ନୂଆଦିଲ୍ଲୀ,୧୨ା୭(ପି.ଟି.): କରୋନା ସଂକ୍ରମଣକୁ ୭ ମାସ ବିତିଥିଲେ ହେଁ ଏପର୍ଯ୍ୟନ୍ତ ଟିକା ବାହାରିପାରି ନାହିଁ। ପ୍ରତିଷେଧକ ଟିକା ନ ଥିବା ଏବଂ ଉପଯୁକ୍ତ ଚିକିତ୍ସା ବାହାରିପାରି ନ ଥିବାରୁ କିଏ ପ୍ରଥମେ ବଜାରକୁ ଏହି ଟିକା ଆଣିବ ତାକୁ ନେଇ ପ୍ରତିଦ୍ୱନ୍ଦ୍ୱିତା ସୃଷ୍ଟି ହୋଇଛି। ଟିକାକୁ ନେଇ ବ୍ୟଗ୍ରତା ବଢ଼ୁଥିବାବେଳେ କେତେକ ସଂସ୍ଥା ଏହା ପ୍ରସ୍ତୁତ କରିଥିବା ଦାବି କରିଛନ୍ତି, ଯାହା ପରୀକ୍ଷା ପର୍ଯ୍ୟାୟରେ ରହିଛି। ତେବେ କୋଭିଡ୍-୧୯ ପୂର୍ବରୁ ମଧ୍ୟ କେତେକ ବିପଜ୍ଜନକ ସଂକ୍ରାମକ ରୋଗ ରହିଛି, ଯାହାର ଟିକା ଆଜି ପର୍ଯ୍ୟନ୍ତ ଉପଲବ୍ଧ ହୋଇପାରିନାହିଁ। ସେହି ସଂକ୍ରାମକ ରୋଗ ହେଲା ଏଚ୍ଆଇଭି, ମେର୍ସ, ଏନ୍ସେଫାଲାଇଟ୍ସ ଏବଂ ସାର୍ସ।
ହ୍ୟୁମାନ ଇମ୍ୟୁନୋ ଡେଫିସିଏନ୍ସି ଭାଇରସ୍ (ଏଚ୍ଆଇଭି) ହେଉଛି ଏକ ମାରାତ୍ମକ ଭୂତାଣୁ ଯାହା ଏଡ୍ସ ସୃଷ୍ଟି କରିଥାଏ। ବିଶ୍ୱରେ ୩୬.୯ ନିୟୁତ ଲୋକ ଏଥିରେ ଆକ୍ରାନ୍ତ। ଯଦିଓ ଭାରତ ସମେତ ବିଭିନ୍ନ ଦେଶ ଏଚ୍ଆଇଭି ସଂକ୍ରମଣକୁ ହ୍ରାସ କରିବାରେ ସଫଳ ହୋଇଛନ୍ତି, ତଥାପି ଏପର୍ଯ୍ୟନ୍ତ ଏହାର ପ୍ରତିଷେଧକ ଟିକା ବାହାରି ପାରିନାହିଁ। ଚାଇନା ବୈଜ୍ଞାନିକମାନେ ସିଆର୍ଆଇଏସ୍ପିଆର୍ ଟେକ୍ନୋଲୋଜି ବ୍ୟବହାର କରି ପରୀକ୍ଷା ଚଳାଇଥିଲେ ହେଁ ସଫଳ ହୋଇପାରି ନାହାନ୍ତି। ଏଚ୍ଆଇଭି ଭୂତାଣୁ ବିଭିନ୍ନ ପ୍ରକାରେ ଇମ୍ୟୁନ୍ ସିଷ୍ଟମକୁ ସଂକ୍ରମଣ କରୁଥିବାରୁ ସଫଳ ଟିକା ପ୍ରସ୍ତୁତ କରିବା ସମ୍ଭବ ହୋଇପାରୁନାହିଁ।
ସେହିପରି ଅନ୍ୟ ଏକ ସଂକ୍ରାମକ ରୋଗ ହେଲା ମେର୍ସ। କୋଭିଡ୍-୧୯ ଭଳି ଏହି ମିଡିଲ୍ ଇଷ୍ଟ ରେସ୍ପିରେଟୋରି ସିଣ୍ଡ୍ରୋମ୍ (ମେର୍ସ) ଭୂତାଣୁ ସଂକ୍ରମଣ କରିଥାନ୍ତି। ୨୦୨୧ରେ ପ୍ରଥମେ ମଧ୍ୟପ୍ରାଚ୍ୟ ଦେଶଗୁଡ଼ିକରେ ଦେଖାଦେଇଥିଲା। ସେଠାର ସରକାର ବିଭିନ୍ନ ପଦକ୍ଷେପ ନେଇ ସଂକ୍ରମଣକୁ ରୋକିପାରିଛନ୍ତି। ଏପର୍ଯ୍ୟନ୍ତ ଏହାର ପ୍ରତିଷେଧକ ଟିକା ବାହାରିନାହିଁ। ଗତ ଏପ୍ରିଲରେ ମେର୍ସ ଟିକାର ବିକାଶ ସମ୍ପର୍କରେ ଘୋଷଣା କରାଯାଇଥିଲା ଓ ଏହାକୁ କୋଭିଡ୍-୧୯ ଚିକିତ୍ସାରେ ବ୍ୟବହାର କରାଯାଇପାରିବ ବୋଲି କୁହାଯାଇଥିଲା। ଏହା କ୍ଲିନିକାଲ ପରୀକ୍ଷା ପର୍ଯ୍ୟାୟରେ ରହିଛି।
ଅନ୍ୟତମ ମାରାତ୍ମକ ରୋଗ ଆକ୍ୟୁଟ୍ ଏନ୍ସେଫାଲାଇଟିସ୍, ଯାହା ୨୦୦୮ରୁ ୨୦୧୪ ମଧ୍ୟରେ ବିଭିନ୍ନ ଦେଶକୁ ସଂକ୍ରମିତ ହେବା ସହ ୪୪ ହଜାରରୁ ଅଧିକ ଲୋକଙ୍କ ଜୀବନ ନେଇଥିଲା। ଜାପାନୀ ଏନ୍ସେଫାଲାଇଟିସ୍ ଭୂତାଣୁରୁ ଏହି ସଂକ୍ରମଣ ଆରମ୍ଭ ହୋଇଥିଲା। ଏହାର ଏପର୍ଯ୍ୟନ୍ତ ଟିକା ପ୍ରସ୍ତୁତ ହୋଇପାରିନାହିଁ। ଗତବର୍ଷ ବିହାର ଓ ଉତ୍ତରପ୍ରଦେଶରେ ବହୁ ଶିଶୁ ଓ ଯୁବଗୋଷ୍ଠୀ ଏହି ରୋଗରେ ପୀଡ଼ିତ ହୋଇଥିଲେ। ଏହା ସ୍ନାୟୁ ଓ ମସ୍ତିଷ୍କର କାର୍ଯ୍ୟକାରିତାକୁ ନଷ୍ଟ କରିଦେଇଥାଏ।
୨୦୦୩ରେ ଚାଇନାରେ ସୃଷ୍ଟି ହୋଇଥିବା ଅନ୍ୟତମ ମାରାତ୍ମକ ସଂକ୍ରାମକ ରୋଗ ସିଭିଅର୍ ଆକ୍ୟୁଟ୍ ରେସ୍ପିରେଟୋରି ସିଣ୍ଡ୍ରୋମ୍ (ସାର୍ସ)ର ଲକ୍ଷଣ କୋଭିଡ୍ ଭଳି। ସାର୍ସ ସଂକ୍ରମଣ ଯଥେଷ୍ଟ ବୃଦ୍ଧି ପାଇଥିବା ବେଳେ ଅନେକ ବୈଜ୍ଞାନିକ ଟିକା ପ୍ରସ୍ତୁତି ଯୋଜନାରେ ଥିଲେ। ପରବର୍ତ୍ତୀ ପର୍ଯ୍ୟାୟରେ ସଂକ୍ରମଣ ହ୍ରାସ ପାଇବାରୁ ଟିକା ପାଇଁ ସରକାର ପାଣ୍ଠି ଯୋଗାଇ ନ ଥିଲେ। ଫଳରେ ଆଜି ପର୍ଯ୍ୟନ୍ତ ସାର୍ସ ପାଇଁ ଟିକା ବାହାରିପାରି ନାହିଁ।
