ଢାକା,୧।୯: ସ୍ଥାନୀୟ ଶେରେ ବାଂଲା ନ୍ୟାଶନାଲ ଷ୍ଟାଡିୟମରେ ବୁଧବାର ବାଂଲାଦେଶ ବିପକ୍ଷରେ ଖେଳାଯାଇଥିବା ପ୍ରଥମ ଟି୨୦ ମ୍ୟାଚ୍ରେ ନ୍ୟୁଜିଲାଣ୍ଡ ମାତ୍ର ୬୦ ରନ୍ରେ ଅଲଆଉଟ୍ ହୋଇଯାଇଛି। ଏହା ଅନ୍ତର୍ଜାତୀୟ ଟି୨୦ କ୍ରିକେଟ ଇତିହାସରେ ନ୍ୟୁଜିଲାଣ୍ଡ ପାଇଁ ସବୁଠୁ କମ୍ ଦଳଗତ ସ୍କୋର। ଘରୋଇ ବୋଲର ମୁସ୍ତାଫିଜୁର ରେହମାନ (୩), ଶାକିବ ଅଲ ହାସନ (୨), ନାସୁମ ଅହମ୍ମଦ (୨) ଓ ସେଫୁଦ୍ଦିନ (୨) ଭ୍ରମଣକାରୀ ବ୍ୟାଟ୍ସମ୍ୟାନଙ୍କୁ କ୍ରିଜ୍ରେ ଅଧିକ ସମୟ ଛିଡ଼ା କରାଇ ଦେଇ ନ ଥିଲେ। ଅଧିନାୟକ ଟମ ଲଥାମ (୧୮) ଓ ହେନରୀ ନିକୋଲାସ(୧୮)ଙ୍କୁ ଛାଡ଼ି ଦେଲେ ଅନ୍ୟ କୌଣସି ଖେଳାଳି ଛୁଇଁ ପାରି ନ ଥିଲେ ଦୁଇ ଅଙ୍କ ସ୍କୋର। ୬୧ ରନ୍ର ଛୋଟିଆ ବିଜୟ ଲକ୍ଷ୍ୟକୁ ୧୫ ଓଭରରେ ୩ ଉଇକେଟ କ୍ଷତିରେ ହାସଲ କରିନେଇଥିଲା ଘରୋଇ ବାଂଲାଦେଶ ଦଳ। ଟି୨୦ ଫର୍ମାଟରେ ଏହା ନ୍ୟୁଜିଲାଣ୍ଡ ବିପକ୍ଷରେ ବାଂଲାଦେଶର ପ୍ରଥମ ବିଜୟ।
