କେନ୍ଦୁଝର,୧୨।୧୧(ସ୍ବ.ପ୍ର.): ପଲ୍ଲୀସଭା ନ କରି, ବିନା ପ୍ରଦୂଷଣ ଅନୁମୋତିରେ ବାଂଶପାଳ ବ୍ଲକ୍ ତଳକଇଁସାରୀ ଗ୍ରାମରେ ଲୁହାପଥର ଷ୍ଟକ୍ୟାର୍ଡ ନିର୍ମାଣ ହେଉଛି। ଉକ୍ତ ସ୍ଥାନରୁ ଗଛ କଟାଯିବା ସହ ପଥର ତଡ଼ା ଯାଉଛି। ଏଥିସହ ଷ୍ଟକ୍ୟାର୍ଡ ହେବା ଫଳରେ ଅଞ୍ଚଳରେ ଚାଷ କ୍ଷତିଗ୍ରସ୍ତ ହେବ। ବନ୍ୟପ୍ରାଣୀଙ୍କ ଯାତାୟାତରେ ସମସ୍ୟା ଉପୁଜିବ। ଫଳରେ ଏହାକୁ ମୂଳ ଆଦିବାସୀମାନେ ବିରୋଧ କରିଆସୁଛନ୍ତି। ସରକାର ଏଥିରେ ହସ୍ତକ୍ଷେପ କରି ଏହାର ସମାଧାନ କରିବାକୁ ଦାବି କରିଛନ୍ତି।
ସୂଚନା ମୁତାବକ, ବାଂଶପାଳ ତହସିଲ ପକ୍ଷରୁ ୨୦୧୯ ମସିହାରେ ଉକ୍ତ ଷ୍ଟକ୍ୟାର୍ଡ ପାଇଁ ବିନା ଅନୁମୋତି କେସ ନଂ. ୨/୨୦୧୯ରେ ଅଭିଯୋଗ ଶୁଣାଣି ହୋଇଥିଲା। ଉକ୍ତ ଶୁଣାଣିରେ ଖାତା ନଂ. ୪୮ ଅନ୍ତର୍ଗତ ଚାଷ ଉପଯୋଗୀ ଓ ବାସଗୃହ ସ୍ଥାନରେ ଷ୍ଟକ୍ୟାର୍ଡ ନିର୍ମାଣ ପାଇଁ ଆଦିବାସୀ ବାରଣ କରିଥିଲେ। ଏଠାରେ ଷ୍ଟକ୍ୟାର୍ଡ ହେଲେ ସେମାନଙ୍କ ଜମିଜମା କ୍ଷତିଗ୍ରସ୍ତ ହେବା ସହ ବନ୍ୟଜନ୍ତୁଙ୍କ ଯାତାୟାତରେ ସମସ୍ୟା ଉପୁଜିବ। ବ୍ୟାପକ ଜଙ୍ଗଲ ଓ ପରିବେଶ ନଷ୍ଟ ହେବ ବୋଲି ସେମାନେ କହିଛନ୍ତି। କିନ୍ତୁ ଅଭିଯୋଗକୁ ଅଣଦେଖା କରି ଖଣି ସଂସ୍ଥାର ଷ୍ଟକ୍ୟାର୍ଡ ନିର୍ମାଣ ସପକ୍ଷରେ ଲିପିବଦ୍ଧ କରାଯାଇଥିବା କହିଛନ୍ତି। ଏ ନେଇ ୨୦୨୦ ଅଗଷ୍ଟ ୨୫ରେ ଆଦିବାସୀମାନେ ଖଣି ସଂସ୍ଥାରେ ଆପତ୍ତି କରିଥିଲେ। ଅଭିଯୋଗକୁ ଅଣଦେଖା କରାଯାଇଥିଲା। ପୁଣି ଥରେ ତହସିଲ ପକ୍ଷରୁ ଶେଷ ଶୁଣାଣି ପାଇଁ ୧୮ ଫେବୃୟାରୀ ୨୦୨୧ ଧାର୍ଯ୍ୟ କରାଯାଇଥିଲା। ଉକ୍ତ ଦିନ ଆଦିବାସୀମାନେ ତହସିଲ କାର୍ଯ୍ୟାଳୟରେ ଉପସ୍ଥିତ ରହି ଅଞ୍ଚଳରେ ଷ୍ଟକୟାର୍ଡ ନ କରିବାକୁ ନିବେଦନ କରିଥିଲେ। ମାତ୍ର ୨୮ ଡିସେମ୍ବର ୨୦୨୧ରେ ପୋଲିସ ସୁରକ୍ଷା ମଧ୍ୟରେ ନିର୍ମାଣ କାମ କରାଯାଇଥିଲା। ଏହାକୁ ନେଇ ଭୀମସେନ ମୁଣ୍ଡା ଓ ଅନ୍ୟ ଆଦିବାସୀମାନେ ଜାତୀୟ ଅନୁସୂଚିତ ଜନଜାତି କମିଶନ, ନୂଆଦିଲ୍ଲୀର ଦ୍ୱାରସ୍ଥ ହୋଇଥିଲେ। କମିଶନ ଖଣି ନିର୍ଦ୍ଦେଶାଳୟ ଓ ଜିଲାପାଳ କେନ୍ଦୁଝରଙ୍କୁ ଚିଠି ଲେଖି ସବିଶେଷ ରିପୋର୍ଟ ଦେବାକୁ ଆଦେଶ କରିଥିଲେ। ଅଦ୍ୟାବଧି କାର୍ଯ୍ୟ ଜାରି ରହିଥିବା ବେଳେ ଅଭିଯୋଗ କଲେ ପୋଲିସ ଭୟ ଦେଖାଉଛି। ଏଣୁ ରାଜ୍ୟ ସରକାର ଏଥିରେ ହସ୍ତକ୍ଷେପ କରିବାକୁ ଆଦିବାସୀ ନିବେଦନ କରିଛନ୍ତି। ନଚେତ୍ ବାଧ୍ୟ ହୋଇ ଅଦାଲତ ଓ ମାନବାଧିକାର କମିଶନଙ୍କ ଦ୍ୱାରସ୍ଥ ହେବେ ବୋଲି ଚେତାବନୀ ଦେଇଛନ୍ତି।
