ଚ୍ଚ ୨୦୨୩ ପର୍ଯ୍ୟନ୍ତ ପରୀକ୍ଷା କେନ୍ଦ୍ରର ଦୁଇ କି.ମି ଦୂରରେ ଥିବା ଜେରକ୍ସ ଦୋକାନୀ ସକାଳ ୧୦ଟା ପରେ ଦୋକାନ ଖୋଲିବାକୁ ନିର୍ଦ୍ଦେଶନାମା ଜାରି ହୋଇଛି। ଉପଜିଲାପାଳ ଓ ଉପଖଣ୍ଡ ମାଜିଷ୍ଟ୍ରେଟଙ୍କ ଦ୍ୱାରା ୨୦ ତାରିଖ ପର୍ଯ୍ୟନ୍ତ ସ୍ବତନ୍ତ୍ର ନୋଟିସ୍ ଜାରି କରାଯାଇଛି। ନିୟମ ଉଲ୍ଲଘଂନ କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ ଚେତାବନୀ ଦେଇଛନ୍ତି।
