ନୂଆଦିଲ୍ଲୀ,୪।୬: ରାଷ୍ଟ୍ରୀୟ ରାଜଧାନୀ କ୍ଷେତ୍ର (NCR) ରେ ବାୟୁ ପ୍ରଦୂଷଣ ବିରୋଧରେ ଏକ ର୍ନିଣ୍ଣାୟକ ଏବଂ ବଡ଼ ପଦକ୍ଷେପ ଗ୍ରହଣ କରି ରାଜ୍ୟ ସରକାର ‘No PUCC, No Fuel’ (ନୋ ପିୟୁସିସି, ନୋ ଫ୍ୟୁଏଲ) ନିୟମ ଲାଗୁ କରିବାକୁ ବଡ଼ ନିଷ୍ପତ୍ତି ନେଇଛନ୍ତି। ବର୍ଷ ୨୦୨୬ ମଧ୍ୟରେ ପ୍ରଦୂଷଣ ସ୍ତରରେ ୩୦ ରୁ ୩୫ ପ୍ରତିଶତ ପର୍ଯ୍ୟନ୍ତ ହ୍ରାସ ଆଣିବା ଉଦ୍ଦେଶ୍ୟରେ ଏବେ ପୁରୁଣା ଏବଂ ପ୍ରଦୂଷଣ ବଢ଼ାଉଥିବା ଗାଡ଼ିଗୁଡ଼ିକ ଉପରେ ସମ୍ପୂର୍ଣ୍ଣ ଭାବେ କଟକଣା ଲଗାଯାଉଛି। ମୁଖ୍ୟ ଶାସନ ସଚିବ ଏସ.ପି. ଗୋୟଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଏହି ନୂଆ ନିୟମକୁ ସବୁଜ ସଙ୍କେତ ମିଳିଛି। ଆସନ୍ତୁ ଜାଣିବା ଅକ୍ଟୋବର ୧ ତାରିଖରୁ ଏନସିଆରର ପେଟ୍ରୋଲ ପମ୍ପଗୁଡ଼ିକରେ କ’ଣ ବଡ଼ ପରିବର୍ତ୍ତନ ହେବାକୁ ଯାଉଛି।
ଉତ୍ତର ପ୍ରଦେଶର ଏନସିଆର ଜିଲ୍ଲାଗୁଡ଼ିକରେ (ଯେପରିକି ଗାଜିଆବାଦ, ନୋଏଡା, ଗ୍ରେଟର ନୋଏଡା, ମିରଟ) ଥିବା ୧୦୪୧ଟି ପେଟ୍ରୋଲ ପମ୍ପରେ ଆସନ୍ତା ଅକ୍ଟୋବର ୧ ତାରିଖରୁ ଏହି ନୂଆ ନିୟମ ଲାଗୁ ହେବ। ଯଦି ଆପଣଙ୍କ ଗାଡ଼ିର ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର (PUCC Pollution Under Control Certificate) ନାହିଁ, ତେବେ ଆପଣଙ୍କୁ ପେଟ୍ରୋଲ ପମ୍ପରୁ ପେଟ୍ରୋଲ, ଡିଜେଲ କିମ୍ୱା ସିଏନଜି (CNG) ଦିଆଯିବ ନାହିଁ। ବାୟୁର ଗୁଣବତ୍ତା ସୁଧାରିବା ପାଇଁ ସରକାରଙ୍କ ପକ୍ଷରୁ ଏହି ପଦକ୍ଷେପ ନିଆଯାଇଛି।
ଏହି ନୂଆ ନିୟମକୁ କଡ଼ାକଡ଼ି ଭାବେ ଲାଗୁ କରିବା ପାଇଁ ଏନସିଆରର ୧,୦୪୧ଟି ପେଟ୍ରୋଲ ପମ୍ପରେ ଅଟୋମେଟିକ ନମ୍ୱର ପ୍ଲେଟ ରେକଗନିସନ (ANPR) କ୍ୟାମେରା ଲଗାଯିବ। ଯେମିତି ହିଁ କୌଣସି ଗାଡ଼ି ତେଲ ପକାଇବା ପାଇଁ ପେଟ୍ରୋଲ ପମ୍ପ ଭିତରକୁ ପ୍ରବେଶ କରିବ, ଏହି ହାଇ-ଟେକ କ୍ୟାମେରା ଗାଡ଼ିର ନମ୍ୱର ପ୍ଲେଟକୁ ସ୍କାନ କରିନେବ। ସଭର୍ର୍ ସହ ସଂଯୁକ୍ତ ଏହି ସିଷ୍ଟମ ତୁରନ୍ତ ଜଣାଇଦେବ ଯେ ସେହି ଗାଡ଼ିର ପ୍ରଦୂଷଣ ସାର୍ଟିଫିକେଟ (PUCC) ବୈଧ ଅଛି କି ନାହିଁ।
