ଆବୁଧାବି, ୧୦।୧୧- ୨୦୧୯ ଆଇସିସି ଦିନିକିଆ ବିଶ୍ୱକପ୍ ଫାଇନାଲରେ ନ୍ୟୁଜିଲାଣ୍ଡକୁ ରୋଚକ ଢ଼ଙ୍ଗରେ ହରାଇ ଇଂଲଣ୍ଡ ବିଶ୍ୱକପ୍ ହାତେଇଥିଲା। ତା’ ପରେ ପ୍ରଥମ ଥର ପାଇଁ ବିଶ୍ୱକପ୍ରେ ପରସ୍ପରକୁ ଭେଟିବାକୁ ଯାଉଛନ୍ତି ଦୁଇ ପ୍ରତିଦ୍ୱନ୍ଦ୍ୱୀ। ତେବେ ଏଥର ଟି୨୦ ଫର୍ମାଟରେ। ଚଳିତ ଟି୨୦ କ୍ରିକେଟ ବିଶ୍ୱକପ୍ର ପ୍ରଥମ ସେମିଫାଇନାଲ ବୁଧବାର ସନ୍ଧ୍ୟା ୭.୩୦ରେ ଅନୁଷ୍ଠିତ ହେବ।
ଗୋଟିଏ ପକ୍ଷରେ ଅଛି ଇଂଲଣ୍ଡ। ପ୍ରତିଯୋଗିତା ଆରମ୍ଭରୁ ଏହି ଦଳ ଚମତ୍କାର ପ୍ରଦର୍ଶନ କରି ସେମିଫାଇନାଲରେ ସ୍ଥାନ ପକ୍କା କରିଛି। ମାତ୍ର ଖେଳାଳିଙ୍କ ଆହତ ସମସ୍ୟା ଦଳ ପାଇଁ ପାଲଟିଛି ଚିନ୍ତାର କାରଣ। ଏହାଛଡ଼ା ଶେଷ ଗ୍ରୁପ୍ ମ୍ୟାଚରେ ଦକ୍ଷିଣ ଆଫ୍ରିକା ନିକଟରୁ ପରାଜୟ ଦଳକୁ ଚିନ୍ତାରେ ପକାଇଛି।
ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ଜାସନ ରୟ ଆହତ ହେବା ଇଂଲଣ୍ଡକୁ ଶକ୍ତ ଧକ୍କା ପହଞ୍ଚାଇଛି। ଜାସନ ଓ ଜୋସ ବଟଲର ଚଳିତ ଟୁର୍ନାମେଣ୍ଟରେ ଓପନିଂ ଯୋଡ଼ିରେ ବିସ୍ଫୋରକ ବ୍ୟାଟିଂ କରି ଇଂଲଣ୍ଡକୁ ଫାଇଦାରେ ରଖୁଥିଲେ। ଜାସନଙ୍କ ଅନୁପସ୍ଥିତିରେ ଜନି ବେୟାରଷ୍ଟୋଙ୍କୁ ବଟଲରଙ୍କ ସହ ଓପନିଂ ପାର୍ଟନର କରାଯାଇପାରେ। ବଟଲରଙ୍କଠାରୁ ଆଉ ଏକ ମ୍ୟାଚ ବିଜୟୀ ଇନିଂସ ଆଶା କରୁଛି ଇଂଲଣ୍ଡ। ସାମ ବିଲିଙ୍ଗ୍ସ ମିଡିଲ ଅର୍ଡରରେ ବ୍ୟାଟିଂ କରିପାରନ୍ତି। ସବୁଠାରୁ ଭଲ କଥା ହେଲା ମିଡିଲ ଅର୍ଡରରେ ଅନେକ ବ୍ୟାଟର ଉପଯୋଗୀ ଇନିଂସ ଖେଳି ଇଂଲଣ୍ଡକୁ ସେମିଫାଇନାଲରେ ପହଞ୍ଚାଇଛନ୍ତି। ଟାଇମଲ ମିଲ୍ସ ଆହତ ସମସ୍ୟା ଯୋଗୁ ଓହରି ଯାଇଥିବାରୁ ଇଂଲଣ୍ଡର ବୋଲିଂ ବିଭାଗ ମଧ୍ୟ କ୍ଷତିଗ୍ରସ୍ତ ହୋଇଛି। ଡେଥ୍ ଓଭରରେ ମିଲ୍ସ ଚମତ୍କାର ବୋଲିଂ କରି ଆସୁଥିଲେ। ତାଙ୍କ ଅନୁପସ୍ଥିତିରେ ବିପକ୍ଷ ଦଳ ଫାଇଦା ଉଠାଇବା ସମ୍ଭାବନା ରହିଛି। ପାଓ୍ବାର ପ୍ଲେ ଏବଂ ମିଡିଲ ଓଭର ଗୁଡ଼ିକରେ ଉଇକେଟ ନେବାକୁ ଦୁଇ ସ୍ପିନର ମୋଇନ ଅଲୀ ଓ ଆଡିଲ ରଶିଦଙ୍କ ଉପରେ ଗୁରୁଦାୟିତ୍ୱ ରହିବ। ୨୦୧୯ ଦିନିକିଆ ବିଶ୍ୱକପ୍ର ଘଟଣା ମଧ୍ୟ ଦୁଇ ଦଳର ମନେ ଥିବ। ସେତେବେଳେ ବାଉଣ୍ଡାରୀ ନିୟମ ଅନୁସାରେ ଇଂଲଣ୍ଡ ବିଜେତା ଘୋଷିତ ହୋଇଥିଲା। ଏହା ପରଠାରୁ ଇଂଲଣ୍ଡ ସ୍ଥିର ପ୍ରଦର୍ଶନ ଦେଇ ଆସିଛି। ଏହି ଦଳ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଟାଇଟଲ ମଧ୍ୟ ଜିତିଛି।
ଚଳିତ ଟୁର୍ନାମେଣ୍ଟର ସୁପର-୧୨ ପର୍ଯ୍ୟାୟରେ ପାକିସ୍ତାନଠାରୁ ପରାଜୟ ସହ ଅଭିଯାନ ଆରମ୍ଭ କରିଥିବା ନ୍ୟୁଜିଲାଣ୍ଡ କିନ୍ତୁ ପରେ ସଫଳ ପ୍ରତ୍ୟାବର୍ତ୍ତନ କରିଥିଲା। ଟୁର୍ନାମେଣ୍ଟରେ ଏହି ଦଳର ବୋଲିଂ ବିଭାଗ ସବୁଠାରୁ ଶକ୍ତିଶାଳୀ ସାବ୍ୟସ୍ତ ହୋଇ ଆସିଛି। ଏହି ଦଳ ଭାରତକୁ ୧୧୦ ଓ ଆଫଗାନିସ୍ତାନକୁ ୧୨୫ ରନରେ ସୀମିତ ରଖି ନିଜ ବୋଲିଂ ଶକ୍ତିର ପରିଚୟ ଦେଇଥିଲା। ଦୁଇ ଦ୍ରୁତ ବୋଲର ଟ୍ରେଣ୍ଟ ବୋଲ୍ଟ ଏବଂ ଟିମ୍ ସୌଦି ପ୍ରଭାବୀ ରହି ଆସିଛନ୍ତି। ଲୋକି ଫର୍ଗୁସନଙ୍କ ଅନୁପସ୍ଥିତି ଏହି ଦଳକୁ ଚିନ୍ତାରେ ପକାଇଥିଲେ ହେଁ ଆଡାମ ମିଲ୍ନେ ତାଙ୍କର ସଫଳ ବଦଳ ଖେଳାଳି ବୋଲି ପ୍ରମାଣିତ କରିଛନ୍ତି। ଦୁଇ ସ୍ପିନର ଇଶ୍ ସୋଧି ଓ ମିଚେଲ ସାଣ୍ଟନର ମଧ୍ୟ ଚମତ୍କାର ବୋଲିଂ କରି ଆସିଛନ୍ତି। ମିଡିଲ ଓଭରରେ ସୋଧି ଉଇକେଟ ନେବାରେ ସଫଳ ହୋଇଛନ୍ତି। ଓପନର ମାର୍ଟିନ ଗୁପଟିଲ, ଡାରିଲ ମିଚେଲ ବଢ଼ିଆ ଫର୍ମରେ ଅଛନ୍ତି। ଅଧିନାୟକ କେନ୍ ଓ୍ବିଲିୟମସନ ଆବଶ୍ୟକ ଅନୁସାରେ ବ୍ୟାଟିଂ କରି ଦଳକୁ ଫାଇଦାରେ ରଖିଛନ୍ତି। ଶାରଜା ଓ ଦୁବାଇ ତୁଳନାରେ ଆବୁଧାବି ପିଚ୍ ବ୍ୟାଟରଙ୍କୁ ଅଧିକ ସହାୟତା କରିଥାଏ। ତେଣୁ ପ୍ରଥମ ସେମିଫାଇନାଲ ହାଇସ୍କୋରିଂ ମ୍ୟାଚ ହେବା ଆଶା କରାଯାଉଛି।
