ପାଟଣା,୨୦।୯(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଓ ତୁରୁମୁଙ୍ଗା ଥାନା ଅଞ୍ଚଳର ବିଭିନ୍ନ ବଜାର ଅଞ୍ଚଳରେ ନୂଆ ଗୁଜବ। ପୁରୁଣା ଟିଭି ଓ ଫୋନ ରେ ଥିବା ନାଲି ବଲ୍ବରେ ଏଜ ତରଳ ଧାତୁ ରହିଛି, ଯାହା ବହୁ ମୂଲ୍ୟବାନ ବୋଲି ଚର୍ଚ୍ଚା ହେଉଛି। ଅଞ୍ଚଳର ଯୁବଗୋଷ୍ଠୀମାନେ ଏହାକୁ ସତ ମାନି ରାତାରାତି ଲକ୍ଷପତି ହେବା ଆଶାରେ ଟିଭି ମରାମତି ଦୋକାନଠାରୁ ଆରମ୍ଭ କରି ଗାଁ ଗହଳି ଓ ଚା’ ଖଟିରେ ୭୦ ଦଶକର ଟିଭି ଓ ଫୋନ ସନ୍ଧାନ ରେ ଲାଗିପଡିଛନ୍ତି। କାହାଘରେ ଏଭଳି ପୁରୁଣା ନାଲି ବଲ୍ବ ଥିବା କୋଣାର୍କ ଓ ଓନିଡା ଟିଭି ଅଛି ତାହାର ସନ୍ଧାନ ଚାଲିଛି। ଆଉ ସେହି ନାଲି ବଲ୍ବ ଟିଭି ବଦଳରେ ଲକ୍ଷାଧିକ ଟଙ୍କା ଦେବାକୁ ପ୍ରତିଶୃତି ଦେଉଛନ୍ତି ଯୁବଗୋଷ୍ଠୀ। କିଛି ବର୍ଷ ପୂର୍ବେ ଲୋକେ ମରୀଚିକା ଭଳି ହନୁମାନ ପଇସା ପଛରେ ପଡିବା ଭଳି ଏହିଗୁଜବରେ ଲୋକେ ଶିକାର ହେଉଥିବା ଦେଖିବାକୁ ମିଳୁଛି। ଏହିଘଟଣା ପଛରେ ସତ୍ୟତା ଯାହା ଥାଉନା କାହିଁକି ଲକ୍ଷପତି ହେବା ନିଶାରେ ଏବେ ଗାଁ ଗଣ୍ଡାରେ ଯୁବଗୋଷ୍ଠୀମାନେ ପୁରୁଣା ଟିଭି ଖୋଜିବାରେ ଦିନ ରାତି ଏକ କରିଦେଉଥିବା ଦେଖିବାକୁ ମିଳୁଛି। ଏହିନାଲି ବଲ୍ବ ଘଟଣା ରାକେଟ ଉପରେ ଜିଲା ପ୍ରଶାସନ ଦୃଷ୍ଟି ଦେଇ ତଦନ୍ତ କରିବାକୁ ବୁଦ୍ଧିଜୀବୀ ମାନେ ଦାବି କରିଛନ୍ତି।
