ଭୁବନେଶ୍ୱର, ୫।୧(କ୍ରୀଡ଼ା ପ୍ରତିନିଧି): ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କଟକର ବାରବାଟୀ ଷ୍ଟାଡିୟମରେ ଚାଲିଥିବା ଏମ୍ଜିଏମ୍ ଟି୨୦ କ୍ରିକେଟ ଲିଗ୍ର ସୋମବାର ଅନୁଷ୍ଠିତ ପ୍ରଥମ ମ୍ୟାଚରେ ଓଡ଼ିଶା ଜାଗୁଆର୍ସ ୪୮ ରନରେ ଚିତାସ୍କୁ ପରାସ୍ତ କରିଛି। ପ୍ରଥମେ ବ୍ୟାଟିଂ କରିଥିବା ପାନ୍ଥର୍ସ ୨୦ ଓଭରରେ ୪ ଉଇକେଟ ହରାଇ ୧୬୯ ରନ କରିଥିବାବେଳେ ଚିତାସ ଇନିଂସ ୧୨୧/୯ରେ ସୀମିତ ରହିଥିଲା। ଚଳିତ ଲିଗ୍ରେ ୫ ମ୍ୟାଚରୁ ଜାଗୁଆର୍ସର ଏହା ପ୍ରଥମ ବିଜୟ। ଦଳ କ୍ରମାଗତ ୪ ପରାଜୟ ଲଭିବାପରେ ପ୍ରଥମ ବିଜୟ ସ୍ବାଦ ଚାଖିବା ସହ ପଏଣ୍ଟ ଖାତା ଖୋଲିଛି। ଅନ୍ୟପକ୍ଷରେ ଚିତାସ୍ର ଏହା ୬ ମ୍ୟାଚରୁ ୩ୟ ପରାଜୟ। ଦଳ ୧୨ ପଏଣ୍ଟ ସହ ଟେବୁଲର ତୃତୀୟ ସ୍ଥାନରେ ରହିଛି।
ଟସ୍ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା ଚିତାସ। ଜାଗୁଆର୍ସ ୩୬ ରନରେ ଓପନର ବିଭୁ ମଲିକ(୯)ଙ୍କ ଉଇକେଟ ହରାଇଥିଲେ ହେଁ ସାମସୁଲ ଖାଁଙ୍କ ଅର୍ଦ୍ଧଶତକ ଏବଂ ଗିରିଜା ରାଉତ ଓ ଅଭିଜିତ ବାରିକଙ୍କ ଉପଯୋଗୀ ରନ ବଳରେ ୧୬୯ ରନର ସମ୍ମାନଜନକ ସ୍କୋର କରିଥିଲା। ୩୫ଟି ବଲ୍ ଖେଳିଥିବା ସାମସୁଲ ୧୦ ଚୌକା ଓ ୨ ଛକା ସହାୟତାରେ ବିସ୍ଫୋରକ ୬୨ ରନ କରିଥିଲେ। ଗିରିଜା ୩୩ ବଲ୍ରୁ ୩୭(୩ ଚୌକା) ରନରେ ଆଉଟ ହୋଇଥିବାବେଳେ ଅଭିଜିତ ୧୭ ବଲ୍ରୁ ଦ୍ରୁତ ୩୩(୩ ଚୌକା, ୧ ଛକା) ରନରେ ଅପରାଜିତ ରହିଥିଲେ। ଚିତାସ ବୋଲରଙ୍କ ମଧ୍ୟରେ ମନୋଜ ବାରିକ ୨ଟି ଏବଂ ମୃଣ୍ମୟ ତ୍ରିପାଠୀ ଓ ମନୀଷ ରାଉତ ଗୋଟିଏ ଲେଖାଏ ଉଇକେଟ ନେଇଥିଲେ।
୧୭୦ ରନ ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଚିତାସ କ୍ରମାଗତ ବ୍ୟବଧାନରେ ଉଇକେଟ ହରାଇ ଚିତ୍ ମାରିଥିଲା। ଅଧିନାୟକ ଅନୁରାଗ ଷଡ଼ଙ୍ଗୀ ସର୍ବାଧିକ ୩୧(୨୫ ବଲ, ୪ ଚୌକା, ୧ ଛକା) ରନ ସ୍କୋର କରିଥିଲେ। ସୁମନ ମହାପାତ୍ର ୨୦ ଓ ରାମଚନ୍ଦ୍ର ବେହେରା ୧୭ ରନ ଯୋଗଦାନ ଦେଇଥିଲେ। ବ୍ୟାଟ୍ସମ୍ୟାନଙ୍କ ବିଫଳତା ଯୋଗୁ ଦଳ ବିଜୟ ଲକ୍ଷ୍ୟଠାରୁ ବହୁ ଦୂରରେ ରହି ଯାଇଥିଲା। ଚିତାସ ପୂରା ୨୦ ଓଭର ଖେଳିଥିଲେ ହେଁ ୯ ଉଇକେଟ ହରାଇ ୧୨୧ ରନ କରିପାରିଥିଲା। ବିଜୟୀ ଦଳର ବୋଲରଙ୍କ ମଧ୍ୟରେ ନିର୍ବିଶଙ୍କର ବାରିକ ସର୍ବାଧିକ ୪ଟି, ମନୋଜ କାଶ୍ୟପ ୨ଟି ଏବଂ ରାହୁଲ ଚୌଧାରୀ, ରଶ୍ମିରଞ୍ଜନ ସାହୁ ଓ ଲଗ୍ନଜିତ ସାମଲ ଗୋଟିଏ ଲେଖାଏ ଉଇକେଟ ନେଇଥିଲେ। ଦ୍ରୁତ ଇନିଂସ ଖେଳି ଜାଗୁଆର୍ସକୁ ସମ୍ମାନଜନକ ସ୍କୋରରେ ପହଞ୍ଚାଇବାରେ ମୁଖ୍ୟ ଭୂମିକା ଗ୍ରହଣ କରିଥିବା ସାମସୁଲ ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଥିଲେ।
