ଭୁବନେଶ୍ୱର,୨୬ା୧୧(ବ୍ୟୁରୋ): କେନ୍ଦ୍ର ସଙ୍ଗୀତ ନାଟକ ଏକାଡେମୀ ନୂଆଦିଲ୍ଲୀ ପକ୍ଷରୁ ଶୁକ୍ରବାର ବିଭିନ୍ନ ବର୍ଗରେ ପୁରସ୍କାର ଘୋଷଣା କରାଯାଇଛି। ସ୍ବାଧୀନତାର ୭୫ବର୍ଷ ଉପଲକ୍ଷେ ୭୫ ବର୍ଷରୁ ଊର୍ଦ୍ଧ୍ୱ କଳାକାରଙ୍କୁ ‘ଏକକାଳୀନ ସଙ୍ଗୀତ ନାଟକ ଏକାଡେମୀ ଅମ୍ରିତ ପୁରସ୍କାର ୨୦୨୨’ ଦିଆଯିବ। ଏଥିପାଇଁ ଓଡ଼ିଶାରୁ ୪ଜଣ ମନୋନୀତ ହୋଇଛନ୍ତି। ଛଉରେ ଶିବ ପ୍ରସାଦ ଦାସ(ସିଦ୍ଧେଶ୍ୱର ଦାସ), ନାଟକରେ ଅନନ୍ତ ମହାପାତ୍ର, ଲୋକ ସଙ୍ଗୀତ (ବ୍ରହ୍ମା ବୀଣା)ରେ ଆନନ୍ଦ ବାଗ ଏବଂ ଓଡ଼ିଶୀ(ଗୋଟିପୁଅ)ନୃତ୍ୟରେ ଗୋବିନ୍ଦ ଚନ୍ଦ୍ର ପାଲ୍ ରହିଛନ୍ତି। ପ୍ରତି କଳାକାରଙ୍କୁ ୧ଲକ୍ଷ ଅର୍ଥରାଶି ସହ ତାମ୍ରପାତ୍ର ଓ ଅଙ୍ଗବସ୍ତ୍ର ଦିଆଯିବ। ଅନ୍ୟପକ୍ଷେ ୨୦୧୯, ୨୦୨୦ ଓ ୨୦୨୧ ବର୍ଷ ପାଇଁ ୧୨୮(୩ ଯୁଗ୍ମ) କଳାକାରଙ୍କୁ ‘ସଙ୍ଗୀତ ନାଟକ ଏକାଡେମୀ ପୁରସ୍କାର’ ଦିଆଯିବ। ଏମାନଙ୍କ ମଧ୍ୟରେ ଓଡ଼ିଶାରୁ ୨୦୧୯ରେ ଛଉନୃତ୍ୟ ପାଇଁ ବ୍ରଜେନ୍ଦ୍ର କୁମାର ପଟ୍ଟନାୟକ, ୨୦୨୧ରେ ନୃତ୍ୟ ପାଇଁ ସଙ୍ଗୀତରେ ବିଜୟ କୁମାର ଜେନା, ନାଟକ ପାଇଁ ନାଟ୍ୟକାର ମନୋଜ ପଟ୍ଟନାୟକ ଓ ସୁଗମ ସଙ୍ଗୀତରେ ଗାୟିକା ସୁସ୍ମିତା ଦାସ ଚୟନ ହୋଇଛନ୍ତି। ପ୍ରତ୍ୟେକଙ୍କୁ ୧ଲକ୍ଷ ଟଙ୍କାର ଅର୍ଥରାଶି ପ୍ରଦାନ କରାଯିବ।
ସେହିପରି ଉପରୋକ୍ତ ୩ ବର୍ଷ ପାଇଁ ଦେଶର ୧୦୨ (୩ ଯୁଗ୍ମ)ଜଣଙ୍କୁ ‘ଉସ୍ତାଦ ବିସ୍ମିଲା ଖାନ୍ ଯୁବ ପୁରସ୍କାର’ ଦିଆଯିବ। ୪୦ ବର୍ଷରୁ କମ୍ କଳାକାରଙ୍କୁ ଏହି ପୁରସ୍କାର ଦିଆଯାଏ। ଓଡ଼ିଶାରୁ ୨୦୧୯ ଲାଗି ପ୍ରହଲ୍ଲାଦ ନାଟକ ପାଇଁ ସନ୍ତୋଷ କୁମାର ରଣା ଓ ୨୦୨୦ ଲାଗି ଓଡ଼ିଶୀ ସଙ୍ଗୀତ ପାଇଁ ରୂପକ ପରିଡ଼ା ଏବଂ ଓଡ଼ିଶୀ ନୃତ୍ୟ ପାଇଁ ପ୍ରଭାତ କୁମାର ସ୍ବାଇଁ ମନୋନୀତ ହୋଇଛନ୍ତି। ପୁରସ୍କାର ବାବଦକୁ ୨୫ହଜାର ଟଙ୍କା ଲେଖାଏ ଅର୍ଥରାଶି ପ୍ରଦାନ କରାଯିବ।
ଏଥିସହ ‘ସଙ୍ଗୀତ ନାଟକ ଏକାଡେମୀ ଫେଲୋଶିପ୍ (ଏକାଡେମୀ ରତ୍ନ)’ ପାଇଁ ୧୦ଜଣଙ୍କୁ ଚୟନ କରାଯାଇଛି। ସେମାନେ ହେଲେ ସରୋଜା ବୈଦ୍ୟନାଥନ୍, ସଦାନାମ କ୍ରିଷ୍ଣନ୍ କୁଟ୍ଟୀ, ଦର୍ଶାନନ୍ ଝାଭେରୀ, ଛନ୍ନୁଲାଲ ମିଶ୍ର, ଏ. କେ. ସି. ନଟରାଜନ୍, ସ୍ବପ୍ନା ଚୌଧୁରୀ, ମାଳିନୀ ରାଜୁର୍କାର, ଟି. ଭି. ଗୋପାଳକ୍ରିଷ୍ଣନ୍, ତିଜାନ ବାଈ ଓ ଭରତ ଗୁପ୍ତ। ଏମାନଙ୍କୁ ୩ଲକ୍ଷ ଲେଖାଏ ଅର୍ଥରାଶିର ଫେଲୋଶିପ ଦିଆଯିବ। ଏ ନେଇ ଏକାଡେମୀ ସଚିବ ଅନିମେଶ ପି.ରଞ୍ଜନ ବିଜ୍ଞପ୍ତି ମାଧ୍ୟମରେ ସୂଚନା ଦେଇଛନ୍ତି।
