କଲମ୍ବୋ, ୪।୭ : ଗୁରୁତର ଅର୍ଥନୈତିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କାର ଅବସ୍ଥା ଦିନକୁ ଦିନ ବିଗିଡିବାରେ ଲାଗିଛି। ଦେଶରେ ତେଲ କିଣିବା ପାଇଁ ଟଙ୍କା ନାହିଁ। ଏହି କାରଣରୁ ପେଟ୍ରୋଲ ଏବଂ ଡିଜେଲର ବହୁତ ଅଭାବ ଦେଖାଦେଇଛି। ଦୁଇ ସପ୍ତାହ ପାଇଁ ବନ୍ଦ ଥିବା ବିଦ୍ୟାଳୟଗୁଡ଼ିକ ପୁଣି ଆଉ ଏକ ସପ୍ତାହ ପାଇଁ ବନ୍ଦ ରଖିବାକୁ ସରକାରଙ୍କ ପକ୍ଷରୁ ନିର୍ଦ୍ଦେଶ ଜାରି ହୋଇଛି। ଲୋକଙ୍କୁ ଘରୁ କାମ କରିବାକୁ ପରାମର୍ଶ ଦିଆଯାଇଛି।
ଶ୍ରୀଲଙ୍କାର ବିଦ୍ୟୁତ ଏବଂ ଶକ୍ତି ମନ୍ତ୍ରୀ କାଞ୍ଚନା ୱିଜେସେକରା କହିଛନ୍ତି ଯେ ଇନ୍ଧନ ପରିବହନ ପାଇଁ ପଦକ୍ଷେପ ନିଆଯାଉଛି। କିନ୍ତୁ ଅର୍ଥ ଅଭାବ ମଧ୍ୟ ରହିଛି। ତୈଳ କ୍ରୟ ପାଇଁ କେନ୍ଦ୍ରୀୟ ବ୍ୟାଙ୍କରେ ମାତ୍ର ୧୨.୫୦ କୋଟି ଡଲାର ଅଛି।
ବୈଦେଶିକ ମୁଦ୍ରା ସଙ୍କଟକୁ ଦୂର କରିବାରେ ସାହାଯ୍ୟ କରିବାକୁ ବିଦେଶରେ ଥିବା ଶ୍ରୀଲଙ୍କା ନାଗରିକଙ୍କୁ ଅନୌପଚାରିକ ଚ୍ୟାନେଲ ବଦଳରେ ବ୍ୟାଙ୍କ ମାଧ୍ୟମରେ ଘରକୁ ଟଙ୍କା ପଠାଇବାକୁ ୱିଜେସେକରା ନିବେଦନ କରିଛନ୍ତି।
ଶକ୍ତି ମନ୍ତ୍ରୀ କହିଛନ୍ତି ଯେ ୪୦ ହଜାର ମେଟ୍ରିକ ଟନ ଡିଜେଲ ନେଇ ଶୁକ୍ରବାର ଏକ ବିମାନ କଲମ୍ବୋରେ ପହଞ୍ଚିବ। ଜୁଲାଇ ୨୨ ରେ ପେଟ୍ରୋଲ ସହିତ ଅନ୍ୟ ଏକ ବିମାନ ମଧ୍ୟ ଆସିବ। ଇନ୍ଧନର ଅନ୍ୟାନ୍ୟ ସାମଗ୍ରୀ ମଧ୍ୟ ଆସୁଛି। କିନ୍ତୁ ୫୮.୭ କୋଟି ଡଲାର ସଂଗ୍ରହ କରିବାକୁ ଶ୍ରୀଲଙ୍କା ସଂଘର୍ଷ କରୁଛି। ସାତ ଇନ୍ଧନ ଯୋଗାଣକାରୀଙ୍କର ଶ୍ରୀଲଙ୍କା ଉପରେ ପ୍ରାୟ ୮୦ କୋଟି ଡଲାର ବକେୟା ରହିଛି।
ସୋମବାରଠାରୁ ଦେଶରେ ତିନି ଘଣ୍ଟା ବିଦ୍ୟୁତ କାଟ ହେବାର ଘୋଷଣା କରାଯାଇଛି। ଦେଶରେ କେବଳ କିଛି ଦିନ ଇନ୍ଧନ ବାକି ଅଛି । ଅତ୍ୟାବଶ୍ୟକ ସେବା ପାଇଁ ଏହାକୁ ସଂରକ୍ଷଣରେ ରଖାଯାଇଛି । ଏହା ସ୍ବାସ୍ଥ୍ୟ ସେବା, ବନ୍ଦର, ଅତ୍ୟାବଶ୍ୟକ ପରିବହନ ସେବା ଏବଂ ଖାଦ୍ୟ ବଣ୍ଟନ ପାଇଁ ସଂରକ୍ଷିତ ।
