ପାଟଣା,୧୭ା୯(ବୀରକିଶୋର ଦାଶ)କେନ୍ଦୁଝର ଜିଲା ପାଟଣା ବ୍ଲକ୍ କୃଷି ଅଧିକାରୀଙ୍କ କାର୍ଯ୍ୟାଳୟରୁ ଚାଷୀ ଖରିଫ ଋତୁରେ ବିନା ମୂଲ୍ୟରେ ବିରି ବିହନ ଆଣି ଚାଷ କରିଥିଲେ। ଠିକ୍ ପ୍ରଣାଳୀରେ ଚାଷ କରିବା ସହ ସାର ପ୍ରୟୋଗ ଦ୍ୱାରା ଗଛ ହୃଷ୍ଟପୁଷ୍ଟ ହୋଇଛି। ମାତ୍ର ଫଳ ଧରିବାର ଧାର୍ଯ୍ୟ ସମୟ ପାର ହୋଇଯାଇଥିଲେ ବି ଗଛରେ ଏ ପର୍ଯ୍ୟନ୍ତ ଫୁଲ ଧରୁନାହିଁ। ଫଳରେ ଚାଷୀ ଚିନ୍ତାରେ ଥିବା ବେଳେ କେତେଜଣ ରାଗରେ କ୍ଷେତରେ ଗୋରୁ ଛାଡ଼ିଦେଇଛନ୍ତି। ଏ ନେଇ ଚାଷୀମାନେ ପାଟଣା ବ୍ଲକ୍ କୃଷି ଅଧିକାରୀଙ୍କୁ ଅବଗତ କରିବା ପରେ ଶନିବାର କୃଷି ବିଭାଗର ଏକ ବିଶେଷଜ୍ଞ ଦଳ କ୍ଷେତ୍ର ପରିଦର୍ଶନ କରିଛନ୍ତି।
ସୂଚନା ଅନୁଯାୟୀ, ପାଟଣା ବ୍ଲକ୍ର ମାଧପୁର ଓ ସ୍ବାମ ଗ୍ରାମର ୩୦ରୁ ଊର୍ଦ୍ଧ୍ୱ ଚାଷୀ ଖରିଫ ଋତୁରେ ପାଟଣା କୃଷି ଅଧିକାରୀଙ୍କ କାର୍ଯ୍ୟାଳୟରୁ ବିନା ମୂଲ୍ୟରେ ବିରି ବିହନ ଆଣି ଚାଷ କରିଥିଲେ। ୧୦ ହେକ୍ଟର ପରିମିତ ଗୋଡ଼ା ଜମିରେ ବିରି ଚାଷ କରି ହଳ, ସାର, ଅଣୁସାର, ସରକାରୀ ବିରି, ଜିଙ୍କ୍ ଓ ମୂଲ ମଜୁରି ଖର୍ଚ୍ଚ କରି ବେଉଷଣ କରି ଗଛକୁ ବଢ଼ାଇଥିଲେ। ୮୫ ଦିନ ପରେ ବି ଗୋଟିଏ ହେଲେ ଗଛରେ ଫଳ ହେବା ତ ଦୂରର କଥା ଗୋଟିଏ ଫୁଲ ବି ଧରିନାହିଁ। ଗଛଗୁଡ଼ିକ ୫ ଫୁଟ୍ରୁ ଊର୍ଦ୍ଧ୍ୱ ଲମ୍ବ ହୋଇଥିଲେ ହେଁ ଫୁଲ ନ ଧରିବାରୁ କେତେଜଣ ଚାଷୀ ବାଧ୍ୟ ହୋଇ ବିରି ଗୋଡ଼ାରେ ଗୋରୁ ଛାଡ଼ି ଦେଇଛନ୍ତି। ଏ ନେଇ ପାଟଣା ବ୍ଲକ୍ କୃଷି ଅଧିକାରୀ ପରେଶ କୁମାର ଦାଶଙ୍କ ନିର୍ଦ୍ଦେଶକ୍ରମେ ଘଟଗାଁ କୃଷି ଜିଲା ଅଧିକାରୀ ସୁଧୀର ରଞ୍ଜନ ଦେହୁରୀଙ୍କ ନେତୃତ୍ୱରେ କେନ୍ଦୁଝର କୃଷିବିଜ୍ଞାନ କେନ୍ଦ୍ରର ବୈଜ୍ଞାନିକ ପ୍ରଶାନ୍ତ କୁମାର ମାଝି ଓ ନିଗମାନନ୍ଦ ବେହେରା ମାଧପୁର ଗ୍ରାମକୁ ଯାଇ କ୍ଷେତ୍ର ପରିଦର୍ଶନ କରିଛନ୍ତି। ଏହି ସମୟରେ ଚାଷୀ ଟୁନି ମହାନ୍ତ, ବାଙ୍କୁ ମହାନ୍ତ, ରବି ମହାନ୍ତ, ଅନାମ ମହାନ୍ତ ପ୍ରମୁଖ ଅଧିକାରୀମାନଙ୍କୁ ଅନ୍ତତଃ ସେମାନଙ୍କ ମୂଲ ମଜୁରି, ସାର, ହଳ ଖର୍ଚ୍ଚ ସରକାର ଯୋଗାଇଦିଅନ୍ତୁ ବୋଲି ଦାବି କରିଛନ୍ତି। ପରେ ଖବରଦାତାଙ୍କ ପ୍ରଶ୍ନରେ କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ କହିଛନ୍ତି, ପାଟଣା ବ୍ଲକ୍ର ବିରି ଚାଷ ସମସ୍ୟା ଦେଖିଛନ୍ତି। ଚାଷୀମାନେ ବେଉଷଣରେ ନ୍ୟୁଟ୍ରିଶନ ମ୍ୟାନେଜମେଣ୍ଟ ଠିକ୍ କରିଛନ୍ତି। ମାତ୍ର ଏହି ବିରି ବିହନ ବିୟୁଟେନ ଭେରାଇଟିର। ଏଭଳି ବିହନ ଅଧିକ ଶୀତପ୍ରବଣ ଅଞ୍ଚଳ ଜମ୍ମୁ କଶ୍ମୀର ଓ ହିମାଚଳ ପ୍ରଦେଶ ଅଞ୍ଚଳ ପାଇଁ ପ୍ରଯୁଜ୍ୟ। ଏଣୁ ଗଛରେ ଫୁଲ ଧରୁନାହିଁ। ଏହା ନ ଯୋଗାଇବାକୁ ରାଜ୍ୟ ସରକାରଙ୍କୁ ପରାମର୍ଶ ଦିଆଯିବ।
ଘଟଗାଁ କୃଷି ଜିଲା ଅଧିକାରୀ ଦେହୁରୀ କହିଛନ୍ତି, ପାଟଣା ସମେତ ଚମ୍ପୁଆ ବ୍ଲକ୍ରେ ମଧ୍ୟ ଚାଷୀ ହେକ୍ଟର ଜମିରେ ଉକ୍ତ ବିହନ ଚାଷ କରି ସମାନ ଦଶାରେ ପଡ଼ିଛନ୍ତି। ପ୍ରଭାବିତ ଚାଷୀମାନେ କିଭଳି କ୍ଷତିପୂରଣ ପାଇବେ ସେ ନେଇ ସରକାରଙ୍କୁ ଅବଗତ କରାଯିବ। ଆସନ୍ତା ବର୍ଷ ଉକ୍ତ ଗାଁକୁ ପ୍ରାଥମିକତା ଭିତ୍ତିରେ ଉତ୍କୃଷ୍ଟ କିସମର ବିହନ ଯୋଗାଇ ଦିଆଯିବ। ଟିମ୍ରେ ପାଟଣା ବ୍ଲକ୍ କୃଷି ଅଧିକାରୀ ପରେଶ କୁମାର ଦାଶ, ବର୍ଷା ବୈଶାଳୀ, କୃଷି ଅଧିଦର୍ଶକ ଅଭୟ କୁମାର ରାଉତ, ବୀରଭଦ୍ର ନାଏକ ଓ ଜଳବାୟୁ ସ୍ଥିର କୃଷି ଯୋଜନା ଅଧିକାରୀ ବଂଶୀଧର ମହାନ୍ତ ପ୍ରମୁଖ ସାମିଲ ଥିଲେ।
