ନୂଆଦିଲ୍ଲୀ/କାଠମାଣ୍ଡୁ,୨୮।୮(ପି.ଟି.): ନେପାଳ-ତିବ୍ବତ ସୀମାନ୍ତରେ ସୃଷ୍ଟ ଆକସ୍ମିକ ବନ୍ୟାରେ ସ୍ଥିତି ଅତ୍ୟନ୍ତ ସଙ୍କଟଜନକ ହୋଇପଡ଼ିଛି। ନୂତନ ତଥ୍ୟ ଅନୁଯାୟୀ ମୋଟ ମୃତ୍ୟୁସଂଖ୍ୟା ବୃଦ୍ଧି ପାଇ ୩୯୨ରେ ପହଞ୍ଚିଛି, ଯେଉଁଥିରୁ ନେପାଳରେ ୩୮୯ ଜଣ ଏବଂ ତିବ୍ବତରେ ୩ ଜଣଙ୍କର ମୃତ୍ୟୁ ଘଟିଛି। କେବଳ ନେପାଳର ଚିତାୱାନ ଜିଲାରୁ ସର୍ବାଧିକ ୧୩୭ଟି ମୃତଦେହ ମିଳିଛି। ସେହିପରି ଦୁଇ ଦେଶରେ ନିଖୋଜଙ୍କ ସଂଖ୍ୟା ବୃଦ୍ଧି ପାଇ ୧,୪୬୮ (ନେପାଳରେ ୯୧୦ ଓ ତିବ୍ବତରେ ୫୫୮) ରେ ପହଞ୍ଚିଛି। ଭାରତର ବହିର୍ବ୍ୟାପାର ମନ୍ତ୍ରଣାଳୟ (ଏମ୍ଇଏ) ଅନୁଯାୟୀ, ନିଖୋଜଙ୍କ ମଧ୍ୟରେ ୨୯୦ ଜଣ ଭାରତୀୟ ନାଗରିକ ଅଛନ୍ତି। ଏପର୍ଯ୍ୟନ୍ତ ତ୍ରିଶୂଳୀ-୧ ଜଳବିଦ୍ୟୁତ୍ ପ୍ରକଳ୍ପର ୬୩ ଜଣ ଶ୍ରମିକ ଓ ତାମିଲନାଡୁର ୨୧ ଜଣଙ୍କୁ ମିଶାଇ ମୋଟ ୮୪ ଜଣ ଭାରତୀୟଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ଅନ୍ୟପକ୍ଷରେ ତାମିଲନାଡୁର ୮୬ ଜଣ, ପଶ୍ଚିମବଙ୍ଗର ୩୨ ଜଣ, କେରଳର ୩୩ ଜଣ ଏବଂ ଅନ୍ୟାନ୍ୟ ରାଜ୍ୟର ୬୧ ଜଣ ଶ୍ରଦ୍ଧାଳୁ ଓ ପର୍ଯ୍ୟଟକ ନିଖୋଜ ଅଛନ୍ତି।
ଅପରପକ୍ଷରେ ତିବ୍ବତ ପାର୍ଶ୍ୱରେ ଫସିରହିଥିବା ପ୍ରାୟ ୨୦୦ ଜଣ ଭାରତୀୟ କୈଳାସ ମାନସରୋବର ତୀର୍ଥଯାତ୍ରୀ ଭାରତ ସରକାରଙ୍କ ସହାୟତା ଲୋଡ଼ିଛନ୍ତି। ଏମାନଙ୍କ ମଧ୍ୟରୁ ୯୫ ଜଣ ଗାର୍ଚାନ୍ରେ ଅଛନ୍ତି। ନେପାଳ ସେନା ଓ ବାୟୁସେନା ଦ୍ୱାରା ୭୯୬ ଜଣଙ୍କୁ ହେଲିକପ୍ଟର ଓ ୭୯୬ ଜଣଙ୍କୁ ସ୍ଥଳପଥରେ ଉଦ୍ଧାର କରାଯାଇଛି। ଭାରତୀୟ ବାୟୁସେନା ଓ ନେପାଳ ସେନାର ମିଳିତ ଉଦ୍ଧାର ଅଭିଯାନ ଜରିଆରେ ତାମିଲନାଡୁର ୨୧ ଜଣ ତୀର୍ଥଯାତ୍ରୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ବନ୍ୟାରେ ନେପାଳର ଭିତ୍ତିଭୂମି ସମ୍ପୂର୍ଣ୍ଣ ଛାରଖାର ହୋଇଯାଇଛି। ୩୫ଟି ମୋଟର ସେତୁ, ୪୫ଟି ଝୁଲା ପୋଲ ଏବଂ ବେତ୍ରାବତୀ-ରସୁୱାଗଢ଼ି ୪୨ କିଲୋମିଟର ରାଜପଥ ସହ ପ୍ରାୟ ୪୦ କିଲୋମିଟର ପକ୍କା ସଡ଼କ ଭାସିଯାଇଛି। ତ୍ରିଶୂଳୀ-୧ ଓ ଦେବୀଘାଟ ସମେତ ୧୨ଟି ଜଳବିଦ୍ୟୁତ୍ ପ୍ରକଳ୍ପ ଗୁରୁତର କ୍ଷତିଗ୍ରସ୍ତ ହୋଇଛି। ଆମେରିକାର ଭୂବିଜ୍ଞାନ ସର୍ବେକ୍ଷଣ (ୟୁଏସ୍ଜିଏସ୍) ଅନୁଯାୟୀ, ହିମସ୍ଖଳନ ଓ ଭୂସ୍ଖଳନ ଯୋଗୁ ବିଶାଳ ବରଫ, ପଥର ଓ ମାଟି ମାଡ଼ି ଆସି ‘ଲହେନ୍ଦେ ନଦୀ’ର ସ୍ରୋତକୁ କିଛି ସମୟ ପାଇଁ ସମ୍ପୂର୍ଣ୍ଣ ଅବରୋଧ କରିଦେଇଥିଲା। ପରେ ଏହି ସାମୟିକ ବନ୍ଧ ହଠାତ୍ ଭାଙ୍ଗିଯିବାରୁ ସଞ୍ଚିତ ପ୍ରବଳ ଜଳରାଶି, କାଦୁଅ ଓ ଧ୍ୱଂସାବଶେଷ ନିମ୍ନଭାଗରେ ଥିବା ଭୂତେ କୋଶୀ ଏବଂ ତ୍ରିଶୂଳୀ ନଦୀ ମଧ୍ୟକୁ ମାଡ଼ିଆସି ପ୍ରଳୟଙ୍କରୀ ଆକସ୍ମିକ ବନ୍ୟା ସୃଷ୍ଟି କରିଥିଲା। ନେପାଳ ପ୍ରଧାନମନ୍ତ୍ରୀ ବାଲେନ୍ଦ୍ର ଶାହ ଓ ଚାଇନା ପ୍ରଧାନମନ୍ତ୍ରୀ ଲି କିଆଙ୍ଗ୍ ବନ୍ୟାଞ୍ଚଳ ଗସ୍ତ କରି ଉଦ୍ଧାର କାର୍ଯ୍ୟର ସମୀକ୍ଷା କରିଛନ୍ତି। ଏହି ବିପତ୍ତି ସମୟରେ ତିବ୍ବତ ପାର୍ଶ୍ୱରେ ସୃଷ୍ଟି ହୋଇଥିବା ଏକ ନୂତନ କୃତ୍ରିମ ହ୍ରଦ ଯୋଗୁ ନେପାଳର ଭୂତେ କୋଶୀ ଓ ତ୍ରିଶୂଳୀ ନଦୀ କୂଳିଆ ଅଞ୍ଚଳରେ ପୁନର୍ବାର ଆକସ୍ମିକ ବନ୍ୟା ଆଶଙ୍କା ସୃଷ୍ଟି ହୋଇଛି। ନେପାଳ ଜଳବିଜ୍ଞାନ ଓ ପାଣିପାଗ ବିଭାଗ ନଦୀକୂଳିଆ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର ହେବା ପାଇଁ ଜରୁରୀ ସତର୍କତା ଜାରି କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନେପାଳ ସହ ଭାରତ ସମ୍ପୂର୍ଣ୍ଣ ସହାନୁଭୂତିର ସହ ଛିଡ଼ା ହୋଇଛି ବୋଲି ଘୋଷଣା କରିବା ସହ ରିଲିଫ ସାମଗ୍ରୀ ବୃଦ୍ଧି କରିଛନ୍ତି। ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କରଙ୍କ ତତ୍ତ୍ୱାବଧାନରେ ଭାରତୀୟ ବାୟୁସେନାର ସାମରିକ ବିମାନ ଯୋଗେ କାଠମାଣ୍ଡୁକୁ ଏପର୍ଯ୍ୟନ୍ତ ମୋଟ ୪୭.୫ ଟନ୍ ଜରୁରୀ ରିଲିଫ ସାମଗ୍ରୀ (ଔଷଧ, ତମ୍ବୁ, କମ୍ବଳ, ଖାଦ୍ୟ ପ୍ୟାକେଟ ଓ ସୋଲାର ଲାଇ୍ଟ) ପଠାଯାଇସାରିଛି। ନେପାଳ ପ୍ରଶାସନ ଓ ଭାରତୀୟ ଉଦ୍ଧାରକାରୀ ଦଳ ନିଖୋଜ ଭାରତୀୟଙ୍କୁ ଠାବକରିବା ପାଇଁ ଦିନରାତି ଉଦ୍ୟମ ଚଳାଇଛନ୍ତି।
