ଓ୍ବେଲିଂଟନ, ୧୪ା୭ (ପି.ଟି.)- ନ୍ୟୁଜିଲାଣ୍ଡର ଟପ୍ କ୍ରିକେଟରମାନେ ସୋମବାର ସ୍କ୍ବାଡ୍ ଟ୍ରେନିଂକୁ ଫେରିଛନ୍ତି। ଲିନ୍କନ୍ଠାରେ ଥିବା ଦେଶର ହାଇ ପରଫର୍ମାନ୍ସ ସେଣ୍ଟରଠାରେ ଏହା ଅନୁଷ୍ଠିତ ହେଉଛି। କୋଭିଡ୍-୧୯ ମହାମାରୀ ଯୋଗୁ ସ୍କ୍ବାଡ୍ ଟ୍ରେନିଂକୁ ମାର୍ଚ୍ଚ ଶେଷ ଭାଗରେ ବନ୍ଦ ରଖାଯାଇଥିଲା। ସେପ୍ଟେମ୍ବର ପର୍ଯ୍ୟନ୍ତ ୬ଟି କ୍ୟାମ୍ପ ଅନୁଷ୍ଠିତ ହେବ ବୋଲି ନ୍ୟୁଜିଲାଣ୍ଡ କ୍ରିକେଟ (ଏନ୍ଜେଡ୍ସି) ତରଫରୁ ଘୋଷଣା କରାଯାଇଛି। ସୋମବାର ଯେଉଁ ପୁରୁଷ ଖେଳାଳିମାନେ ଟ୍ରେନିଂ କ୍ୟାମ୍ପରେ ଯୋଗ ଦେଇଛନ୍ତି ସେମାନେ ହେଲେ ଟମ୍ ଲଥାମ, ହେନ୍ରୀ ନିକୋଲ୍ସ, ମ୍ୟାଟ୍ ହେନ୍ରୀ ଏବଂ ଡେରିଲ୍ ମିଚେଲ। ଆସନ୍ତା ସପ୍ତାହରେ ମାଉଣ୍ଟ ମନଗାନୁଇଠାରେ ଅନ୍ୟ କେତେଜଣ ଖେଳାଳିଙ୍କୁ ନେଇ ଆରମ୍ଭ ହେବାକୁଥିବା ଟ୍ରେନିଂ କ୍ୟାମ୍ପରେ ଅଧିନାୟକ କେନ୍ ଓ୍ବିଲିୟମସନ ଯୋଗଦେବେ। ନ୍ୟୁଜିଲାଣ୍ଡ ମହିଳା ଟିମ୍ ଟୁଇଟର ହ୍ୟାଣ୍ଡେଲ୍ରେ ଲିନ୍କନଠାରେ ଟ୍ରେନିଂ ନେଇଥିବାର ଫଟୋ ପୋଷ୍ଟ କରାଯାଇଛି। ପୁରୁଷ ଦଳରେ ଖେଳାଳିମାନେ ଦିନର ଦ୍ୱିତୀୟାର୍ଦ୍ଧରେ ଟ୍ରେନିଂ ନେଇଥିଲେ। କରୋନା ଭାଇରସ୍ ଦ୍ୱାରା କମ୍ ପ୍ରଭାବିତ ହୋଇଥିବା ଦେଶଗୁଡ଼ିକ ମଧ୍ୟରେ ନ୍ୟୁଜିଲାଣ୍ଡ ଅନ୍ୟତମ। ମହାମାରୀ ଆରମ୍ଭରେ ସ୍ଥାନୀୟ ସରକାର ଯେଉଁ ସବୁ କଟକଣା ଜାରି କରିଥିଲେ ସେଥିରୁ ଅଧିକାଂଶ ଉଠାଇ ଦେଇଛନ୍ତି। ଇଂଲଣ୍ଡ-ଓ୍ବେଷ୍ଟଇଣ୍ଡିଜ ଟେଷ୍ଟ ସିରିଜ ସହ ଅନ୍ତର୍ଜାତୀୟ କ୍ରିକେଟ ଆରମ୍ଭ ହୋଇଛି। ଅଷ୍ଟ୍ରେଲିଆନ କ୍ରିକେଟରମାନେ ମଧ୍ୟ ସେମାନଙ୍କ ଟ୍ରେନିଂ ଆରମ୍ଭ କରିସାରିଛନ୍ତି। ଲିନ୍କନ୍ଠାରେ ଚାଲିଥିବା କ୍ୟାମ୍ପ ଜୁଲାଇ ୧୬ରେ ଶେଷ ହେବ। ଦ୍ୱିତୀୟ କ୍ୟାମ୍ପ ଅଗଷ୍ଟ ୧୦ରୁ ୧୩ ପର୍ଯ୍ୟନ୍ତ ହେବ। ସେପ୍ଟେମ୍ବର ଆରମ୍ଭରେ ହେବାକୁଥିବା ତୃତୀୟ କ୍ୟାମ୍ପକୁ ନେଇ ଏପର୍ଯ୍ୟନ୍ତ ଦିନ ଧାର୍ଯ୍ୟ ହୋଇ ନାହିଁ।
