ଶିମଲା,୮।୧୨ : ହିମାଚଳ ପ୍ରଦେଶ ବିଧାନସଭା ନିର୍ବାଚନ ଫଳାଫଳରେ ରାଜ୍ୟର ୬୮ ବିଧାନସଭା ଆସନ ମଧ୍ୟରୁ ଭାଜପା ୨୭ ଆସନରେ ଆଗୁଆ ଥିବାବେଳେ କଂଗ୍ରେସ ୩୮ ଆସନରେ ଆଗୁଆ ରହିଛି। ସେହିପରି ଅନ୍ୟାନ୍ୟ ୪ ଆସନରେ ଆଗୁଆ ରହିଛନ୍ତି। ରାଜ୍ୟରେ ଭାଜପା ଏବଂ କଂଗ୍ରେସ ମଧ୍ୟରେ କଡ଼ା ଟକ୍କର ଦେଖିବାକୁ ମିଳୁଛି। ଭାଜପା ପ୍ରାର୍ଥୀ ମୁଖ୍ୟମନ୍ତ୍ରୀ ଜୟରାମ ଠାକୁର ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ତେବେ କଂଗ୍ରେସ ଧିରେଧିରେ ସଂଖ୍ୟାଗରିଷ୍ଠତା ମୁହାଁ ହେବାରେ ଲାଗିଛି।
ରାଜ୍ୟରେ ସରକାର ଗଠନ ପାଇଁ ମ୍ୟାଜିକ ନମ୍ବର ୩୫ ରହିଛି। କଂଗ୍ରେସ ଏହି ମ୍ୟାଜିକ ନମ୍ବର ହାତେଇବାର ନିକଟତର ହେବାରେ ଲାଗିଛି।
ତେବେ କଡ଼ା ଟକ୍କର ମଧ୍ୟରେ କଂଗ୍ରେସକୁ ଅପରେଶନ ଲୋଟସ ଭୟ ଘାରିଛି। ଘୋଡା ବେପାରକୁ ନେଇ କଂଗ୍ରେସ ଭୟଭୀତ ହେଉଥିବା ଜଣାଯାଇଛି। ବିଧାୟକମାନଙ୍କୁ ଅଟକାଇବା ପାଇଁ କଂଗ୍ରେସ ଏଆଇସିସି ସଚିବଙ୍କୁ ନିୟୋଜିତ କରିଛି।
ଏହା ସହିତ କଂଗ୍ରେସ ନିଜର ବିଧାୟକମାନଙ୍କୁ ଏକ ସୁରକ୍ଷିତ ସ୍ଥାନକୁ ନେବା ପାଇଁ ଯୋଜନା ମଧ୍ୟ କରୁଛି। ଖବର ଅନୁଯାୟୀ, ଏହି ଆଶଙ୍କା ତଥା ତଥାକଥିତ ଅପରେଶନ ଲୋଟସକୁ ଦୃଷ୍ଟିରେ ରଖି କଂଗ୍ରେସ ବିଧାୟକମାନଙ୍କୁ ହିମାଚଳ ପ୍ରଦେଶରୁ ରାଜସ୍ଥାନକୁ ପଠାଇବାକୁ କଂଗ୍ରେସ ଯୋଜନା କରିଛି। ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବଘେଲ ଏବଂ ବରିଷ୍ଠ ନେତା ଭୁପେନ୍ଦ୍ର ସିଂ ହୁଡାଙ୍କୁ ଏହି ଦାୟିତ୍ୱ ଦିଆଯାଇଛି।
ସୂଚନାନୁସାରେ, କଂଗ୍ରେସର ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ବ୍ୟକ୍ତିଗତ ଭାବେ ପରିସ୍ଥିତି ଉପରେ ନଜର ରଖିଛନ୍ତି ଏବଂ ସେ ଗୁରୁବାର ଶିମଲାରେ ମଧ୍ୟ ପହଞ୍ଚିବେ ବୋଲି ଆଶା କରାଯାଉଛି।
