ବ୍ରହ୍ମପୁର,୧୯ା୫(ସୁବାସ ଚନ୍ଦ୍ର ପାଢ଼ୀ): ଗଞ୍ଜାମ ଜିଲା ଦୌରାଜଜ୍ ଅଶାନ୍ତ କୁମାର ଦାସ ମଙ୍ଗଳବାର ଏକ ହତ୍ୟା ମାମଲାର ବିଚାର କରି ୨ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି। ଅଭିଯୁକ୍ତ ଦ୍ୱୟ ହେଲେ ଗୋପାଳପୁର ଥାନା ଅନ୍ତର୍ଗତ ତେରଗୌଞ୍ଜ ଗ୍ରାମର ପ୍ରଦୀପ ଦାସ(୨୮) ଓ ନାରାୟଣ ଦାସ(୪୦)। କାରାଦଣ୍ଡ ସହ ଉଭୟଙ୍କୁ ୧୦ ହଜାର ଟଙ୍କା ଲେଖାଏ ଜରିମାନା କରାଯାଇଛି। ଜରିମାନା ଅନାଦାୟ ଅଧିକ ୧ବର୍ଷ ସଶ୍ରମ କାରାଦଣ୍ଡ ଭୋଗିବାକୁ ହେବ ବୋଲି ରାୟରେ ଉଲ୍ଲେଖ ରହିଛି।
୨୦୨୪ ମାର୍ଚ୍ଚ ୧୩ ତାରିଖରେ ତେରଗୌଞ୍ଜ ଗ୍ରାମର ମୁନା ଦାସ ଗାଁ ମୁଣ୍ଡରେ ଥିବା ଏକ ମଦ ଦୋକାନକୁ ଯାଇଥିଲେ। ସେଠାରେ ପ୍ରଦୀପ ଭିକାରୀ ଦାସଙ୍କ ସହ ଝଗଡ଼ା କରୁଥିଲେ। ମୁନା ଝଗଡା ନ କରିବାକୁ ପ୍ରଦୀପଙ୍କୁ କହିଥିଲେ। ଏଥିରେ ଉତ୍ତ୍ୟକ୍ତ ହୋଇ ପ୍ରଦୀପ ସେଠାରେ ପଡିଥିବା ଲୁହାଛଡ଼ ଆଣି ମୁନାଙ୍କ ମୁଣ୍ଡକୁ ପିଟିିଥିଲେ। ତାଙ୍କ ସହଯୋଗୀ ନାରାୟଣ ଦାସ ମଧ୍ୟ ମୁନାଙ୍କୁ ଆକ୍ରମଣ କରିଥିଲେ। ଭିକାରୀ ଦାସ ଓ କାଳୁ ଦାସ ଏହାର ପ୍ରତିବାଦ କରିବାରୁ ସେମାନଙ୍କୁ ମଧ୍ୟ ଆକ୍ରମଣ କରିଥିଲେ। ଆହତ ମୁନା, ଭିକାରୀ ଓ କାଳୁଙ୍କୁ ଉଦ୍ଧାର କରାଯାଇ ଏମ୍କେସିଜି ମେଡିକାଲରେ ଭର୍ତ୍ତି କରାଯାଇଥିଲା। ମୁନାଙ୍କ ଅବସ୍ଥା ଗୁରୁତର ହେବାରୁ କଟକ ବଡ ମେଡିକାଲ ସ୍ଥାନାନ୍ତର କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ଏ ନେଇ ଗୋପାଳପୁର ଥାନାରେ ଅଭିଯୋଗ ପରେ ପୋଲିସ ନଂ.୧୦୮/୨୪ରେ ଏକ ମାମଲା ରୁଜୁ କରି ଅଭିଯୁକ୍ତ ପ୍ରଦୀପ ଓ ନାରାୟଣଙ୍କୁ ଗିରଫ ପରେ କୋର୍ଟ ଚାଲାଣ କରିଥିଲା।
ତଦନ୍ତକାରୀ ତଥା ତତ୍କାଳୀନ ଏସ୍ଆଇ ଲିସାରାଣୀ ସେଠୀ ଉଭୟଙ୍କୁ ଅଭିଯୁକ୍ତ ଦର୍ଶାଇ କୋର୍ଟରେ ଚାର୍ଜଶିଟ ଦାଖଲ କରିଥିଲେ। ମାମଲାର ବିଚାର ବେଳେ ୧୬ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ଘଟଣାବେଳେ ଆହତ ଥିବା ପ୍ରତ୍ୟେକ୍ଷଦର୍ଶୀଙ୍କ ବୟାନ ଓ ପୋଲିସ ପକ୍ଷରୁ ଦାଖଲ ଚାର୍ଜଶିଟ ଆଧାରରେ ୨ ଅଭିଯୁକ୍ତଙ୍କୁ ଜଜ୍ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ସରକାରଙ୍କ ପକ୍ଷରୁ ପିପି ବିଶ୍ୱଜିତ ବରାଳ ମାମଲା ପରିଚାଳନା କରିଥିଲେ।
