ଲକ୍ଷ୍ମୀପୁର, ୧୯।୫ (ଅନନ୍ତ ପ୍ରସାଦ ନାୟକ): କାଳବୈଶାଖୀର ପ୍ରଭାବରେ ଲକ୍ଷ୍ମୀପୁର ବ୍ଲକ ଅନ୍ତର୍ଗତ ପଞ୍ଚଡ଼ା ଓ ଦସମନ୍ତପୁର ଛକ ନିକଟରେ ୩୨୬ ନମ୍ବର ଜାତୀୟ ରାଜପଥ ଉପରେ ଗଛ ପଡ଼ି ଯାତାୟାତରେ ବ୍ୟାଘାତ ସୃଷ୍ଟି ହୋଇଛି।
ସୂଚନା ଅନୁଯାୟୀ, ଅପରାହ୍ନ ସମୟରେ ଅଞ୍ଚଳରେ କାଳବୈଶାଖୀ ତାଣ୍ଡବ ରୂପ ଧାରଣ କରିଥିଲା। ଭୀଷଣ ପବନ, ବର୍ଷା, ଘଡଘଡ଼ି ଓ ବିଜୁଳି ପ୍ରଭାବରେ ରାସ୍ତା ପାର୍ଶ୍ୱରେ ଥିବା ଅନେକ ଗଛ ଭାଙ୍ଗି ରାସ୍ତା ଉପରେ ପଡ଼ିଥିଲା।ଏ ନେଇ ଯାତାୟାତ ବନ୍ଦ ହୋଇଯାଇଥିଲା ଏବଂ ଯାନବାହାନ, ସହିତ ଆମ୍ବୁଲାନ୍ସ ମଧ୍ୟ ଦୀର୍ଘ ସମୟ ଧରି ରାସ୍ତାର ଦୁଇ ପାର୍ଶ୍ୱରେ ଅଟକି ରହିଥିଲା। ଯାତ୍ରୀମାନେ ଅସୁବିଧାର ସମ୍ମୁଖୀନ ହୋଇଥିଲେ।
ପରେ ସ୍ଥାନୀୟ ଲୋକମାନଙ୍କ ସହଯୋଗରେ ଗଛ ଓ ଡାଳଗୁଡ଼ିକୁ କାଟି ରାସ୍ତା ସଫା କରାଯାଇଥିଲା, ଫଳରେ କିଛି ସମୟ ପରେ ଯାତାୟାତ ପୁନର୍ବାର ସ୍ୱାଭାବିକ ହୋଇଥିଲା।ସେହିପରି, ପବନ ଓ ବର୍ଷାର ପ୍ରଭାବରେ ଦସମନ୍ତପୁର ଛକ ଅଞ୍ଚଳର କିଛି ଦୋକାନ ଘର କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି।
