ନୂଆଦିଲ୍ଲୀ,୪।୯: ଜାତୀୟ ରାଜପଥ କିମ୍ବା ଏକ୍ସପ୍ରେସୱେରେ ଯାତ୍ରା ସମୟରେ ଖରାପ ପବ୍ଲିକ ଟଏଲେଟ୍କୁ ନେଇ ଯାତ୍ରୀମାନେ ପ୍ରାୟତଃ ଅସୁବିଧାରେ ପଡ଼ନ୍ତି। ଟଏଲେଟ୍ ନିର୍ମାଣ ହୋଇଥିଲେ ମଧ୍ୟ ନିୟମିତ ସଫେଇ ଅଭାବରୁ ଏହାର ବ୍ୟବହାର କରିବା କଷ୍ଟକର ହୋଇଥାଏ। ଏହି ସମସ୍ୟାର ସମାଧାନ ପାଇଁ ଏବେ ନ୍ୟାଶନାଲ ହାଇୱେ ଅଥରିଟି ଅଫ ଇଣ୍ଡିଆ (NHAI) ପକ୍ଷରୁ ଏକ ଆକର୍ଷଣୀୟ ପଦକ୍ଷେପ ନିଆଯାଇଛି।
NHAIର ‘କ୍ଲିନ ଟଏଲେଟ୍ ପିକ୍ଚର୍ ଚ୍ୟାଲେଞ୍ଜ’ ଅଧୀନରେ ଜାତୀୟ ରାଜପଥରେ ଥିବା ଖରାପ ଟଏଲେଟ୍ର ଫଟୋ ଉଠାଇ ଅଭିଯୋଗ କଲେ ଯାତ୍ରୀଙ୍କୁ ୧,୦୦୦ର ଫ୍ରି FASTag ରିଚାର୍ଜ ମିଳିବ। ସେପ୍ଟେମ୍ବର ୨୦୨୫ରେ ଆରମ୍ଭ ହୋଇଥିବା ଏହି ଅଭିଯାନର ସଫଳତାକୁ ଦେଖି NHAI ଏହାକୁ ୩୦ ଜୁନ ୨୦୨୭ ପର୍ଯ୍ୟନ୍ତ ବଢ଼ାଇଛି।
NHAI ଅନୁଯାୟୀ, ୨୦୨୬ରେ ଏପର୍ଯ୍ୟନ୍ତ ୪୨୯ ଜଣ ଯାତ୍ରୀ ଟଏଲେଟ୍ର ଫଟୋ ରିପୋର୍ଟ କରି ୧,୦୦୦ର FASTag ରିଚାର୍ଜ ପାଇଛନ୍ତି।
ଯଦି ଜାତୀୟ ରାଜପଥରେ ଯାତ୍ରା ସମୟରେ କୌଣସି ଖରାପ ଟଏଲେଟ୍ ଦେଖନ୍ତି, ତେବେ ମୋବାଇଲରେ ଏହାର ସ୍ପଷ୍ଟ ଫଟୋ ଉଠାନ୍ତୁ। ଏହାପରେ NHAIର ‘ରାଜମାର୍ଗଯାତ୍ରା (Rajmargyatra)’ ଆପ ଖୋଲି ଫଟୋ ଅପଲୋଡ କରିବାକୁ ପଡ଼ିବ।
ଫଟୋରେ ଜିଓ-ଟ୍ୟାଗିଂ ଏବଂ ଟାଇମ-ଷ୍ଟାମ୍ପ ରହିବା ଆବଶ୍ୟକ। ଫଟୋ ସବମିଟ ସମୟରେ ନିଜର ନାମ, ଲୋକେସନ, ମୋବାଇଲ ନମ୍ବର ଏବଂ ଗାଡ଼ିର ରେଜିଷ୍ଟ୍ରେଶନ ନମ୍ବର ଦେବାକୁ ହେବ। ଅଭିଯୋଗ ଓ ଫଟୋର ଯାଞ୍ଚ ପରେ ଯୋଗ୍ୟ ଯାତ୍ରୀଙ୍କ ଗାଡ଼ି ସହ ଲିଙ୍କ ହୋଇଥିବା FASTag ଆକାଉଣ୍ଟରେ ୧,୦୦୦ ଟଙ୍କା ରିୱାର୍ଡ ଜମା କରାଯିବ।
ଏହି ନିୟମଗୁଡ଼ିକ ମନେ ରଖନ୍ତୁ
-ଗୋଟିଏ ଗାଡ଼ିର ରେଜିଷ୍ଟ୍ରେସନ ନମ୍ବର ପାଇଁ ସମଗ୍ର ସ୍କିମ୍ରେ କେବଳ ଥରେ ୧,୦୦୦ ରିୱାର୍ଡ ମିଳିବ।
-ଗୋଟିଏ ଟଏଲେଟ୍କୁ ନେଇ ଏକାଧିକ ଲୋକ ଅଭିଯୋଗ କଲେ, ସର୍ବପ୍ରଥମେ ଫଟୋ ଅପଲୋଡ କରିଥିବା ୟୁଜରଙ୍କୁ ରିୱାର୍ଡ ମିଳିବ।
-ଏହି ରିୱାର୍ଡ ନନ-ଟ୍ରାନ୍ସଫରେବଲ। ଏହାକୁ ନଗଦ ଟଙ୍କାରେ ପରିଣତ କରିହେବ ନାହିଁ।
ରିୱାର୍ଡ କେବଳ FASTag ରିଚାର୍ଜ ଭାବେ ମିଳିବ।
-ଏହି ସୁବିଧା କେବଳ NHAI ଅଧୀନରେ ଥିବା ଟଏଲେଟ୍ ଫ୍ୟାସିଲିଟି ପାଇଁ ଲାଗୁ ହେବ।
