ନଭି ମୁମ୍ବାଇ,୪।୯: ମହାରାଷ୍ଟ୍ରର ନଭି ମୁମ୍ବାଇରେ ସ୍କୁଲ ବସ୍ ଭିତରେ ଜଣେ ୩ ବର୍ଷର ଶିଶୁକୁ ଯୌନ ନିର୍ଯାତନା ଦିଆଯାଇଥିବା ଅଭିଯୋଗ ସାମ୍ନାକୁ ଆସିଛି। ଏହି ମାମଲାରେ ୩୦ ବର୍ଷୀୟ ବସ୍ ଡ୍ରାଇଭରଙ୍କୁ ପୋଲିସ ଗିରଫ କରିଛି। ଗୁରୁବାର ତାଙ୍କୁ ପନଭେଲ କୋର୍ଟରେ ହାଜର କରାଯିବା ପରେ ଅଦାଲତ ତାଙ୍କୁ ଶନିବାର ପର୍ଯ୍ୟନ୍ତ ପୋଲିସ ହେପାଜତକୁ ପଠାଇଛନ୍ତି।
ପୋଲିସର ସୂଚନା ଅନୁଯାୟୀ, ଅଭିଯୁକ୍ତ ଡ୍ରାଇଭର ଏକ ଘରୋଇ ସ୍କୁଲର ଛାତ୍ରୀଛାତ୍ରଙ୍କୁ ନେବାଆଣିବା ପାଇଁ ଭଡ଼ାରେ ନିଆଯାଇଥିବା ବସ୍ ଚଳାଉଥିଲେ। ତାଙ୍କ ବିରୋଧରେ ୧୨ ବର୍ଷରୁ କମ୍ ଶିଶୁଙ୍କ ସହ ବଳାତ୍କାର ମାମଲାରେ ଲାଗୁ ହେଉଥିବା BNSର ସମ୍ପୃକ୍ତ ଧାରା ସହ ପୋକ୍ସୋ ଆଇନ ଅଧୀନରେ ମାମଲା ରୁଜୁ ହୋଇଛି।
ପୋଲିସ ଅଧିକାରୀଙ୍କ କହିବା ଅନୁଯାୟୀ, ଶିଶୁଟି ପ୍ରତିଦିନ ଅନ୍ୟ ଛାତ୍ରୀଛାତ୍ରଙ୍କ ସହ ଘରୋଇ ସ୍କୁଲ ବସ୍ରେ ଯାତାୟାତ କରୁଥିଲା। ବୁଧବାର ପ୍ରାୟ ୧୨ଟା ୩୦ ସମୟରେ ଅଭିଯୁକ୍ତ ଡ୍ରାଇଭର କାମୋଠେସ୍ଥିତ ଏକ କିଣ୍ଡରଗାର୍ଟେନ ଓ ପ୍ରାଥମିକ ସ୍କୁଲର ଛାତ୍ରୀଛାତ୍ରଙ୍କୁ ଘରେ ଛାଡ଼ିବାକୁ ନେଇଯାଇଥିଲେ। ଅନ୍ୟ ପିଲାମାନେ ନିଜ ନିଜ ଘରେ ଓହ୍ଲାଇଯିବା ପରେ ଶିଶୁଟି ବସ୍ରେ ଏକୁଟିଆ ରହିଯାଇଥିଲା। ଏହି ସମୟରେ ଡ୍ରାଇଭର ତାଙ୍କ ସହ ଯୌନ ନିର୍ଯାତନା ଦେଇଥିବା ଅଭିଯୋଗ ହୋଇଛି।
ଘରେ ପହଞ୍ଚିବା ପରେ ଶିଶୁଟି ପେଟରେ ଯନ୍ତ୍ରଣା ହେଉଥିବା କହିଥିଲା। ପରେ ସେ ତାଙ୍କ ଜେଜେମାଆଙ୍କୁ ବସ୍ ଡ୍ରାଇଭର ଅଙ୍କଲ ତାଙ୍କ ସହ ଭୁଲ କାମ କରିଥିବା କହିଥିଲେ। ଏହାପରେ ପରିବାର ପକ୍ଷରୁ ସ୍କୁଲ ପରିଚାଳନାକୁ ଘଟଣା ବିଷୟରେ ଜଣାଇବା ସହ ପୋଲିସରେ ଅଭିଯୋଗ କରାଯାଇଥିଲା। ମେଡିକାଲ ପରୀକ୍ଷା ପରେ ଶିଶୁଟି ଯୌନ ନିର୍ଯାତନାର ଶିକାର ହୋଇଥିବା ନେଇ ନିଶ୍ଚିତତା ମିଳିବା ପରେ ପୋଲିସ ଅଭିଯୁକ୍ତ ଡ୍ରାଇଭରଙ୍କ ବିରୋଧରେ ବଳାତ୍କାର ମାମଲା ରୁଜୁ କରିଛି। ଏହାସହ ସ୍କୁଲ ପରିଚାଳନାର କର୍ମଚାରୀମାନଙ୍କ ବୟାନ ମଧ୍ୟ ରେକର୍ଡ କରାଯିବ ବୋଲି ପୋଲିସ କହିଛି।
