ଆରଡ଼ି, ୧୮।୧ (ଡି.ଏନ.ଏ.) ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଆରଡ଼ି ପଞ୍ଚାୟତ ୯ ନଂ. ଓ୍ବାର୍ଡର ସଂଶୋଧିତ ଭୋଟର ତାଲିକାରୁ ୪୦ଜଣ ବ୍ୟକ୍ତିଙ୍କ ନାମ ବାଦ୍ ପଡିଛି। ଏହି ତାଲିକାରୁ ଜଣେ ଆଶାୟୀ ସରପଞ୍ଚ ପ୍ରାର୍ଥିନୀଙ୍କ ପରିବାରର ୪ଜଣଙ୍କ ନାମ ମଧ୍ୟ ନ ଥିବା ଜଣାପଡ଼ିଛି। ଶାସକ ଦଳର ବିଧାୟକ ଓ କେତେଜଣ ପଞ୍ଚାୟତସ୍ତରୀୟ ନେତାଙ୍କ ଚକ୍ରାନ୍ତ ଓ ହୀନ ରାଜନୀତି ଯୋଗୁ ଏପରି ହୋଇଥିବା ଚାନ୍ଦବାଲିର ଭାଜପା ନେତା ସୁରେଶ ସାହୁ, କମଳାକାନ୍ତ ସୂତାର ଓ ଦେବଦତ୍ତ ପାଢ଼ୀ ଅଭିଯୋଗ କରିଛନ୍ତି। ୩ ଦିନ ହେଲା ପ୍ରାୟ ୧୦ ପରିବାରର ଲୋକେ ବିଡିଓଙ୍କ ଦ୍ୱାରସ୍ଥ ହୋଇଥିଲେ ବି କୌଣସି ସୁଫଳ ନ ମିଳିବାରୁ ସୋମବାର ଆରଡ଼ିରୁ ଭାଜପା କର୍ମୀ ତଥା ୫୦ ମହିଳା ଓ ପୁରୁଷ ଚାନ୍ଦବାଲି ବ୍ଲକ ଅଫିସ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି। ସେମାନେ ବିଡିଓଙ୍କ ବିରୋଧରେ ନାରାବାଜି କରିଥିଲେ। ପରେ ୧୦ରୁ ଊର୍ଦ୍ଧ୍ୱ ମହିଳା ଓ ପୁରୁଷ ଆମରଣ ଅନଶନରେ ବସିଛନ୍ତି। ସେମାନଙ୍କ ମଧ୍ୟରୁ ଜଣେ ମହିଳା ଗୁରୁତର ହୋଇପଡ଼ିବାରୁ ତାଙ୍କୁ ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।
ସମ୍ପର୍କରେ ଚାନ୍ଦବାଲି ବିଡିଓ ଜ୍ୟୋତି ବିକାଶ ଦାଶଙ୍କୁ ପଚାରିବାରୁ ଗତ ନଭେମ୍ବରରେ ଭୋଟର ତାଲିକା ସଂଶୋଧନ ବେଳେ ଉକ୍ତ ବ୍ୟକ୍ତିମାନଙ୍କ ନାଁ ନ ଥିଲା। ସେତେବେଳେ ସଂଶୋଧନ କରି ନ ଥିବାରୁ ଏଭଳି ସମସ୍ୟା ଉପୁଜିଛି। ଏନେଇ ସେ ଜିଲାପାଳଙ୍କୁ ଚିଠି ଲେଖି ପଦକ୍ଷେପ ନେବା ପାଇଁ ଜଣାଇଛନ୍ତି। ତେବେ ଏହି ସଂଶୋଧନ ତାଙ୍କ ପରିସର ବାହାରେ ବୋଲି ସେ କହିଛନ୍ତି।
