ପାଟନା,୧୬ା୯: ବିହାରର ୧୨ ବର୍ଷ ପୁରୁଣା ଏକ ହତ୍ୟା ମାମଲାରେ ଆସିଛି ଚାଞ୍ଚଲ୍ୟକର ମୋଡ଼ । ୨୦୧୪ରେ ନିଖୋଜ ହୋଇଥିବା ଶକୁନ୍ତଳା ଦେବୀଙ୍କୁ ମୃତ ଭାବି ତାଙ୍କ ସ୍ୱାମୀ ଓ ଶ୍ୱଶୁରଘର ପରିବାର ବିରୋଧରେ ହତ୍ୟା ମାମଲା ରୁଜୁ ହୋଇଥିଲା। ଏପରିକି ନାଳାରୁ ମିଳିଥିବା ଜଣେ ମହିଳାଙ୍କ ମୃତଦେହକୁ ଶକୁନ୍ତଳାଙ୍କ ମୃତଦେହ ବୋଲି ପରିଚୟ କରାଯାଇଥିଲା। ଏହି ମାମଲାରେ ତାଙ୍କ ସ୍ୱାମୀ ଅରୁଣ ମେହତାଙ୍କ ସମେତ ଶ୍ୱଶୁରଘରର ଅନ୍ୟମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ହୋଇଥିଲା। କିନ୍ତୁ ଏବେ ଝାଡ଼ଖଣ୍ଡର ଗଢ଼ୱା ଜିଲାରୁ ଶକୁନ୍ତଳା ଜୀବିତ ଅବସ୍ଥାରେ ଉଦ୍ଧାର ହୋଇଛନ୍ତି ।
ଘଟଣାଟି ୨୦୧୪ ମସିହାର। ଶକୁନ୍ତଳା ଦେବୀ ନିଖୋଜ ହେବା ପରେ ତାଙ୍କ ଭାଇ ପୋଲିସରେ ଅଭିଯୋଗ କରିଥିଲେ। ଶ୍ୱଶୁରଘରେ ଯୌତୁକକୁ ନେଇ ତାଙ୍କୁ ନିର୍ଯାତନା ଦିଆଯାଉଥିବା ପରିବାର ପକ୍ଷରୁ ଅଭିଯୋଗ ହୋଇଥିଲା। ଏହାର କିଛି ଦିନ ପରେ ଡେହରୀ ମୁଫସିଲ ଥାନା ଅଞ୍ଚଳର ଖଣ୍ଡା ଗାଁ ନିକଟ ନାଳରୁ ଜଣେ ମହିଳାଙ୍କ ମୃତଦେହ ଉଦ୍ଧାର ହୋଇଥିଲା। ଶକୁନ୍ତଳାଙ୍କ ଭାଇ ଉକ୍ତ ମୃତଦେହକୁ ନିଜ ଭଉଣୀଙ୍କର ବୋଲି ପରିଚୟ କରିଥିବା ରିପୋର୍ଟରେ କୁହାଯାଇଛି।
ଏହାପରେ ହତ୍ୟା ମାମଲା ରୁଜୁ ହୋଇ ଶକୁନ୍ତଳାଙ୍କ ସ୍ୱାମୀ ଅରୁଣ ମେହତାଙ୍କ ସମେତ ଶ୍ୱଶୁରଘରର ଅନ୍ୟମାନଙ୍କୁ ଅଭିଯୁକ୍ତ କରାଯାଇଥିଲା। ମାମଲାରେ ପୋଲିସ ଗିରଫଦାରୀ ମଧ୍ୟ କରିଥିଲା।ଶକୁନ୍ତଳାଙ୍କ ସ୍ୱାମୀ ଅରୁଣ ମେହତା ଓ ପରିବାରର କିଛି ସଦସ୍ୟଙ୍କୁ ଦୀର୍ଘ ସମୟ ଧରି ଆଇନଗତ ପ୍ରକ୍ରିୟାର ସାମ୍ନା କରିବାକୁ ପଡ଼ିଥିଲା। ପରିବାର ପକ୍ଷରୁ ଦାବି କରାଯାଇଛି ଯେ, ମାମଲାରେ ଖର୍ଚ୍ଚ ଓ ଆଇନଗତ ପ୍ରକ୍ରିୟା ସମ୍ଭାଳିବାରେ ସେମାନଙ୍କୁ ପୈତୃକ ସମ୍ପତ୍ତି ପର୍ଯ୍ୟନ୍ତ ବିକ୍ରି କରିବାକୁ ପଡ଼ିଥିଲା।
ପ୍ରାୟ ୧୨ ବର୍ଷ ପରେ ଏହି ମାମଲାରେ ନୂଆ ମୋଡ଼ ଆସିଥିଲା। ଶକୁନ୍ତଳାଙ୍କ ଶ୍ୱଶୁରଘର ପକ୍ଷକୁ ସୂଚନା ମିଳିଥିଲା ଯେ, ସେ ଝାଡ଼ଖଣ୍ଡରେ ଜୀବିତ ଅବସ୍ଥାରେ ରହୁଛନ୍ତି। ଏହି ସୂଚନା ରୋହତାସ ଏସ୍ପିଙ୍କ ନିକଟରେ ପହଞ୍ଚିବା ପରେ ତାଙ୍କ ନିର୍ଦ୍ଦେଶରେ ଡେହରୀ ମୁଫସିଲ ଥାନାର ଏକ ପୋଲିସ ଟିମ୍ ଝାଡ଼ଖଣ୍ଡ ଯାଇଥିଲା।ପୋଲିସ ଗଢ଼ୱା ଜିଲାର କାଣ୍ଡି ଥାନା ଅଞ୍ଚଳର ଲଭରୀ ଗାଁରୁ ମହିଳାଙ୍କୁ ଉଦ୍ଧାର କରିଥିଲା। ପୋଲିସର କହିବା ଅନୁସାରେ, ସେଠାରେ ମହିଳା ଜଣକ ‘କାନ୍ତି ଦେବୀ’ ନାମରେ ରହୁଥିଲେ ଏବଂ ରଟ୍ଟୁ ସିଂହ ନାମକ ଜଣେ ବ୍ୟକ୍ତିଙ୍କ ସହ ରହୁଥିଲେ। ପରେ ପୋଲିସ ତାଙ୍କୁ ରୋହତାସ ଆଣି ସାସାରାମ କୋର୍ଟରେ ହାଜର କରିଥିଲା।
ଶକୁନ୍ତଳା ଜୀବିତ ମିଳିବା ପରେ ୨୦୧୪ର ପୂରା ଘଟଣା ନୂଆ ପ୍ରଶ୍ନ ଘେରରେ ଆସିଛି । ରିପୋର୍ଟ ଅନୁସାରେ, ପୋଲିସକୁ ଭ୍ରମିତ କରିବା, ଠକେଇ ଏବଂ ଅପରାଧିକ ଷଡ଼ଯନ୍ତ୍ର ଭଳି ଅଭିଯୋଗରେ ଶକୁନ୍ତଳାଙ୍କ ବିରୋଧରେ ମଧ୍ୟ ଆଇନଗତ ପଦକ୍ଷେପ ଆରମ୍ଭ ହୋଇଛି। ତାଙ୍କୁ କୋର୍ଟରେ ହାଜର କରାଯିବା ପରେ ମାମଲାର ପରବର୍ତ୍ତୀ ଆଇନଗତ ପ୍ରକ୍ରିୟା ଚାଲିଛି । ଏହି ଘଟଣାର ସବୁଠାରୁ ବଡ଼ ପ୍ରଶ୍ନ ଏବେ ଏହା ଯେ, ଯଦି ଗଢ଼ୱାରୁ ଉଦ୍ଧାର ହୋଇଥିବା ମହିଳା ଶକୁନ୍ତଳା ଦେବୀ ହିଁ, ତେବେ ୨୦୧୪ରେ ରୋହତାସର ନାଳରୁ ମିଳିଥିବା ମହିଳାଙ୍କ ମୃତଦେହ କାହାର ଥିଲା?
ସେତେବେଳେ ମୃତଦେହକୁ ଶକୁନ୍ତଳାଙ୍କର ବୋଲି ପରିଚୟ କରାଯାଇଥିଲା ଏବଂ ପୋଷ୍ଟମର୍ଟମ୍ ମଧ୍ୟ ହୋଇଥିଲା। ଏବେ ଶକୁନ୍ତଳା ଜୀବିତ ମିଳିବା ପରେ ସେହି ଅଜଣା ମହିଳାଙ୍କ ପରିଚୟ ପୁଣିଥରେ ତଦନ୍ତର କେନ୍ଦ୍ରବିନ୍ଦୁ ପାଲଟିଛି। ଏହା ସହ ୧୨ ବର୍ଷ ତଳର ମୃତଦେହ ପରିଚୟ ପ୍ରକ୍ରିୟା ଓ ତତ୍କାଳୀନ ପୋଲିସ ତଦନ୍ତକୁ ନେଇ ମଧ୍ୟ ନୂଆ ପ୍ରଶ୍ନ ଉଠିଛି।
