ଭୁବନେଶ୍ୱର,୬।୧୦: ମୁଖ୍ୟ ନିର୍ବାଚନ କମିଶନର (CEC) ଜ୍ଞାନେଶ କୁମାରଙ୍କ ଇସ୍ତଫା ଦାବିକୁ ନେଇ ଦିଲ୍ଲୀରେ ହେବାକୁ ଥିବା ବିରୋଧୀଙ୍କ ପ୍ରତିବାଦରେ ସାମିଲ ହେବ ବିଜୁ ଜନତା ଦଳ (ବିଜେଡି)। ନିର୍ବାଚନ କମିଶନଙ୍କ କାର୍ଯ୍ୟପ୍ରଣାଳୀ ଏବଂ ଭୋଟର ତାଲିକାର ସ୍ପେଶାଲ ଇଣ୍ଟେନସିଭ ରିଭିଜନ (SIR)କୁ ନେଇ ବିରୋଧୀ ଦଳଗୁଡ଼ିକ ଆପତ୍ତି ଉଠାଇ ଆସୁଛନ୍ତି।
ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଦଳର ସମସ୍ତ ଏମ୍ପି INDIA ମେଣ୍ଟର ପ୍ରତିବାଦ ପଦଯାତ୍ରାରେ ସାମିଲ ହେବେ। ଦିଲ୍ଲୀରେ ବିରୋଧୀ ଏମ୍ପି ମାନେ ସଂସଦରୁ ନିର୍ବାଚନ କମିଶନଙ୍କ କାର୍ଯ୍ୟାଳୟ ଅଭିମୁଖେ ପଦଯାତ୍ରା କରିବାକୁ ଯୋଜନା କରିଛନ୍ତି।
ସିଇସି ଜ୍ଞାନେଶ କୁମାରଙ୍କୁ ହଟାଇବା ଏବଂ ଇସ୍ତଫା ଦାବି କରି INDIA ମେଣ୍ଟ ପକ୍ଷରୁ ଲଗାତାର ପ୍ରତିବାଦ କରାଯାଉଛି। ନିର୍ବାଚନୀ ପ୍ରକ୍ରିୟା ଓ SIRକୁ ନେଇ ବିରୋଧୀଙ୍କ ପକ୍ଷରୁ ପ୍ରଶ୍ନ ଉଠାଯାଇଛି। ଅନ୍ୟପଟେ ନିର୍ବାଚନ କମିଶନ ଏବଂ ଭାଜପା ପକ୍ଷରୁ ବିରୋଧୀଙ୍କ ଅଭିଯୋଗକୁ ଖଣ୍ଡନ କରାଯାଇଛି।
ନବୀନଙ୍କ ନିର୍ଦ୍ଦେଶକ୍ରମେ ବିଜେଡିର ସମସ୍ତ ଏମ୍ପି ଦିଲ୍ଲୀରେ INDIA ମେଣ୍ଟର ପ୍ରତିବାଦରେ ଯୋଗଦେବେ। ଏହା ଫଳରେ ନିର୍ବାଚନ କମିଶନ ସମ୍ପର୍କିତ ପ୍ରସଙ୍ଗରେ ବିଜେଡି ମଧ୍ୟ ବିରୋଧୀ ଦଳଗୁଡ଼ିକ ସହ ମିଳିତ ଭାବେ ନିଜର ମତ ରଖିବ।
SIR ଏବଂ ଭୋଟର ତାଲିକା ସଂଶୋଧନକୁ ନେଇ ବିରୋଧୀ ଦଳଗୁଡ଼ିକର ପ୍ରତିବାଦ ଦିନକୁ ଦିନ ତୀବ୍ର ହେଉଛି। ଅକ୍ଟୋବର ୬ରେ ଦିଲ୍ଲୀରେ INDIA ମେଣ୍ଟର ଏମ୍ପିମାନେ ନିର୍ବାଚନ କମିଶନ କାର୍ଯ୍ୟାଳୟ ଅଭିମୁଖେ ମାର୍ଚ୍ଚ କରିବାକୁ ଥିବା ବେଳେ ସୁରକ୍ଷା ବ୍ୟବସ୍ଥା ମଧ୍ୟ କଡ଼ାକଡ଼ି କରାଯାଇଛି।
Dharitri – Odisha’s No.1 Odia Daily
