କେସିଙ୍ଗା,୨।୬(ଡି.ଏନ.ଏ.): କଳାହାଣ୍ଡି ଜିଲା କେସିଙ୍ଗା ସହରରେ ୧୯୭୦ରେ ପ୍ରାଣୀ ଚିକିତ୍ସାଳୟ ସ୍ଥାପିତ ହୋଇଛି। ଦୀର୍ଘ ୫୩ ବର୍ଷ ହେଲା ରକ୍ଷଣାବେକ୍ଷଣ ଅଭବାରୁ ପ୍ରାଣୀ ଚିକିତ୍ସାଳୟ ପରିସରରେ ଥିବା ସରକାରୀ ଗୃହଗୁଡ଼ିକ ଉଈ ଲାଗି କବାଟ, ଝରକା, ଘର ଛାତ ଭୁଶୁଡି ପଡୁଛି। କର୍ମଚାରୀଙ୍କ ରହିବା ପାଇଁ ଆବଶ୍ୟକ ଗୃହ ନ ଥିବାରୁ ସେମାନେ ଭଡାରେ ରହି ପ୍ରାଣୀମାନଙ୍କ ଚିକିତ୍ସା କରି ଆସୁଛନ୍ତି। ଘରଗୁଡିକ ବିପଦଶଙ୍କୁଳ ଅବସ୍ଥାରେ ପଡି ରହିଛି। ଘର ଚତୁପାଶର୍ବରେ ଭାଙ୍ଗି ଯାଇଛି। ଏହି ସବୁ ସମସ୍ୟା ଦେଖି କେସିଙ୍ଗାବାସୀ ଓ ବୁଦ୍ଧିଜୀବୀମାନେ ନୂତନ ଗୋଷ୍ଠୀ ପ୍ରାଣୀ ଚିକିତ୍ସାଳୟ ନିର୍ମାଣ ପାଇଁ ରାଜ୍ୟ ସରକାରଙ୍କ ନିକଟରେ ଦାବି କରିଥିଲେ। ପରେ ରାଜ୍ୟ ସରକାର ନୂତନ ଏକ ଗୋଷ୍ଠୀ ପ୍ରାଣୀ ଚିକିତ୍ସାଳୟ ନିର୍ମାଣ ପାଇଁ ୫୦ଲକ୍ଷ ଅର୍ଥ ମଞ୍ଜୁର କରିଛନ୍ତି। ଏହି ଗୋଷ୍ଠୀ ପ୍ରାଣୀ ଚିକିତ୍ସାଳୟ ନିର୍ମାଣ ପାଇଁ ଭୁବନେଶ୍ୱରର ଜଣେ ଠିକାଦାରଙ୍କୁ ଟେଣ୍ଡର ପ୍ରଦାନ କରାଯାଇଛି। ଗତ ଫେବୃୟାରୀରେ ଗୋଷ୍ଠୀ ପ୍ରାଣୀ ଚିକିତ୍ସାଳୟ ନିର୍ମାଣ କାର୍ଯ୍ୟ ଆରମ୍ଭ କରାଯାଇଛି। କୌଣସି କାରଣରୁ ଠିକାଦାର ନିର୍ମାଣ କାର୍ଯ୍ୟରେ ବିଳମ୍ବ କରିବାରୁ ରାଜ୍ୟ ସରକାର ସିଡିଭିଓମାନଙ୍କୁ ଦୁଇ ମାସ ମଧ୍ୟରେ କାମ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି। ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁସରଣ କରି କଳାହାଣ୍ଡି ସିଡିଭିଓ ଆସନ୍ତା ଦୁଇ ମାସ ମଧ୍ୟରେ ନିର୍ମାଣ କାର୍ଯ୍ୟ ଶେଷ କରିବା ପାଇଁ ଠିକାଦାରଙ୍କୁ ତାଗିତ କରିଛନ୍ତି। ସୂଚନାଯୋଗ୍ୟ ଯେ, କେସିଙ୍ଗା ବ୍ଲକରେ ୨୫ ହଜାର ଗାଈବଳଦ ଥିବା ବେଳେ ମଇଁଷି ୫୦୦, ଛେଳି ୨୪ ହଜାର, ମେଣ୍ଢା ୪୫୦୦, କୁକୁଡ଼ା ଓ ବତକ ୧ ଲକ୍ଷ୨୦ ହଜାର, ଘୁଷୁରୀ ୧୦୦, ବୟଲର କୁକୁଡ଼ା ୧ ଲକ୍ଷ ଅଛନ୍ତି। ଚାଷୀମାନେ ଗାଈ, ବଳଦ, ଛେଳି, ମେଣ୍ଢା ଚିକିତ୍ସା ପାଇଁ ପ୍ରାଣି ଚିକିତ୍ସାଳୟକୁ ଆଣିଲେ ଖରା ବର୍ଷାଋତୁରେ ଚାଷୀମାନେ ରହିବା ପାଇଁ ଜାଗା ନ ଥିବାରୁ ବହୁତ ଅସୁବିଧାର ସମ୍ମୁଖୀନ ହେଉଛନ୍ତି। ଏହି ସବୁ ସମସ୍ୟା ଦୂର ପାଇଁ ଯୁଦ୍ଧକାଳୀନ ଭିତ୍ତିରେ ୨ ମାସ ମଧ୍ୟରେ ଶେଷ କରିବାକୁ ଠିକାଦାରଙ୍କୁ ସିଡିଭିଓ ନିର୍ଦ୍ଦେଶ ଦେଇଥିବା ଜଣାପଡିଛି। ଏ ନେଇ ସିଡିଭିଓ ଡ଼.ହେମନ୍ତ କୁମାର ପ୍ରଧାନଙ୍କୁ ପଚାରିବାରୁ ରାଜ୍ୟ ସରକାର ନିର୍ଦ୍ଦେଶ ଅନୁଯାୟୀ ଅତିଶୀଘ୍ର ଗୋଷ୍ଠୀ ପ୍ରାଣୀ ଚିକିତ୍ସାଳୟ ଶେଷ କରିବାକୁ ଠିକାଦାରଙ୍କୁ କୁହାଯାଇଛି ବୋଲି ପ୍ରକାଶ କରିଥିଲେ।
