ଅହମ୍ମଦାବାଦ,୧।୧୨: ଗୁଜରାଟରେ ବିଧାନସଭା ନିର୍ବାଚନ ପାଇଁ ପ୍ରଥମ ପର୍ଯ୍ୟାୟ ମତଦାନ ଗୁରୁବାର ଶେଷ ହୋଇଛି। ଅନ୍ୟପଟେ ଦ୍ୱିତୀୟ ପର୍ଯ୍ୟାୟ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅହମ୍ମଦାବାଦରେ ଏକ ମେଗା ରୋଡ ଶୋ’ କରିଛନ୍ତି। ମୋଦିଙ୍କ ଏହି ୫୪ କିଲୋମିଟର ଲମ୍ବା ରୋଡ ଶୋ’ ବିଳମ୍ବିତ ରାତି ପର୍ଯ୍ୟନ୍ତ ଚାଲିବ ଏବଂ ୧୪ଟି ବିଧାନସଭା ନିର୍ବାଚନମଣ୍ଡଳୀ ଦେଇ ଗତି କରିବ। ଅହମ୍ମଦାବାଦର ଅନେକ ବିଧାନସଭା ନିର୍ବାଚନମଣ୍ଡଳୀ ଦେଇ ଏହି ରୋଡ ଶୋ’ ଗତି କରିବ ବୋଲି ଜଣାପଡ଼ିଛି। ପ୍ରଧାନମନ୍ତ୍ରୀ ମୋଦିଙ୍କ ଏପର୍ଯ୍ୟନ୍ତ ଏହା ହେଉଛି ସବୁଠାରୁ ବଡ ନିର୍ବାଚନ ରୋଡ ଶୋ’। ଏହାର ନାମ ‘ପୁଷ୍ପାଞ୍ଜଳି ଯାତ୍ରା’ ରଖାଯାଇଛି। ଏହି ରୋଡ ଶୋ’ରେ ପ୍ରଧାନମନ୍ତ୍ରୀ ମୋଦି ଅହମ୍ମଦାବାଦର ୧୩ଟି ଏବଂ ଗାନ୍ଧିନଗରରେ ୧ଟି ଆସନ କଭର୍ କରିବେ। ପ୍ରଧାନମନ୍ତ୍ରୀଙ୍କ ଏହି ରୋଡ ଶୋ’ ଯେଉଁ ଆସନ ଦେଇ ଗତି କରୁଛି ସେଥିମଧ୍ୟରୁ ୧୧ଟି ଆସନ ୨୦୧୭ରେ ଭାଜପା ଜିତିଛି। ଆଉ ଅନ୍ୟ ୩ଟି ଆସନ କଂଗ୍ରେସ ଜିତିଥିଲା। ପ୍ରଧାନମନ୍ତ୍ରୀ ଏପର୍ଯ୍ୟନ୍ତ ୩୩ଟି ଜିଲାରୁ ୨୩ଟିରେ ରାଲି କରିସାରିଛନ୍ତି। ଏହି ସମୟରେ ମୋଦି ୨୮ଟି ରାଲି ଏବଂ ୨ଟି ରୋଡ ଶୋ’ କରିଛନ୍ତି।
