ନୂଆଦିଲ୍ଲୀ,୮ା୧୨: ସଂସଦର ଶୀତ ଅଧିବେଶନ ଆରମ୍ଭ ପୂର୍ବରୁ ବୁଧବାର ପୂର୍ବାହ୍ନରେ ମୁଖ୍ୟ ବିରୋଧୀ ଦଳ କଂଗ୍ରେସ ପକ୍ଷରୁ ଆୟୋଜିତ ସମଭାବାପନ୍ନ ଦଳଗୁଡ଼ିକର ବୈଠକରେ ଭାଗ ନେଇଛନ୍ତି ଆମ୍ ଆଦ୍ମୀ ପାର୍ଟି (ଏଏପି) ଏବଂ ତୃଣମୂଳ କଂଗ୍ରେସ (ଟିଏମ୍ସି)। କଂଗ୍ରେସ ସଭାପତି ତଥା ଦଳର ରାଜ୍ୟ ସଭା ନେତା ମଲ୍ଲିକାର୍ଜ୍ଜୁନ ଖାର୍ଗେ ଏହି ବୈଠକ ଡାକିଥିଲେ। ଏଥିରେ ଏଏପି ଏବଂ ଟିଏମ୍ସି ସମେତ ବାମଦଳ, ଡିଏମ୍କେ, ଆର୍ଜେଡି, ଏନ୍ସିପି, ଏନ୍ସି ଏବଂ ଆରଏସ୍ପିର ନେତାମାନେ ଯୋଗଦେଇଥିଲେ। ବୈଠକ ପରେ ଖାର୍ଗେ ଟୁଇଟ୍ କରି କହିଛନ୍ତି, ସଂସଦ ହେଉଛି ଗଣତାନ୍ତ୍ରିକ ବିଚାରର ଗୃହ। ଆମ ଭଳି ସମାନ ଚିନ୍ତାଧାରା ଦଳଗୁଡ଼ିକ ପକ୍ଷରୁ ଲୋକଙ୍କ ସହ ଜଡ଼ିତ ସମସ୍ତ ପ୍ରସଙ୍ଗକୁ ଦୃଢ଼ ଭାବରେ ଉଠାଇବୁ। ତେବେ ଆଲୋଚନାରେ ଅଂଶଗ୍ରହଣ ପାଇଁ ବିରୋଧୀଙ୍କୁ ଅଧିକ ସୁଯୋଗ ମିଳିବା ଉଚିତ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ତେଣୁ ସରକାର ତାଙ୍କ କଥା ଅନୁଯାୟୀ କାର୍ଯ୍ୟ କରିବେ ବୋଲି ଆମେ ଆଶା କରୁଛୁ।
ଖାର୍ଗେ ତାଙ୍କ ଟୁଇଟ୍ରେ ଉଲ୍ଲେଖ କରିଛନ୍ତି ଯେ ଯଦି ଆଇନ ତରବରିଆ ଭାବେ କରାଯାଏ, ତେବେ ତାହା ନ୍ୟାୟିକ ଯାଞ୍ଚ ପରିସରକୁ ଆସିବା ଉଚିତ। ତେଣୁ ଆମେ ଆଶା କରୁଛୁ ଯେ, ସମସ୍ତ ଗୁରୁତ୍ୱପୂର୍ଣ୍ଣ ବିଲ୍ ଉପଯୁକ୍ତ କମିଟି ନିକଟକୁ ପଠାଯିବା ଉଚିତ, ଯେଉଁଠି ଉକ୍ତ ବିଲ୍ଗୁଡ଼ିକ ଉପରେ ଉତ୍ତମ ତର୍ଜମା ହୋଇପାରିବ।
ସୂଚନାଥାଉ କି, ଦୀର୍ଘ ଦିନ ଧରି ଉଭୟ ଏଏପି ଏବଂ ଟିଏମ୍ସି କଂଗ୍ରେସଠାରୁ ଦୂରରେ ରହି ଆସୁଥିଲେ। ଗତ ମୌସୁମୀ ଅଧିବେଶନ ସମୟରେ କଂଗ୍ରେସ ନେତୃତ୍ୱାଧୀନ କାର୍ଯ୍ୟକଳାପକୁ ଉଭୟ ଦଳ ସମର୍ଥନ କରୁ ନ ଥିବା ଦେଖିବାକୁ ମିଳିଥିଲା। ଏଏପି ଏବଂ ଟିଏମ୍ସି ପକ୍ଷରୁ ପୃଥକ୍ ଭାବେ ସରକାର ବିରୋଧୀ ବିକ୍ଷୋଭ, ଆଲୋଚନା ଆଦି କରାଯାଇଥିଲା। ଏବେ ଉଭୟ ଦଳ ଖାର୍ଗେଙ୍କ ବୈଠକରେ ଯୋଗଦେଇଥିବାରୁ ଏହାର ଅନେକ ଦିଗ ଉପରେ ଆଲୋଚନା ହେଉଛି।
