ବେଙ୍ଗାଲୁରୁ,୭।୫ : ବଜରଙ୍ଗ ଦଳ ବିବାଦ ମଧ୍ୟରେ ବରିଷ୍ଠ କଂଗ୍ରେସ ନେତା ପି ଚିଦାମ୍ବରମ ଭାଜପାକୁ କଡ଼ା ସମାଲୋଚନା କରିଛନ୍ତି। ରବିବାର ସେ କହିଛନ୍ତି, କର୍ନାଟକ ନିର୍ବାଚନ ପାଇଁ କଂଗ୍ରେସ ଇସ୍ତାହାରରେ କୁହାଯାଇ ନାହିଁ, ଯଦି ରାଜ୍ୟରେ ସରକାର ଗଠନ ହୁଏ ତେବେ ଏହି ସଂଗଠନ ଉପରେ ପ୍ରତିବନ୍ଧକ ଲଗାଯି। କିନ୍ତୁ ଘୃଣା ବିସ୍ତାର କରୁଥିବା ସମସ୍ତ ସଂଗଠନ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦିଆଯାଇଛି।
ଭାଜପାର ଅଭିଯୋଗ ପରେ ଚିଦାମ୍ବରମ ବ୍ୟାକଫୁଟକୁ ଆସି ବଜରଙ୍ଗ ଦଳ ସହିତ ବଜରଙ୍ଗ ବାଲୀଙ୍କର ତୁଳନା ଉପରେ ପ୍ରଶ୍ନ କରିଛନ୍ତି। ବିଚାର କରିବା ପରେ କର୍ନାଟକର ଲୋକମାନେ ସେମାନଙ୍କର ନେତା ବାଛିବେ ବୋଲି ସେ ଆତ୍ମବିଶ୍ୱାସ ପ୍ରକାଶ କରିଛନ୍ତି।
କର୍ନାଟକର ଗଣତନ୍ତ୍ର ଏବଂ ଭବିଷ୍ୟତକୁ ବଞ୍ଚାଇବା ପାଇଁ ଆମକୁ ଭାଜପାକୁ ରାଜ୍ୟରେ ଜିତିବାରେ ରୋକିବାକୁ ପଡିବ। ରାଜ୍ୟରେ ୟୁନିଫର୍ମ ସିଭିଲ କୋଡ (ୟୁସିସି) ଏବଂ ଏନଆରସି ଲାଗୁ କରିବାକୁ ଭାଜପାର ପ୍ରତିଶ୍ରୁତି ବିଷୟରେ ପଚରାଯିବାରୁ ସେ କହିଛନ୍ତି, ଏଗୁଡିକ କେତେକ ବିଷୟ ଯାହା ସମାଜକୁ ବିଭାଜନ କରେ ଏବଂ ସାମାଜିକ ବିବାଦକୁ ପ୍ରୋତ୍ସାହିତ କରେ ।
