ପାଟନା,୫ ।୯: ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବଙ୍କ ଦଳ ରାଷ୍ଟ୍ରୀୟ ଜନତା ଦଳ(ଆରଜେଡି) ସହ ମିଶି ସରକାର ଗଠନ କରିବା ପରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏବେ ଭାଜପା ମୁକ୍ତ ଭାରତ ଆହ୍ୱାନ ଦେଇ ବିରୋଧୀ ଦଳଙ୍କୁ ଭାଜପା ବିରୋଧରେ ଏକାଠି କରିବାରେ ଲାଗିଛନ୍ତି । ତାଙ୍କ ନେତୃତ୍ୱରେ ବିରୋଧି ଦଳ ଗୁଡିକୁ ଭାଜପା ବିରୋଧରେ ଏକଜୁଟ କରିବାକୁ ମୁଖ୍ୟମନ୍ତ୍ରୀ ପ୍ରଥମେ ସମାଜବାଦୀ ଗୋଷ୍ଠୀ ଗଠନ କରିବାକୁ ଚାହୁଁଛନ୍ତି । ଏହାପରେ ସେ ଆଞ୍ଚଳିକ ଦଳ ଗୁଡିକ ନିକଟକୁ ଯିବେ । ଏହି ପର୍ଯ୍ୟାୟରେ ସୋମବାରଠାରୁ ନୀତୀଶଙ୍କ ୩ ଦିନିଆ ଦିଲ୍ଲୀ ଗସ୍ତ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି ।
ଗୋଟିଏ ପଟେ ରାହୁଲ ଗାନ୍ଧୀ ୭ ସେପ୍ଟେମ୍ବରରେ କଂଗ୍ରେସର ‘ଭାରତ ଯୋଡୋ ଯାତ୍ରା’ ଆରମ୍ଭ କରୁଥିବା ବେଳେ ଅନ୍ୟପଟେ ନୀତୀଶଙ୍କ ଭାଜପା ବିରୋଧି ଅଭିଯାନ ଗୁରୁତ୍ୱପୂର୍ଣ୍ଣ । ତେବେ ନୀତୀଶଙ୍କ ଏହି ପ୍ରୟାସକୁ ନେଇ ଏପର୍ଯ୍ୟନ୍ତ ତ୍ରୁଣମୂଳ କଂଗ୍ରେସ, ଆମ ଆଦମୀ ପାର୍ଟି ଓ ଟିଆରଏସ ଚୁପ ରହିଛନ୍ତି ।
ତେବେ ନୀତୀଶଙ୍କର ଏହି ବିରୋଧି ଏକତାକୁ ଆରମ୍ଭରୁ ଗ୍ରହଣ ଲାଗିଛି । ସୂଚନାଯୋଗ୍ୟ, ତେଲେଙ୍ଗାନାର ମୁଖ୍ୟମନ୍ତ୍ରୀ କେସିଆର ନୀତୀଶଙ୍କ ଏହି ଯୋଜନା ସହ ସହମତ ନ ଥିବା କୁହାଯାଉଛି । ହେଲେ ପୂର୍ବରୁ ଦାବି କରାଯାଉଥିଲା କି କେସିଆର ବିହାର ଗସ୍ତ କରିବା ପରେ ସ୍ପଷ୍ଟ ହୋଇଛି ଯେ ବିରୋଧୀ ଏକତାର ଆରମ୍ଭ ହୋଇଛି । ହେଲେ ଜେଡିୟୁର ମହାସଚିବ କେସି ତ୍ୟାଗୀ ରବିବାର କହିଛନ୍ତି, କେସିଆର ଚାହୁଁଛନ୍ତି ଭାଜପା ବିରୋଧରେ ଯେଉଁ ମେଣ୍ଟ ହେଉଛି ସେଥିରେ କଂଗ୍ରେସ ନ ରହୁ । ହେଲେ ଜେଡିୟୁ କହିଛି, କଂଗ୍ରେସ ଓ ବାମଦଳକୁ ଛାଡି ଭାଜପା ବିରୋଧୀ କୌଣସି ମୋର୍ଚ୍ଚା ଗଠନ ହୋଇପାରିବ ନାହିଁ ।
