ପାଟଣାଗଡ, ୧୯।୫ (ସଚ୍ଚିଦାନନ୍ଦ ମହାକୁର): ବଲାଙ୍ଗୀର ଜିଲା ପାଟଣାଗଡ଼ ବ୍ଲକ ଅନ୍ତର୍ଗତ ଭଏଁସା ପ୍ରାଥମିକ କୃଷି ସମବାୟ ସମିତିରେ ମଣ୍ଡି ଆରମ୍ଭ ହେବା ପୂର୍ବରୁ ଗୋଦାମ ଗୃହରେ ଧାନ ଗଚ୍ଛିତ ରଖାଯାଇଥିବା ଅଭିଯୋଗରେ ସ୍ଥାନୀୟ ପ୍ରଶାସନ ପକ୍ଷରୁ ଚଢ଼ାଉ କରାଯାଇଛି।
ସୂଚନା ଅନୁଯାୟୀ, ଉକ୍ତ ଗ୍ରାମର ଜଣେ ଯୁବ ଚାଷୀ ଏହି ଘଟଣା ସମ୍ପର୍କରେ ପାଟଣାଗଡ଼ ଉପଜିଲ୍ଲାପାଳଙ୍କ ନିକଟରେ ଅଭିଯୋଗ କରିଥିଲେ। ଅଭିଯୋଗକୁ ଗୁରୁତ୍ୱ ଦେଇ ଉପଜିଲାପାଳ ମେହେର ଏଆରସିଏସ୍ (Assistant Registrar of Cooperative Societies)ଙ୍କୁ ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ।ଏହାପରେ ଏଆରସିଏସ୍ ରଥ ହେମ୍ବ୍ରମ ଓ ପୋଲିସ୍ ଦଳ ଘଟଣାସ୍ଥଳରେ ପହଞ୍ଚିଥିଲେ। ମିଜିଷ୍ଟ୍ରେଟ୍ ଭାବେ ଅତିରିକ୍ତ ତହସିଲଦାର ହଲଧର ନିଆଲଙ୍କ ଉପସ୍ଥିତିରେ ଗୋଦାମ ଗୃହରେ ଯାଞ୍ଚ କରାଯାଇଥିଲା।
ଯାଞ୍ଚ ସମୟରେ ଗୋଦାମ ଭିତରେ ମୋଟ ୧୦୭ ବସ୍ତା ଧାନ ଗଚ୍ଛିତ ରହିଥିବା ଚିହ୍ନଟ କରାଯାଇଥିଲା। ପରେ ଏଆରସିଏସ୍ ପକ୍ଷରୁ ସେହି ଧାନ ବସ୍ତାଗୁଡ଼ିକୁ ଗୋଦାମରୁ ଉଠାଇ ନେବାକୁ ସମ୍ପୃକ୍ତ ଚାଷୀଙ୍କୁ ନିର୍ଦ୍ଦେଶ ଦିଆଯାଇଥିଲା।ତଥାପି, ତଦନ୍ତକାରୀ ଦଳ ଧାନକୁ ଜବତ (ସିଜ୍) କରିବା ପ୍ରତି ନେଇନଥିବାରୁ ଏବଂ କେବଳ ଉଠାଇ ନେବାକୁ ନିର୍ଦ୍ଦେଶ ଦେଇଥିବାରୁ ଅଭିଯୋଗକାରୀ ଚାଷୀ ଅସନ୍ତୋଷ ପ୍ରକାଶ କରିଥିବା ସୂଚନା ମିଳିଛି। ଘଟଣାକୁ ନେଇ ଅଧିକ ତଦନ୍ତ ଜାରି ରହିଛି।
