ଲସ୍‌ ଏଞ୍ଜେଲସ୍‌ ଅଲିମ୍ପିକ୍ସରେ ଭାରତ ଟପ୍‌-୧୦ରେ ରହିବ: ରିଜିଜୁ
8:15 pmJuly 25, 2020July 25, 2020 / 05

ନୂଆଦିଲ୍ଲୀ୨୫।୭(ପି.ଟି.): ଭାରତୀୟ କ୍ରୀଡ଼ାର ଉନ୍ନତି ନେଇ କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ ବେଶ୍‌ ଆଶାବାଦୀ ଅଛନ୍ତି। ଏପରିକି ୨୦୨୮ ଅଲିମ୍ପିକ୍ସରେ ଭାରତ ଶ୍ରେଷ୍ଠ-୧୦ ମଧ୍ୟରେ ସ୍ଥାନିତ ହେବ ବୋଲି ସେ ଭବିଷ୍ୟବାଣୀ କରିଛନ୍ତି। ଏଥିରେ ସରକାରଙ୍କ ‘ଟାର୍ଗେଟ୍‌ ଅଲିମ୍ପିକ ପୋଡିୟମ ଜୁନିୟର ସ୍କିମ୍‌’ ମୁଖ୍ୟ ଭୂମିକା ଗ୍ରହଣ କରିବ। ଏଥିରେ ସରକାର କୌଣସି ହେଳା କରିବେ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
‘ଟାର୍ଗେଟ ଅଲିମ୍ପିକ ପୋଡିୟମ ଜୁନିୟର ସ୍କିମ୍‌’ ମାଧ୍ୟମରେ ୧୦ ଓ ୧୨ ବର୍ଷର ପିଲାଙ୍କୁ ଚିହ୍ନଟ କରି ଲସ୍‌ ଏଞ୍ଜେଲସ ଅଲିମ୍ପିକ୍‌ ପାଇଁ ପ୍ରସ୍ତୁତ କରିବା ଆମର ଲକ୍ଷ୍ୟ ରହିଛି। ଭାରତକୁ ଏକ ସ୍ପୋର୍ଟିଂ ପାଓ୍ବାର ହାଉସ୍‌ ବନାଇବା ଆମର ଲକ୍ଷ୍ୟ ବୋଲି ଇଣ୍ଡିଆ ଟୁଡେ ମାଇଣ୍ଡ୍ରକ୍ସ ଇଭେଣ୍ଟରେ ଯୋଗ ଦେଇ ସେ କହିଛନ୍ତି।
ଏହି ଯୁବ ପ୍ରତିଭାସମ୍ପର୍ଣ୍ଣ ଖେଳାଳିଙ୍କୁ ବିଶ୍ୱସ୍ତରୀୟ କୋଚିଂର ସୁବିଧା ସୁଯୋଗ ଦିଆଯିବ। ଯାହା ଫଳରେ ୧୦-୧୩ ବର୍ଷର ପିଲା ୨୦୨୮ ଲସ୍‌ ଏଞ୍ଜେଲସ ଅଲିମ୍ପିକ୍ସରେ ଚାମ୍ପିୟନ ହେବା ପାଇଁ ପ୍ରସ୍ତୁତ ହୋଇପାରିବେ। ଏହି ସ୍କିମ୍‌ ମାଧ୍ୟମରେ ଆମେ ଯୁବ ପ୍ରତିଭାମାନଙ୍କୁ ଚିହ୍ନଟ କରିବୁ। ଏଥିସହିତ ଭାରତୀୟ କୋଚ୍‌ମାନଙ୍କ ଦକ୍ଷତା ବଢାଇବା ପାଇଁ ବିଭିନ୍ନ ପଦକ୍ଷେପ ନେବୁ। କୋଚ୍‌ମାନଙ୍କର ୨ ଲକ୍ଷ ଟଙ୍କା ସାଲାରି କ୍ୟାପ୍‌କୁ ମଧ୍ୟ ବାତିଲ କରାଯାଇଛି। ପୁଣି କୋଚ୍‌ମାନଙ୍କ କାର୍ଯ୍ୟକାଳକୁ ମଧ୍ୟ ବଢାଯାଇଛି। ଏହ ସବୁ ପଦକ୍ଷେପ କ୍ରୀଡ଼ା ଉନ୍ନତିରେ ସହାୟକ ହେବ ବୋଲି ସେ କହିଛନ୍ତି। ୨୦୨୮ ବେଳକୁ ଭାରତ କିପରି ମେଡାଲ ତାଲିକାରେ ଟପ୍‌-୧୦ରେ ସ୍ଥାନ ପାଇବେ ସେ ନେଇ ଯୋଜନା କରାଯିବା ସହ ଏଗୁଡିକୁ କାର୍ଯ୍ୟକାରୀ କରାଯିବ। ଭାରତକୁ ଏକ ସ୍ପୋଟର୍‌ସ ପାଓ୍ବାର ହାଉସ୍‌ରେ ପରିଣତ କରିବାକୁ ହେଲେ ଦେଶରେ କ୍ରୀଡ଼ା ସଂସ୍କୃତି ସୃଷ୍ଟି କରିବାକୁ ପଡିବ ବୋଲି ରିଜିଜୁ କହିଛନ୍ତି।