ନାଗପୁର, ୫।୬(ପି.ଟି.): ମେଡିକାଲ ପ୍ରବେଶିକା ପରୀକ୍ଷା ପାଇଁ ପ୍ରସ୍ତୁତ ହୋଇ ଗତ ମେ ୩ ତାରିଖରେ ଅନୁଷ୍ଠିତ ଏନ୍ଇଇଟି(ୟୁଜି) ପରୀକ୍ଷା ଦେଇଥିଲେ। ଆଶା ଥିଲା ଭଲ ର଼୍ୟାଙ୍କ ରଖି ଏକ ଭଲ ମେଡିକାଲ କଲେଜରେ ନାମ ଲେଖାଇ ଡାକ୍ତରୀ ପାଠ ପଢ଼ିବେ। ହେଲେ ଏନ୍ଇଇଟି ପ୍ରଶ୍ନପତ୍ର ଲିକ୍ ଘଟଣା ପରେ ଉକ୍ତ ପରୀକ୍ଷାକୁ ବାତିଲ କରି ଦିଆଗଲା। ଶିକ୍ଷା ମନ୍ତ୍ରଣାଳୟର ଏଭଳି ନିଷ୍ପତ୍ତି ଅନେକ ଛାତ୍ରୀଛାତ୍ରଙ୍କ ମନୋବଳକୁ ଭାଙ୍ଗି ଦେଇଥିବାବେଳେ ଜଣେ ଛାତ୍ରୀ ଆତ୍ମହତ୍ୟା କରିଛନ୍ତି। ଆତ୍ମହତ୍ୟା ପୂର୍ବରୁ ମାତାପିତାଙ୍କ ଉଦ୍ଦେଶ୍ୟରେ ଯେଉଁ ଲେଖା ସେ ଲେଖିଯାଇଛନ୍ତି, ତାହା ଏବେ ଚାରିଆଡ଼େ ଚର୍ଚ୍ଚାର ବିଷୟ ପାଲଟିଛି।
ଆଉ ଥରେ ପରୀକ୍ଷା ଦେବାକୁ ସାହସ ନାହିଁ, ମୋତେ କ୍ଷମା କରିଦେବ ବୋଲି ଏକ ଚିଠି ଲେଖି ଆତ୍ମହତ୍ୟା କରିଛନ୍ତି ନାଗପୁରର ଏକ କୋଚିଂ ସେଣ୍ଟରରେ ମେଡିକାଲ ପ୍ରବେଶିକା ପରୀକ୍ଷା ପାଇଁ ପ୍ରସ୍ତୁତ ହେଉଥିବା ମଧ୍ୟପ୍ରଦେଶର ୧୮ ବର୍ଷୀୟା ଆକାଂକ୍ଷା ଚତୁର୍ବେଦୀ। ଆକାଂକ୍ଷା ମେ ୨୦ରେ ଆତ୍ମହତ୍ୟା କରିଥିବାବେଳେ ମୃତ୍ୟୁ ପୂର୍ବରୁ ସେହି ହାତ ଲେଖା ଚିଠି ଏବେ ପରିବାର ଲୋକଙ୍କ ହସ୍ତଗତ ହୋଇଛି। ସେଥିରେ ଆକାଂକ୍ଷା ଲେଖିଥିଲେ, ‘ବାପା ଓ ବୋଉ, ତୁମର ବିଶ୍ୱାସ ଥିଲା ଯେ, ତୁମ ଝିଅ କଠିନ ପରିଶ୍ରମ କରି ଡାକ୍ତର ହେବ, କିନ୍ତୁ ପୁଣିଥରେ ଏନ୍ଇଇଟି ପରୀକ୍ଷା ଦେବାକୁ ମୋର ଆଉ ସାହସ ନାହିଁ। ମୁଁ ମୋର ପ୍ରଥମ ପ୍ରଚେଷ୍ଟାରେ ଭଲ ମାର୍କ ରଖିଥାନ୍ତି, କିନ୍ତୁ ଏବେ ମୁଁ ପୁଣି ଭଲ ପ୍ରଦର୍ଶନ କରିବି ବୋଲି କୌଣସି ଗ୍ୟାରେଣ୍ଟି ନାହିଁ। ମତେ କ୍ଷମା କରିଦେବ ବାପା-ବୋଉ’ ବୋଲି ପତ୍ରରେ ଉଲ୍ଲେଖ କରିଛନ୍ତି।
ଆକାଂକ୍ଷାଙ୍କ ପିତା କୃଷ୍ଣ କୁମାର ଚତୁର୍ବେଦୀ କହିଛନ୍ତି, ପରୀକ୍ଷା ବାତିଲ୍ ହେବା ପରେ ଆକାଂକ୍ଷାଙ୍କ ବ୍ୟବହାରରେ ବହୁତ ବଡ଼ ପରିବର୍ତ୍ତନ ଆସିଥିଲା। ସେ ନିଜ ପ୍ରଦର୍ଶନକୁ ନେଇ ବହୁତ ଖୁସି ଥିଲା। କିନ୍ତୁ ପ୍ରଶ୍ନପତ୍ର ଲିକ୍ ଏବଂ ପରୀକ୍ଷା ବାତିଲ ଖବର ଆସିବା ମାତ୍ରେ ସେ ସମ୍ପୂର୍ଣ୍ଣ ଭାଙ୍ଗି ପଡ଼ିଥିଲା। ଏ ନେଇ ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ତୀବ୍ର ସମାଲୋଚନା କରିଛନ୍ତି। ରାହୁଲ କହିଛନ୍ତି, ଆକାଂକ୍ଷାଙ୍କ ମୃତ୍ୟୁ ଏକ ଆତ୍ମହତ୍ୟା ନୁହେଁ ବରଂ ଭୁଶୁଡ଼ି ପଡ଼ିଥିବା ବ୍ୟବସ୍ଥାର ପରିଣାମ।
