ନୂଆଦିଲ୍ଲୀ, ୬।୮ : ଦିଲ୍ଲୀର ଉପରାଜ୍ୟପାଳ ଭି.କେ ସାକ୍ସେନା ନୂତନ ଅବକାରୀ ନୀତି ନେଇ କଡ଼ା ପଦକ୍ଷେପ ନେଇଛନ୍ତି। ଭିଜିଲାନ୍ସ ରିପୋର୍ଟ ପରେ ସେ ଏକ୍ସାଇଜ ପଲିସିରେ ଦୁର୍ନୀତି ଅଭିଯୋଗ ଆଧାରରେ ଏକ୍ସାଇଜ କମିଶନର ଆରଓ୍ବ ଗୋପୀ କୃଷ୍ଣ, ତତ୍କାଳୀନ ଏକ୍ସାଇଜ କମିଶନର ଦାନିକ୍ସ ଆନନ୍ଦ କୁମାର ତିୱାରୀଙ୍କ ସମେତ ୧୧ ଜଣ ଅଧିକାରୀଙ୍କୁ ନିଲମ୍ବିତ କରିଛନ୍ତି। ଏକ୍ସାଇଜ ପଲିସି ଲାଗୁ କରିବାରେ ବିଳମ୍ବ ବିଷୟରେ ଏହି ପଦକ୍ଷେପ ନିଆଯାଇଛି। ଅଧିକାରୀଙ୍କ ବିରୋଧରେ ନିଲମ୍ବନ ଏବଂ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ସେ ଭିଜିଲାନ୍ସକୁ ଅନୁମୋଦନ କରିଛନ୍ତି।
ଏହାପୂର୍ବରୁ ଉପ-ମୁଖ୍ୟମନ୍ତ୍ରୀ ତଥା ଏକ୍ସାଇଜ ମନ୍ତ୍ରୀ ମନୀଷ ସିସୋଦିଆ ମଧ୍ୟ ପ୍ରଥମ ଥର ସ୍ବୀକାର କରିଛନ୍ତି ଯେ ଦିଲ୍ଲୀ ସରକାର ନୂତନ ଏକ୍ସାଇଜ ପଲିସି ୨୦୨୧-୨୨ ଯୋଗୁ ହଜାର ହଜାର କୋଟି କ୍ଷତି ସହିଛନ୍ତି। ଏଥିପାଇଁ ସେ ୧୭ ନଭେମ୍ବର ୨୦୨୧ ରୁ ଲାଗୁ ହୋଇଥିବା ନୂତନ ସିଷ୍ଟମରେ ଶେଷ ମୁହୂର୍ତ୍ତର ୟୁ-ଟର୍ନ ନେଇଥିବା ନେଇ ସେ ଉପରାଜ୍ୟପାଳଙ୍କୁ ଦାୟୀ କରିଛନ୍ତି। ଆମ ଆଦମୀ ପାର୍ଟି (ଏଏପି) ନେତା କହିଛନ୍ତି ଯେ ବର୍ତ୍ତମାନ ସେମାନେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) କୁ ଚିଠି ଲେଖି ଏହି ଘଟଣାର ତଦନ୍ତ ଦାବି କରିଛନ୍ତି।
ଶନିବାର ସିସୋଦିଆଙ୍କ ଅଭିଯୋଗର କିଛି ମିନିଟ ପରେ ଉପରାଜ୍ୟପାଳଙ୍କ କାର୍ଯ୍ୟାଳୟ ରିପୋର୍ଟ କରିଛି ଯେ ଭି.କେ ସାକ୍ସେନା ଦିଲ୍ଲୀର ତତ୍କାଳୀନ ଏକ୍ସାଇଜ କମିଶନର, ଆଇଏଏସ ଅଧିକାରୀ ଆରଓ୍ବ ଗୋପୀ କୃଷ୍ଣ ଏବଂ ଦାନିକ୍ସ ଆନନ୍ଦ କୁମାର ତିୱାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। ଏକ ଗଣମାଧ୍ୟମ ସମ୍ମିଳନୀକୁ ସମ୍ବୋଧିତ କରି ସିସୋଦିଆ କହିଥିଲେ ଯେ ୨୦୨୧-୨୨ ଏକ୍ସାଇଜ ପଲିସି ଲାଗୁ ହେବା ପୂର୍ବରୁ ଦୁଇଥର ଫାଇଲକୁ ଉପରାଜ୍ୟପାଳଙ୍କ ପାଖକୁ ପଠାଯାଇଥିଲା।
ସିସୋଦିଆ କହିଛନ୍ତି ଯେ ପ୍ରଥମ ଥର ପାଇଁ ତତ୍କାଳୀନ ଉପରାଜ୍ୟପାଳ ଅନିଲ ବୈଜଲ କିଛି ପରାମର୍ଶ ଏବଂ ପରିବର୍ତ୍ତନ ସହିତ ଫାଇଲ ପଠାଇଥିଲେ, ଯାହା ଦିଲ୍ଲୀ ସରକାରଙ୍କ ଦ୍ୱାରା ଅନ୍ତର୍ଭୁକ୍ତ କରାଯାଇଥିଲା। ଉପରାଜ୍ୟପାଳଙ୍କ ପରାମର୍ଶ ଅନୁଯାୟୀ ଆବଶ୍ୟକ ପରିବର୍ତ୍ତନ କରିବା ପରେ ନଭେମ୍ବର ପ୍ରଥମ ସପ୍ତାହରେ ଦ୍ୱିତୀୟ ଥର ପାଇଁ ଫାଇଲ ପଠାଯାଇଥିଲା। ନଭେମ୍ବର ୧୭ରୁ ନୂତନ ନୀତି କାର୍ଯ୍ୟକାରୀ ହେବାକୁ ଥିଲା ଏବଂ ଏହା ଶୁଭାରମ୍ଭ ହେବାର ୪୮ ଘଣ୍ଟା ପୂର୍ବରୁ ଉପରାଜ୍ୟପାଳ ନଭେମ୍ବର ୧୫ ରେ ଫାଇଲ ଫେରସ୍ତ କରିଥିଲେ ଏବଂ ଏଥିରେ ଏକ ବଡ ପରିବର୍ତ୍ତନ କରିବାକୁ କହିଥିଲେ। ଉପରାଜ୍ୟପାଳ କହିଥବଲେ ଯେ ଅନଧିକୃତ କଲୋନୀରେ ମଦ ଦୋକାନକୁ ଅନୁମତି ଦେବା ପାଇଁ ଆମକୁ ଦିଲ୍ଲୀ ବିକାଶ ପ୍ରାଧିକରଣ (ଡିଡିଏ) ଏବଂ ମ୍ୟୁନିସିପାଲିଟି କର୍ପୋରେଶନ ଠାରୁ ଅନୁମତି ନେବାକୁ ପଡିବ।
ସିସୋଦିଆ କହିଛନ୍ତି, ଏହି କାରଣରୁ ଦିଲ୍ଲୀ ସରକାର ହଜାରେ କୋଟି କ୍ଷତି ସହିଛନ୍ତି । କାରଣ ପ୍ରାୟ ୩୦୦ରୁ ୩୫୦ ଦୋକାନ ଯାହା ଅନଧିକୃତ କଲୋନୀରେ ଖୋଲା ଯାଇଥିଲା ତାହା ନୂତନ ବ୍ୟବସ୍ଥାରେ କେବେ ଖୋଲିପାରିବ ନାହିଁ। ଫଳସ୍ବରୂପ, ଦିଲ୍ଲୀରେ ମଦ ଦୋକାନ ଖୋଲିବାରେ ସଫଳ ହୋଇଥିବା କେତେକ କମ୍ପାନୀ ବିପୁଳ ଲାଭ କରିଥିଲେ, ଆଉ କେତେକ କ୍ଷତି ସହିଥିଲେ।
ନୂତନ ଏକ୍ସାଇଜ ନୀତିର ମୂଳ ଉଦ୍ଦେଶ୍ୟ ଥିଲା ମଦ ଦୋକାନଗୁଡ଼ିକର ଅସମାନ ବଣ୍ଟନକୁ ସମାପ୍ତ କରିବା, ଯାହା ଉପରାଜ୍ୟପାଳଙ୍କ ନିଷ୍ପତ୍ତି ହେତୁ କେବେ ହୋଇପାରିବ ନାହିଁ । ଉପରାଜ୍ୟପାଳଙ୍କ ହଠାତ ପରିବର୍ତ୍ତନ ହେବାର କାରଣ କେତେକ ବେସରକାରୀ କମ୍ପାନୀ କିମ୍ବା ବ୍ୟକ୍ତିବିଶେଷଙ୍କ ପାଇଁ ଉଦ୍ଦେଶ୍ୟମୂଳକ ଲାଭ ହୋଇପାରେ ବୋଲି ସିସୋଦିଆ ଅଭିଯୋଗ କରିଛନ୍ତି।
