ଦୁବାଇ,୨୪ା୨: ପାକିସ୍ତାନ ବିପକ୍ଷ ଚାମ୍ପିୟନ୍ସ ଟ୍ରଫି ମ୍ୟାଚରେ ଚାପ ପରିସ୍ଥିତିରେ ବିରାଟ କୋହଲି ଯେଉଁ ଭଳି ଅପରାଜିତ ଶତକୀୟ ଇନିଂସ ଖେଳିଥିଲେ, ତାହାକୁ ପୂର୍ବତନ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର ଏବଂ ବିସିସିଆଇ ଉପ ସଭାପତି ରାଜୀବ ଶୁକ୍ଳା ପ୍ରଶଂସା କରିଛନ୍ତି। କୋହଲିଙ୍କ ଶତକ ଯୋଗୁ ଭାରତ ୬ ଉଇକେଟରେ ପାକିସ୍ତାନ ବିପକ୍ଷ ମ୍ୟାଚକୁ ଜିତି ପାରିଛି।
ଚାପ ପରିସ୍ଥିତିରେ କେଉଁ ଭଳି ଦେଶ ପାଇଁ ଖେଳାଯାଏ, ତାହା କୋହଲି ଦେଖାଇଥିଲେ। ଜବରଦସ୍ତ ଶତକ ବଳରେ କୋହଲି ଦେଶ ପାଇଁ ମ୍ୟାଚ ଜିତିବା ସହ ଅନେକ ହୃଦୟ ଜିତିଛନ୍ତି।
ଯଦି ଆମେ କୋହଲିଙ୍କ ଇନିଂସକୁ ଦେଖିବା, ତେବେ ସେ କଦାପି ଶତକ ଲାଗି ବିବ୍ରତ ହୋଇ ନ ଥିଲେ। ଦଳ ଲାଗି ମ୍ୟାଚ ଜିତିବାକୁ ସେ ପ୍ରାଥମିକତା ଦେଇଥିଲେ। ସେ ଚୌକା କିମ୍ବା ଛକା ବଦଳରେ ଷ୍ଟ୍ରାଇକ ରୋଟେଟ ଉପରେ ଅଧିକ ଭରସା କରିଥିଲେ। ସେ ଶେଷ ପର୍ଯ୍ୟନ୍ତ ଖେଳି ଭାରତକୁ ମ୍ୟାଚ ଜିତାଇବାକୁ ଚାହୁଁଥିଲେ। ତାଙ୍କ ଭଳି ବଡ଼ ଖେଳାଳିଙ୍କ ପାଇଁ ବ୍ୟକ୍ତିଗତ ସ୍କୋର ଅଧିକ ଗୁରୁତ୍ୱପୂର୍ଣ୍ଣ ନୁହେଁ ବୋଲି ବିସିସିଆର ପୂର୍ବତନ ସଭାପତି ତଥା ପୂର୍ବତନ କ୍ରୀଡ଼ାମନ୍ତ୍ରୀ ଠାକୁର କହିଛନ୍ତି।
ସେହିଭଳି ଶୁକ୍ଳା ପ୍ରକାଶ କରିଛନ୍ତି ଯେ, ଏହା କୋହଲିଙ୍କର ଏକ ଚମତ୍କାର ଶତକ ଥିଲା। ସେ ଯେଉଁ ଭଳି ଦଳକୁ ସ୍ଥିରତା ପ୍ରଦାନ କରିଥିଲେ, ତାହା ଅନ୍ୟ କେହି କରିପାରିବେ ନାହିଁ। ଶ୍ରେୟସ ଓ ଗିଲ ମଧ୍ୟ ଖୁବ ଭଲ ଖେଳିଥିଲେ। ଭାରତୀୟ ଦଳ ଫୁଲ ଫର୍ମକୁ ଫେରିଛି। ସମସ୍ତ ଖେଳାଳି ସମ୍ପୂର୍ଣ୍ଣ ରୂପେ ଫିଟ ଅଛନ୍ତି ଏବଂ ସେମାନେ ପୂରା ଷ୍ଟାଇଲରେ ପାକିସ୍ତାନକୁ ହରାଇଥିଲେ। ଭାରତୀୟ ଦଳ ଫାଇନାଲ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିବା ଜଣାପଡ଼ୁଛି। ଏତଦ ବ୍ୟତୀତ ଆଇପିଏଲ ଚେୟାରମ୍ୟାନ ଅରୁଣ ଧୁମଲ କହିଛନ୍ତି ଯେ, ପୂରା ଦେଶ କୋହଲିଙ୍କ ଶତକ ଦେଖିବାକୁ ଅପେକ୍ଷା କରିଥିଲା। ସେ ଯେଉଁ ଭଳି ଖେଳିଲେ, ତାହାକୁ ଆମେ ଖୁବ ଉପଭୋଗ କଲୁ। ମୁଁ ନିଶ୍ଚିତ ଯେ, ଆଇସିସି ଟୁର୍ନାମେଣ୍ଟରେ ଭାରତୀୟ ଦଳର ଭଲ ପ୍ରଦର୍ଶନ ପଛରେ ଆଇପିଏଲର ବଡ଼ ଭୂମିକା ରହିଛି।
