କେନ୍ଦୁଝର,୧୧।୪(ସ୍ବ.ପ୍ର.): କେନ୍ଦୁଝରଗଡ଼ ପୌରପାଳିକାର ସଫେଇ କାମ ଏକ କଳା ତାଲିକାଭୁକ୍ତ ସଂସ୍ଥାକୁ ଦିଆଯାଇଛି। ଉକ୍ତ ସଂସ୍ଥା କର୍ମଚାରୀଙ୍କୁ କମ ଦରମା ଦେଉଥିବା ବେଳେ ସେମାନଙ୍କଠାରୁ କଟାଯାଉଥିବା ଇପିପିଏଫ ଓ ଇଏସ୍ଆଇ ଆଦି ବାବଦକୁ ଅର୍ଥ ଠିକ୍ ଭାବେ ଜମା କରୁନି। ସଫେଇ କର୍ମଚାରୀଙ୍କ ପ୍ରାପ୍ୟ ହେରଫେର କରୁଥିଲେ ହେଁ ଦୀର୍ଘ ବର୍ଷ ହେଲା କାହିଁକି ଉକ୍ତ ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ ବୋଲି ପୂର୍ବତନ ବିଧାୟକ ସୁବର୍ଣ୍ଣ ନାୟକ ପ୍ରଶ୍ନ କରିଛନ୍ତି। ଏ ନେଇ ଜିଲାପାଳଙ୍କୁ ଏକ ଲିଖିତ ଅଭିଯୋଗ ମଧ୍ୟ କରିଛନ୍ତି। ଅଭିଯୋଗ ପରେ ଜିଲାପାଳ ତଦନ୍ତ ନିର୍ଦ୍ଦେଶ ଦେଇଥିବା ଜଣାପଡ଼ିଛି।
ଅଭିଯୋଗ ଅନୁଯାୟୀ, ଉକ୍ତ ସଂସ୍ଥା ପୂର୍ବରୁ ଅନ୍ୟ ଜିଲାରେ ସଫେଇ କାମ କରୁଥିବା କର୍ମଚାରୀଙ୍କ ଇପିଏଫ, ଇଏସ୍ଆଇ, ଜିଏସ୍ଟି ବାବଦକୁ ଅର୍ଥ ଜମା ନ କରି ଅର୍ଥ ହେରଫେର କରିଥିଲା। ଫଳରେ ବ୍ଲାକ୍ ଲିଷ୍ଟ ହୋଇଛି। ତେବେ ସ୍ଥାନୀୟ ଠିକା ସଂସ୍ଥାକୁ କାମ ନ ଦେଇ କିଭଳି ଏଭଳି ବ୍ଲାକ୍ ଲିଷ୍ଟ ହୋଇଥିବା ସଂସ୍ଥାକୁ କାମ ଦିଆଯାଇଛି ତାହା ତଦନ୍ତ ସାପେକ୍ଷ। ବ୍ୟାପକ ଅର୍ଥ କାରବାର ହେଉଥିବାରୁ ଏଭଳି ଘଟଣାକୁ ଚପାଇ ଦିଆଯାଇ କାର୍ଯ୍ୟାଦେଶ ଦିଆଯାଇଥିବା ଅଭିଯୋଗ ହେଉଛି। ଉକ୍ତ ସଂସ୍ଥ ସଫେଇ କର୍ମଚାରୀମାନଙ୍କୁ ସ୍ବଳ୍ପ ମଜୁରି ଦେଉଥିବା ବେଳେ ସେମାନଙ୍କଠାରୁ ଇପିଏଫ(ଏମ୍ପ୍ଲଇ ପ୍ରୋଭିଣ୍ଡେଣ୍ଟ ଫଣ୍ଡ), ଇଏସ୍ଆଇ( ଏମ୍ପ୍ଲଇଜ୍ ଷ୍ଟେଟ୍ ଇନ୍ସ୍ୟୁରାନ୍ସ କର୍ପୋରେସନ) ବାବଦକୁ କଟାଯାଉଥିବା ଅର୍ଥର ଠିକ୍ ଭାବେ ଜମା ହେଉ ନ ଥିଲେ ବି ପୌରପ୍ରଶାସନ ଓ ଶ୍ରମ ବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ। କାମ ହରାଇବା ଭୟରେ କର୍ମଚାରୀମାନେ ମୁହଁ ଖୋଲି ପାରୁନହାନ୍ତି। ଏଥିସହ ଉପଯୁକ୍ତ ତଦାରଖ ଅଭାବରୁ ଆଗଭଳି ସଫେଇ ମଧ୍ୟ ଠିକ୍ ଭାବେ ହେଉନାହିଁ। ସହର ସାରା କୁଢ଼କୁଢ଼ ଆବର୍ଜନା ଜମା ହୋଇରହୁଛି। ଫଳରେ ପ୍ରଦୂଷିତ ପରିବେଶ ସୃଷ୍ଟି କରୁଛି। ଅଧ୍ୟକ୍ଷା, କାଉନ୍ସିଲରଙ୍କ ଭଳି ଲୋକ ପ୍ରତିନିଧିମାନେ ମଧ୍ୟ କର୍ମଚାରୀମାନଙ୍କ ସମସ୍ୟାକୁ ଅଣଦେଖା କରିବାକୁ ନେଇ ଉଦ୍ବେଗ ପ୍ରକାଶ ପାଉଛି। ପ୍ରତ୍ୟେକ କର୍ମଚାରୀଙ୍କଠାରୁ ମାସିକ ଏକ ହଜାରରୁ ଦେଢ଼ ହଜାର ପର୍ଯ୍ୟନ୍ତ ଝାଳବୁହା ଟଙ୍କା ହଡ଼ପ ହେଉଥିବାରୁ ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପୂର୍ବତନ ବିଧାୟକ ଦାବି କରିଛନ୍ତି।
ସେହିପରି ପୌରାଞ୍ଚଳରେ କାମ କରୁଥିବା ସଫେଇ କର୍ମଚାରୀଙ୍କୁ ହାତ ଗ୍ଲୋଭସ, ମାସ୍କ, ଜୋତା ମିଳୁନାହିଁ। ଜିଲା ମୁଖ୍ୟାଳୟରେ ଜିଲାପାଳ, ଅତିରିକ୍ତ ଜିଲାପାଳଙ୍କ ଭଳି ବରିଷ୍ଠ ପଦାଧିକାରୀମାନେ ଯାତାୟାତ କରି ଦେଖୁଥିଲେ ହେଁ ସଫେଇ କର୍ମଚାରୀଙ୍କ ପ୍ରତି ଦୟା ମନୋଭାବ ପ୍ରଦର୍ଶନ କରୁ ନ ଥିବା ଅତ୍ୟନ୍ତ ଦୁଃଖଦ ବିଷୟ ବୋଲି ସାମାଜିକ କର୍ମୀ ଦିଲ୍ଲୀପ ସାହୁ କହିଛନ୍ତି। ନିର୍ବାହୀ ଅଧିକାରୀ ଦାୟିତ୍ୱରେ ଥିବା ଧିମନ ଚକମା (ଆଇଏଏସ) କହିଛନ୍ତି, ଏ ନେଇ ସେ ତଦନ୍ତ କରି ପଦକ୍ଷେପ ନେବେ ା
