ନବରଙ୍ଗପୁର,୨୯।୭(ସଦାଶିବ ପ୍ରହରାଜ): ନବରଙ୍ଗପୁର ଜିଲାର ଶିକ୍ଷାନୁଷ୍ଠାନ ମାନଙ୍କରେ ଅନେକ ସମସ୍ୟା ଲାଗିରହିଛି। ଅଭିଯୋଗ ପରେ କାର୍ଯ୍ୟାନୁଷ୍ଠାନ ନ ହେବାରୁ ଶିକ୍ଷକ ଓ କର୍ମଚାରୀଙ୍କ ମଧ୍ୟରେ ଅସନ୍ତୋଷ ଦେଖାଦେଉଛି। ଏପରି ଏକ ଘଟଣା ରାଇଘର ବ୍ଲକ କଚରପରା ଅଲେଖ ମହିମା ହାଇସ୍କୁଲରେ ଘଟିଛି। ସ୍କୁଲ ପ୍ରଧାନ ଶିକ୍ଷୟିତ୍ରୀ କିରାଣି ପ୍ରହଲ୍ଲାଦ ବେହେରାଙ୍କ ଉପରେ ଚପଲ ଫୋପାଡ଼ିବା ଘଟଣାର ତଦନ୍ତ ରିପୋର୍ଟ ଆସିବା ପରେ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଇନାହିଁ। ଏହା ବିରୋଧରେ ପ୍ରହଲ୍ଲାଦ ଶୁକ୍ରବାର ଦିନସାରା ଭୋକରେ ଜିଲାଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ ଅପେକ୍ଷା କରିଥିଲେ। ଜିଲା ଶିକ୍ଷାଧିକାରୀ ସା ୭.୪୦ ପର୍ଯ୍ୟନ୍ତ ନ ଆସିବାରୁ ସେ ଅପେକ୍ଷା କରି ଫେରିଯାଇଥିଲେ ।
ନବରଙ୍ଗପୁର ଜିଲା ରାଇଘର ବ୍ଲକ କଚରପରା ଅଲେଖ ମହିମା ହାଇସ୍କୁଲ ପ୍ରଧାନଶିକ୍ଷୟିତ୍ରୀ ଜୁନ ୬ରେ ଚପଲ ଫୋପାଡି ଗାଳିଗୁଲଜ କରିଥିବା ନେଇ ଜୁନ ୯ରେ କିରାଣି ପ୍ରହଲ୍ଲାଦ ବେହେରା ଡିଇଓ ପ୍ରଦୀପ କୁମାର ନାଗଙ୍କୁ ଲିଖିତ ଅଭିଯୋଗ କରିଥିଲେ। ନିଯୁକ୍ତି ପରଠାରୁ ଆକ୍ରୋସ ରଖି ପ୍ରଧାନଶିକ୍ଷୟିତ୍ରୀ ବିଭିନ୍ନ ସମୟରେ ହଇରାଣ କରିବା ସହ ୯ ବର୍ଷରେ ୧୦ ଥର ଦରମା ବନ୍ଦ କରିଥିବା ଅଭିଯୋଗ ପତ୍ରରେ ଉଲ୍ଲେଖ ଥିଲା। ୨୬ ତାରିଖରେ ଏଡିଇଓ ରେଶମ ଲାଲ ନାୟକ ଘଟଣାର ତଦନ୍ତ କରି ଡିଇଓଙ୍କୁ ରିପୋର୍ଟ ପ୍ରଦାନ କରିଛନ୍ତି। ଏଡିଇଓ ତଦନ୍ତ କରି ଫେରିବା ପରେ ପ୍ରଧାନ ଶିକ୍ଷୟିତ୍ରୀ ବିଦ୍ୟାଳୟକୁ ଆସିବାକୁ ମନା କରୁଛନ୍ତି। ଏବେ ପୁଣି ଧମକଚମକ ମିଳୁଥିବାରୁ ଜୀବନ ପ୍ରତି ବିପଦ ଥିବା ପ୍ରହଲ୍ଲାଦ ଅଭିଯୋଗ କରିଛନ୍ତି। ପ୍ରଧାନ ଶିକ୍ଷୟିତ୍ରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନ ଥିବାରୁ ଜିଲା ଶିକ୍ଷା ଅଧିକାରୀଙ୍କୁ ଭେଟି ଅଭିଯୋଗ ଜଣାଇବାକୁ ଆସିଥିବା ପ୍ରହଲ୍ଲାଦ କହିଛନ୍ତି। ଏନେଇ ଅତିରିକ୍ତ ଜିଲା ଶିକ୍ଷାଧିକାରୀ ରେଶମ ଲାଲ ନାୟକଙ୍କୁ ପଚାରିବାରୁ ତଦନ୍ତ ରିପୋର୍ଟ ଜିଲା ଶିକ୍ଷା ଅଧିକାରୀଙ୍କୁ ପ୍ରଦାନ କରାଯାଇଛି। ପରବର୍ତ୍ତୀ ପଦକ୍ଷେପ ଡିଇଓ ନେବେ ବୋଲି ସେ କହିଛନ୍ତି। ଘଟଣା ସମ୍ପର୍କରେ ଜାଣିବାକୁ ୯୭୭୭୯୪୬୬୧୫ ନମ୍ବରରେ ପ୍ରଧାନ ଶିକ୍ଷୟିତ୍ରୀ ଭୁବନ ମୋହନ ନାୟକଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଉଠାଇ ନ ଥିଲେ।
