ଆନନ୍ଦପୁର/ହାଟଡିହୀ/ଛେନାପଦୀ, ୧୯।୫ (ସୁଶାନ୍ତ କୁମାର ସାହୁ / ଶୁଭକାନ୍ତ ନାୟକ / ନିରାକାର ପରିଡା): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡରେ “ଅପରେସନ ବୈତରଣୀ” କାର୍ଯ୍ୟାନୁଷ୍ଠାନରେ ୧୦ ଜଣ ବାଲି ମାଫିଆ ଓ ବ୍ୟବସାୟୀଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି।
ଆନନ୍ଦପୁର ଏସଡିପିଓ କମଳ କୁମାର ପଣ୍ଡାଙ୍କ ସୂଚନା ଅନୁଯାୟୀ, ନନ୍ଦିପଦା ଥାନାରେ ଦାୟର ହୋଇଥିବା ମାମଲା ନଂ ୧୯୪/୨୦୨୬ ଅନୁସାରେ ସୋଲପଟା ଗ୍ରାମର ଗୁରୁବ୍ରତ ଖଣ୍ଡାୟୀ, ଏଲକଣିଆ ଗ୍ରାମର ଯୋଗେନ୍ଦ୍ର ବେହେରା, ଜଳକଳଙ୍ଗ ଗ୍ରାମର ବାପି ନାୟକ ଏବଂ ବଞ୍ଚୋ ଗ୍ରାମର ରତିକାନ୍ତ ରାଉତ ସହିତ ୪ ଜଣଙ୍କୁ ସୋମବାର ନନ୍ଦିପଦା ପୋଲିସ ଗିରଫ କରି କୋର୍ଟ ଚାଲାଣ କରିଛି।
ସେହିପରି, ମଙ୍ଗଳବାର ଘସିପୁରା ଥାନାରେ ଦାୟର ହୋଇଥିବା ମାମଲା ନଂ ୧୫୦/୨୦୨୫, ୨୧୩/୨୦୨୬ ଓ ୨୧୪/୨୦୨୬ ଅନୁସାରେ ଆହୁରି ୬ ଜଣଙ୍କୁ କୋର୍ଟ ଚାଲାଣ କରାଯାଇଛି। ଧକୋଠାର ଅଜିତ କୁମାର ପ୍ରୁଷ୍ଟି, ତରତରାର ଦୀପ୍ତି ରଞ୍ଜନ ବାରିକ, ଅମାରଙ୍ଗର ଅଜିତ କୁମାର ନାୟକ, ବୀରଗୋବିନ୍ଦପୁରର ସୌମ୍ୟ ପ୍ରକାଶ ମହାପାତ୍ର, ପାଟଣା (ଧନୁର୍ଜୟପୁର)ର ମନବୋଧ ମହାନ୍ତ ଓ ଘଟଗାଁ ଉପରଡିହାର ଜିତେନ୍ଦ୍ର କୁମାର ଶାଙ୍କୁ ଘସିପୁରା ପୋଲିସ ଗିରଫ କରିଛି।
ନନ୍ଦିପଦା ଥାନା ଅଧିକାରୀ ଧର୍ମେନ୍ଦ୍ର ଶାନ୍ତି କହିଛନ୍ତି ଯେ, ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯାଇବା ପରେ ସେମାନଙ୍କୁ ଜେଲ ହାଜତକୁ ପଠାଯାଇଛି। ଏହାପୂର୍ବରୁ ଏହି ମାମଲାରେ ଆହୁରି ୯ ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା।
ସୂଚନାଯୋଗ୍ୟ, ଗତ ସୋମବାର କେନ୍ଦୁଝର ଏସପି ନୀତିନ କୁଶଲକର ଦାଗୁଡୁଙ୍କ ନିର୍ଦ୍ଦେଶକ୍ରମେ ଅତିରିକ୍ତ ଏସପି ସ୍ନେହାଶିଷ ସାହୁଙ୍କ ତତ୍ୱାବଧାନରେ ବିଭିନ୍ନ ଅଞ୍ଚଳରେ ବାଲି ମାଫିଆ ଓ ବ୍ୟବସାୟୀଙ୍କ ଘରେ ଚଢ଼ାଉ କରାଯାଇଥିଲା।
ଏହି ଅଭିଯାନରେ ଆନନ୍ଦପୁର ଏସଡିପିଓ କମଳ କୁମାର ପଣ୍ଡା, ନନ୍ଦିପଦା ଥାନା ଅଧିକାରୀ ଧର୍ମେନ୍ଦ୍ର ଶାନ୍ତି, ଘସିପୁରା ଥାନାଧିକାରୀ କିଶୋର ଚନ୍ଦ୍ର ପ୍ରଧାନଙ୍କ ସହିତ ଉପଖଣ୍ଡ ଅଧୀନର ଅନ୍ୟାନ୍ୟ ପୋଲିସ ଅଧିକାରୀ ଓ କର୍ମଚାରୀମାନେ ସାମିଲ ହୋଇଥିଲେ।
ଚଢ଼ାଉ ସମୟରେ ପୋଲିସ ପକ୍ଷରୁ ୮୦ଟି ବ୍ୟାଙ୍କ ଆକାଉଣ୍ଟ, ନଗଦ ୨୮ ଲକ୍ଷ ଟଙ୍କା, ୫୦ଟି ଟ୍ରାକ୍ଟର, ଟ୍ରକ୍ ଓ ଦାମୀ ଚାରିଚକିଆ ଯାନ ଜବତ କରାଯାଇଥିବା ସୂଚନା ମିଳିଛି।
